Pagtorotiripon Tangani na Omawon si Jehova
1. Ano an tema kan kombension, asin taano si Jehova ta angay na sambahon niato?
1 Si Jehova makakamhan sa gabos sa kapangyarihan, dai marorop sa kadonongan, sangkap sa hustisya, asin an personipikasyon nin pagkamoot. Bilang Kaglalang, Paratao nin Buhay, asin Unibersal na Soberano, sia sana an angay na sambahon niato. (Sal. 36:9; Kap. 4:11; 15:3, 4) An “Pamurawayon an Dios” na Pandistritong Kombension ngonyan na taon pakokosogon an satong desisyon na omawon sia bilang an solamenteng tunay na Dios.—Sal. 86:8-10.
2, 3. Paano kita lubos na makikinabang sa marahay na pagplano?
2 Kaipuhan an Marahay na Pagplano: Kaipuhan an marahay na pagplano tangani na lubos kitang makinabang sa espirituwal na kapiestahan na itinagama ni Jehova. (Efe. 5:15, 16) Natapos na daw nindo an mga areglo nindo para sa dadagosan, transportasyon, asin bakasyon sa trabaho o eskuelahan? Dai idigson an importanteng mga bagay na ini sagkod sa pinakahuring oras. Kun mag-atraso kamo sa paghagad nin bakasyon, tibaad malipasan nindo an sarong kabtang kan magayagayang okasyon na ini. Kita gabos kaipuhan na magin presente sa gabos na sesyon.
3 Gibohon nindong pasohan na umabot nin amay sa lugar kan kombension aroaldaw. Pangyayarihon kaiyan na kamo nakatukaw na bago an pambukas na awit asin matabang na andamon an isip nindo na umako kan pagtotokdo na iaatubang. An programa mapoon nin alas 8:30 n.a. sa Biernes asin Sabado, asin nin alas 9:00 n.a. sa Domingo. Dai tabi magreserba nin mga tukawan apuera sana para sa mga kapamilya nindo o kairiba sa pagbiahe.
4. Taano ta pinakikiolayan kita gabos na magbalon nin pangudtohan sa kombension?
4 Pinakikiolayan na an gabos magbalon nin pangudtohan imbes na humale pa sa lugar kan kombension tangani na magbakal nin pagkakan durante kan pahingalo sa udto. An pakikikooperar nindo sa areglong ini nakakokontribwir sa matoninong na palibot asin nagtatao nin orog na panahon para sa pakikiasosyar sa mga kapagtubod. (Sal. 133:1-3) Girumdomon tabi na dai itinotogot sa mga pasilidad kan kombension an mga lalagan na napapasa asin mga inomon na de alkohol.
5. Paano niato puedeng ponan na andamon an satong puso para sa kombension?
5 Maghinanyog Asin Makanood: Mapagngayongayong inandam ni Esdras an saiyang puso na akoon an tataramon nin Dios. (Esd. 7:10) Ikiniling nia an saiyang puso sa pagtotokdo ni Jehova. (Tal. 2:2) Puede na niatong ponan na andamon an satong puso para sa kombension dawa bago kita maghale sa harong paagi sa paghorophorop manongod sa tema kan kombension asin pakipag-olay kaiyan sa satong pamilya.
6. Ano an makakatabang sa sato na mapagdanay an satong konsentrasyon sa programa? (Helingon an kahon.)
6 Sa sarong dakulang auditoryum, puedeng dakol an naheheling asin tanog na makadidisturbo sa atension niato. An siring na mga disturbo pasil sanang makaparayo kan konsentrasyon niato sa ispiker. Kun mangyari iyan, dai niato makukua an mahalagang impormasyon. An mga suhestion na yaon sa kaibanan na kahon makakatabang sa sato na paoswagon an satong konsentrasyon.
7, 8. Paano kita makapaheheling nin konsiderasyon sa iba?
7 Magpaheling nin Konsiderasyon sa Iba: Puedeng gumamit nin mga kamera asin camcorder durante kan programa, alagad tangani na malikayan na makadisturbo sa iba, gamiton sana iyan sa saindong tukawan. Kaipuhan na iprograma an mga cell phone asin pager sa paagi na dai iyan makadidisturbo sa iba. Dai maninigong ikonektar an personal na kasangkapan sa electrical o sound system sa lugar kan kombension.
8 Kanigoan an pag-antisipar niato na magtorotiripon tangani na omawon si Jehova! Logod na magin determinado kitang pamurawayon sia paagi sa pag-atender sa gabos na sesyon, paagi sa atentong paghinanyog, asin paagi sa pag-aplikar kan satong nanodan.—Deut. 31:12.
[Kahon sa pahina 3]
Paghinanyog sa mga Kombension
▪ Pensaron an tema kan mga pahayag
▪ Hanapon an mga teksto
▪ Kumua nin haralipot na nota
▪ Gumibo nin espesyal na nota kan mga puntong iaaplikar
▪ Repasohon an nanodan nindo