“Makahulang Tataramon nin Dios” na Pandistritong mga Kombension Ngonyan na 1999-2000

¹ Kan an mga Israelita palaog na sa Dagang Panuga, nakimaherak si Moises sa sainda na pahalagahan an instruksion nin Dios. Sia nagsabi sa sainda: “Iyan bakong tataramon na daing halaga sa saindo, kundi iyan nangangahulogan kan saindong buhay.” (Deut. 32:​45-47) Dai daw kita nagpapasalamat ki Jehova na an satong buhay mahal nia nanggad na marhay kaya padagos nia kitang ginigiyahan paagi sa saiyang daing kaagid sa halaga na Tataramon? Kun siring galaga niatong inaantisipar an tolong aldaw na “Makahulang Tataramon nin Dios” na Pandistritong Kombension asin an itinatagama ni Jehova para sa sato.

² Ngonyan na taon, 52 na pandistritong kombension an plinano na kombenyente sa 46 na laen-laen na siudad asin banwaan sa bilog na Pilipinas. An programa kan kombension kokonduktahan sa Bicol, Cebuano, Hiligaynon, Iloko, Ingles, Pagtaram Paagi sa Senyas sa Pilipinas, Pangasinan, Samar-Leyte, asin Tagalog. Boot niamong enkaminaron an gabos na umatender sa kombension na duman sinda iinasignar apuera sana kun igwa nin pambihirang kamugtakan na kaipuhan an eksepsion. Nangorognang importante ini sa mga kombension na Tagalog sa Quezon City, kun saen limitado an mga tukawan asin paradahan. An bilang nin mga sirkito na asignado sa kada kombension na Tagalog sa Assembly Hall supisyente sana sa kapasidad kan hall, kaya kun dakolon na iba pa an madagsa, magigin bakong kombenyente duman sa mga asignadong umatender. An saindong mamomoton na kooperasyon mapadapit digdi aapresyaron na marhay.

³ Daing duwa-duwa na naggibo na kamo nin mga areglo na umatender sa gabos na aldaw kan kombension huli ta naniniwala kamo na linalaoman kamo ni Jehova na umatender. Makasisierto kamo na naheheling nia an indibiduwal na mga paghihingoa asin pagsasakripisyo kan saiyang mga lingkod na umatender, asin ginigirumdom nia iyan na may pagpapahalaga. (Heb. 6:10) Paagi sa pag-atender sa kada aldaw kan kombension poon sa pambukas na kanta sagkod sa pantapos na pamibi, ipinaheheling niato ki Jehova na pinahahalagahan niato an saiyang mga tataramon sa sato. (Deut. 4:10) Ipinaheheling man niato an pag-apresyar sa kahigosan kan satong dakol na tugang na kalabot sa pagpreparar para sa kombension.

⁴ An pag-areglar para sa rinibo kan banwaan nin Dios na magtiripon sa kada lugar kan kombension nagkakaipo nin patienot na pagplano asin marahay na pag-organisar. An pakaaram na an mga areglo sa kombension mamomoton na ginibo maninigong magpahiro sa sato na makikooperar, tanganing ‘magibo an gabos na bagay sa disente asin aregladong paagi.’ (1 Cor. 14:40) Itinao an minasunod na impormasyon asin mga pagirumdom tanganing makaabot kamo sa saindong kombension na lubos na preparado sa pagkamit kan espirituwal na kakanon asin Kristianong pakikiiba.

Bago an Kombension

⁵ An mga kinokonduktahan daw nindo nin pag-adal sa Biblia asin iba pang interesado nangangaipo nin tabang sa paggibo nin personal na mga areglo na umatender sa kombension? An naheheling asin nadadangog ninda mientras na yaon duman puedeng magpahiro sa sainda na magin mga parasamba ki Jehova. (1 Cor. 14:25) Maninigong aram kan kamagurangan an siisay man na nangangaipo nin tabang sa transportasyon, partikularmente an mga may edad nang miembro kan kongregasyon, asin mamomoton na siertohon na ikatao an saindang mga pangangaipo.​—Gal. 6:10.

⁶ Mantang an Departamento sa First Aid sa kombension ibinugtak para sana sa pag-asikaso nin mga emerhensia, irinerekomendar mi na magdara kamo sa kombension nin sadiri nindong aspirin, mga bolong sa panunaw, asin kaagid na mga bagay kun sa paghona nindo tibaad kaipuhanon iyan. Kun kamo o an sarong namomotan may seryosong pinagmamate, siring baga nin helang sa puso, diabetes, o pirmeng inaatake, magdara tabi sa kombension kan kinakaipuhan na bolong tangani na maasikaso an mga pangangaipong ini na garo man sana kamo nasa harong o nagbabakasyon. Madonong para sa sarong miembro nin pamilya o dayupot na katood na nakasasabot kan situwasyon na pirmeng ibanan an tawong iyan, huling sia an nasa pinakamarahay na kamugtakan na magtao kan kinakaipuhan na tabang.

⁷ Posibleng lumataw an mga oportunidad na gumibo nin impormal na pagpapatotoo mantang kamo nagbibiahe pasiring asin hale sa kombension. Magigin andam daw kamong ihiras sa iba an katotoohan? Kita gabos, kabale an sadit na mga aki, puedeng magin kalabot paagi sa pag-alok nin mga pulyeto sa mga katabang sa gasolinahan asin iba pa na nanonompongan nindo sa saindong pagbiahe. Magkakaigwa nin mga oportunidad na makapasakamot nin mga magasin, brosyur, o iba pang babasahon sa mga interesado. Magin andam na magpatotoo nin impormal sa mga tawong tibaad nalipasan kan mas pinagkatodan na mga paagi nin paghuhulit.

Durante kan Kombension

⁸ Puede kamong magreserba nin mga tukawan para sana sa saindong kapamilya o kairiba sa sasakyan. Kun posible, may irereserba na kombenyenteng mga tukawan para sa mga may edad nang tugang na lalaki asin babae, asin matagama nin mga lugar para sa baldado patin mga nasa silyang de rueda. Sa kada aldaw kun mahale na kamo sa saindong tukawan, tabi magsiyasat tangani na maseguro na yaon sa saindo an gabos nindong gamit.

⁹ Kamo daw mapabautismo sa pandistritong kombension? Para sa sesyon sa Sabadong aga, may irereserbang grupo nin mga tukawan para sa mga kandidato sa bautismo, asin itotokdo kamo kan mga attendant sa lugar na ini. Kun posible man sana, tumukaw na tabi duman bago pumoon an sesyon. Darahon an saindong Biblia, songbook, tuwalya, asin mabining pankarigos. An mga T-shirt na may sarabihon asin kaagid na sulot bakong angay sa siring na may dignidad na okasyon. An kamagurangan na nagrerepaso sa mga kandidato sa bautismo kan mga hapot sa librong Our Ministry maninigong siertohon na an kada saro nasasabotan an mga puntong ini. Huling an bautismo simbolo nin personal na pagdusay ki Jehova Dios, bakong angay para sa mga kandidato na magkarapotan nin kamot mantang binabautismohan.

¹⁰ Puede kamong gumamit nin mga kamera, camcorder, asin audiocassette recorder sa kombension. Minsan siring, an namumugtakan o paggamit kaiyan dai maninigong makaolang sa mga agihan, makalipod sa pagheling nin iba, o makarayo nin atension sa programa. Iyan dapat na independiente​—an boot sabihon, bakong konektado sa saksakan nin koryente o sound system.

¹¹ Mantang nagdadakol an naggagamit nin mga cellular phone asin pager, tabi mag-ingat na an mga aparatong ini dai makaolang magsalang sa saindong atension sa programa o sa konsentrasyon kan mga nakatukaw sa palibot nindo. An mga aparatong ini dai maninigong togotan na magtanog nin makosog mientras na kamo nakatukaw kaiba kan mga nagdadangog. Kun kaipuhan na kamo gumamit nin cellular phone mantang may programa, tabi gibohon iyan sa luwas kan auditoryum.

¹² Tanganing makaekonomiya sa panahon asin magin simple, pinakiolayan kita kan Sosyedad na magdara kita sa kombension nin sadiring pangodtohan kada aldaw. Sinunod kan kadaklan na tugang an instruksion na ini asin nanompongan ninda na sa pahingalo sa odto, nakakataed ninda an saindang pamilya asin nakakakakan kan balon ninda para sa aldaw na iyan. Dakol an nagsabi na nakagagayagaya an oportunidad na magpahorohayahay durante kan pahingalo sa odto asin magkaigwa nin dugang na panahon na makaibanan an saindang mga tugang na lalaki asin babae. Nangangaipo ini nin pagbakal nin mga kakanon asin inomon antes pa patin pagbugtak kaiyan sa sadit na lalagan o cooler na puedeng magkaigo sa irarom kan tukawan. Hinahagad mi sa gabos na maatender na sunodon an instruksion na ini. Dai pa sana nahahaloy, nariparo na an nagkapirang tugang minahale sa auditoryum tangani na bumakal nin kakanon sa mga nagtitinda sa tinampo asin sa kaharaning mga restawran. Ineenkaminar kaini an dakol pang paratinda sa tinampo na magtiripon sa luwas kan istadyum, na nagigin dahelan nin surusuan asin makanos paghelingon. Kun siring, nakikiolay kami na an kada saro maghingoa na magbalon sa kombension nin sadiring kakanon asin inomon kada aldaw. An mga interesado na kaiba nindo sa kombension maninigo man na magbalon nin sadiring kakanon. Dai itinotogot sa mga pasilidad kan kombension an mga lalagan na mapapasaon asin inomon na de alkohol.

¹³ Kaoyon kan nasa enotan, siempre bakong tama para sa siisay man na tugang na aprobetsaran an kombension paagi sa pagpabakal nin mga bagay na siring baga kan mga patos nin libro o T-shirt, abaniko, o kalendaryo na may nakaimprentang tema kan kombension. An lugar kan kombension nagigin sarong dakulang Kingdom Hall na dian mayo nin lugar an komersial na mga aktibidad.

¹⁴ Puede daw kamong magboluntaryo sa paglinig kan pasilidad pakatapos kan mga sesyon kada aldaw? O puede daw kamong magtrabaho sa saro kan iba pang departamento kan kombension? Kun puede kamong tumabang, tabi dumuman sa Departamento nin Pagboboluntaryo sa kombension. An kaakian na dai pang 16 anyos maogmang inaako na magtrabaho kaiba nin sarong magurang o saro pang responsableng nasa edad na. Siempre, gabos puedeng tumabang sa paglinig kan pasilidad paagi sa pagsierto na puroton an ano man na basura asin iapon nin tama.

¹⁵ Nakaresibi kita nin marahay na mga giya dapit sa kun ano an angay na gubing asin pag-alinyar sa satong mga kombension. Halimbawa: Igwa kita nin instruksion sa bagay na ini sa mga suplemento kan An Satong Ministeryo sa Kahadean, igwa kita nin mga ilustrasyon asin retrato sa satong mga babasahon, asin pinakaimportante sa gabos, igwa kita kan sinasabi ni Jehova sa Biblia. (Roma 12:​2; 1 Tim. 2:​9, 10) An mga tawo nakaaaram kun siisay kita asin kun taano kita ta nagtiripon sa saindang lugar. Sa siring, an satong gubing asin pag-alinyar mapuersa na mismong patotoo. An mayoriya sa banwaan ni Jehova nagtatao nin marahay na halimbawa sa kabtang na ini. Pero kun minsan, naheheling niato an espiritu kan kinaban na nababanaag sa gubing asin pag-alinyar nin nagkapira na nag-aatender sa satong mga kombension. An ano man na klase nin gubing na garo baga kinulang na marhay sa tela ibinubugtak sa pagduda an paghihingako nin indibiduwal na sia sarong espirituwal na tawo. An pinakamagayon iyo an mabini, malinig, husay na itsura. Kun siring, an mga payo nin pamilya maninigong riparohon kun ano an pinaplanong isulot kan saindang mga miembro nin pamilya. Aplikado man ini kun mayo kita sa lugar kan kombension. An pagsolog kan satong lapel badge bago asin pakatapos kan mga sesyon kan aldaw dugang pang iinaasosyar kita ki Jehova asin sa saiyang malinig na banwaan.​—Ikomparar an Marcos 8:38.

¹⁶ An madonong na si Hadeng Salomon pinasabngan na magkomento na “an kakablasan nagagakot sa puso nin aki” asin “an aki na pinababayaan sana magdadara nin kasopganan sa saiyang ina.” (Tal. 22:​15; 29:15) Durante kan mga sesyon, an dai binabantayan na mga aking Saksi nakaistorbo sa mga tugang na lalaki asin babae na nagmamaigot na makinabang sa programa. Durante kan mga kombension kan nakaaging taon sa Estados Unidos, may mga aki na nanompongan na nakatukaw sa mas nasa itaas na mga tukawan, na nagpapaitok-itok nin mga laser pointer sa mga nagdadangog. An liwanag na hale sa mga pointer na ini makosogon asin puedeng makadanyar sa mata, dawa pa harayo. Risang-risa na an mga hoben na ini dai nakikinabang sa espirituwal na programa na iinandam na sinda an nasa isip. Mantang an mga magurang an maninimbag ki Jehova sa gawe-gawe kan saindang mga aki, masisierto nin sarong ina o ama na an mga aki toltol asin naghihinanyog sa pagtotokdo ni Jehova solamente kun an mga aki kataed ninda. Dodolokon kan mga attendant an siisay man na nakadidisturbo asin hahagadon na sinda pumondo sa paggibo kaiyan, na maboot na pinagigirumdom sinda na mag-atento sa programa.

¹⁷ Huling maogma niatong inaako an publiko sa satong mga kombension, madonong na magmaan mapadapit sa mga aki asin personal na mga gamit. An satong mga aki mahal na marhay na regalo hale ki Jehova. Alagad aram niato na an kinaban nagpapabanaag kan pagigin naniniba ni Satanas. Huli kaini, tabi aramon kun yaon saen an saindong mga aki sa gabos na panahon. Siring man, an mga kamera, pitaka, asin iba pang mahahalagang bagay maninigong dara-dara nindo sa gabos na panahon asin dai iwalat sa saindong tukawan. Siertohon na an saindong sasakyan barat, asin ibugtak an personal na mga gamit sa kargadera o darahon nindo iyan. Iniinaan kaini an sugot na may maghabon sa saindong sasakyan.

¹⁸ Nakaparirigon sa boot na maheling an mga tugang na lalaki asin babae na nagkukua nin mga nota durante kan mga sesyon sa kombension. An halipot na mga nota makatatabang sa saindo na magkonsentrar asin magpapagirumdom kan pangenot na mga punto. An pagrepaso kan saindong mga nota sa huri kaiba kan pamilya o mga katood nagtotogot sa saindo na horophoropon an mga tampok na kabtang kan kombension tanganing iyan dai malingawan.

¹⁹ An banwaan ni Jehova kaidto pa bukas an palad sa pagdonar para sa teokratikong intereses. (Ex. 36:​5-7; 2 Cron. 31:​10; Roma 15:​26, 27) An saindong boluntaryong mga donasyon para sa gibohon sa bilog na kinaban ginagamit sa pagbayad kan mga gastos na konektado sa pag-arkila kan darakulang pasilidad na duman ginigibo an mga kombension. Kun tseke an saindong donasyon, tabi isurat na iyan babayadan sa “Watchtower.”

²⁰ Siring kan nasusurat sa Amos 3:​7, si Jehova nagsabi na sia “dai magibo nin ano man sagkod na dai pa nia ikinapahahayag an saiyang hilom sa saiyang mga lingkod na propeta.” Bilang an “Parahayag nin mga hilom,” ipinasurat ni Jehova sa Biblia an ginatos na hula na eksakto asin biyo nang naotob. (Dan. 2:​28, 47) An dakulang mga panuga maootob pa. An “Makahulang Tataramon nin Dios” na Pandistritong mga Kombension Ngonyan na 1999-2000 pakokosogon an saindong pagtubod sa mga panuga nin Dios. Maingat na hinanyogon an tataramon ni Jehova para sa saindo. Iaplikar an saindong maheheling asin madadangog​—sa ministeryo, sa kongregasyon, asin sa saindong personal na buhay. Ipinamimibi niamo na logod mayaman na bendisyonan ni Jehova an gabos nindong areglo na umatender kada aldaw sa nagsosopay, espirituwal na kapiestahan na ini!

[Blurb sa pahina 3]

Magplanong umatender sa bilog na aldaw nin Biernes, Sabado, asin Domingo!