“Sa Dios na Dalan nin Buhay” na Pandistritong mga Kombension Ngonyan na 1998-99
1 An Talinhaga 10:29 nagpapagirumdom sa sato na “an dalan ni Jehova pailihan.” Angay nanggad an tema kan kombension ngonyan na taon—“Sa Dios na dalan nin Buhay”! Paano daw ipaliliwanag an temang ini sa bilog na tolong aldaw na programa? Kita gabos galagang nag-aantisipar sa nakatagama para sa sato.
2 An mga misyonero, internasyonal na lingkod, o iba pa na naglilingkod sa mga destino sa ibang nasyon tibaad maatender sa nagkapira sa mga kombension ngonyan na taon. An mga ini tibaad interbiohon sa programa. Itatampok man kan programa sa kombension an mga bareta kun paano binebendisyonan ni Jehova an gibohon sa manlaenlaen na teritoryo.
3 Bawi Man an Paghihingoa na Umatender: An dakol sa satong mga tugang sa Aprika nakaeksperyensia nin mga kasakitan huli sa guerra asin grabeng kariribokan na nangyayari sa nagkapirang parte kan kontinenteng iyan. Minamansay ninda an mga kombension kan banwaan ni Jehova bilang saindang proteksion. An nagkapira kaipuhan na magbaklay nin hararayo tangani na makaatender sa kombension, alagad ta dai ninda iniisip na mapaltahan minsan saro kaiyan. An sarong 73 anyos na tugang na lalaki sa Demokratikong Republika nin Congo (dating Zaire) nagbaklay nin mga 450 kilometros tangani na makaatender sa kombension. Sia nag-abot pakapagbaklay nia nin 16 na aldaw, gatok an bitis, alagad maogma na yaon duman. Pagkatapos kan kombension, sia nagbaklay papuli na labi-labi an kagayagayahan asin napakosog sa espirituwal. Ini na an pinagkatodan nia sa laog nin dakol na taon!
4 Sa Mozambique an sarong paraataman sa distrito asin an saiyang agom nagtukad sa sarong halangkaw na bukid asin nagbaklay paibong sa sarong dakulang garo-desiertong lugar tangani na makaatender sa pansirkitong asamblea. Nagbaklay sinda nin 90 kilometros sa laog nin 45 oras. Naparigon na marhay an gabos na nag-atender sa marahay na halimbawa kan mag-agom na ini. An dakol na pamilyang yaon duman naggibo man nin kaagid na mga paghihingoa tangani na makaatender. An paraataman sa distrito nagreport na an pirang tugang, kabale an sarong 60 anyos, nagbaklay nin 200 kilometros!
5 Guminibo na daw kamo nin depinidong mga plano tangani na makaatender sa kombension ngonyan na taon? Posibleng marhay na dai man kamo mabaklay nin harayo, alagad kaipuhan an paghihingoa asin sakripisyo tanganing kamo asin an saindong pamilya magin presente. Iareglo na atenderan an bilog na programa poon sa kapinonan sagkod matapos. Dakol na estudyante sa Biblia an nag-ooswag pasiring sa pagdusay. An saindang pag-atender sa kombension makatatabang sa sainda na magdesisyon nin tama. Inimbitaran na daw nindo an saindong mga estudyante sa Biblia asin iba pang interesado na umatender kaiba nindo?
6 Tolong Aldaw na Programa: Ngonyan na taon iaatubang an programa sa 51 kombension sa Pilipinas. An mga petsa asin lugar kaini nakalista sa poro kan suplementong ini. Sa ngonyan aram na nindo kun arin na kombension an aatenderan kan saindong kongregasyon.
7 Espesyal na Pasabot: Partikularmenteng importante sa mga kombension sa Metro Manila ngonyan na taon na an gabos na nasa lugar na iyan umatender sana sa kombension na aatenderan kan saindang kongregasyon. Magkakaigwa kita nin anom na sunod-sunod na kombension sa Assembly Hall sa Quezon City. Limitado sana an tukawan kan hall kaya idto sanang mga asignado sa partikular na katapusan kan semana an maninigong umatender sa panahon na iyan, tangani na malikayan an pagsurusuan. An mga sirkito na maatender sa kada kombension ipinaheling sa An Satong Ministeryo sa Kahadean kan Setyembre. Paagi sa saindong paggalang asin pakikikooperar sa mga areglong ini masesegurado na an gabos na bagay magigibo sa disente asin aregladong paagi.—1 Cor. 14:33, 40.
8 Sa Biernes asin Sabado, mapoon an programa sa alas 8:30 n.a. Sa Domingo iyan mapoon sa alas 9:00 n.a. Sa Biernes asin Sabado, matatapos an programa sa alas 5:00 n.h., asin sa Domingo, sa alas 4:00 n.h.
9 Mantang kita nagbibiahe paduman asin hale sa kombension, maninigo kitang humanap nin mga oportunidad na makapatotoo nin impormal. An mga katabang sa gasolinahan, tindero, asin serbidor tibaad interesado sa mensahe kan Kahadean. Mag-andam para digdi paagi sa pagdara nin mga tract, bagong magasin, brosyur, o iba pang babasahon, tangani na maaprobetsaran nindo an mga oportunidad na makapatotoo sa mga tawo na tibaad dai napapaabotan kan maogmang bareta.—2 Tim. 3:17.
10 “Mag-atento Kamo sa kun Paano Kamo Naghihinanyog”: Madonong na himateon kan mga delegado sa kombension an sadol na yaon sa Lucas 8:18. Ineenkaminar an gabos na magdara nin Biblia, siring man nin songbook asin kuaderno. Maingat na maghinanyog sa pangenot na mga punto sa kada iinaatubang na kabtang, asin gumibo nin halipot na mga nota. Hapoton an saindong sadiri kun paano nindo personal na ikaaaplikar an materyal. Sa kada banggi kan kombension, bago kamo magtorog, taano ta dai repasohon an saindong mga nota asin analisaron kun gurano nindo kaingat na sinususog an dalan nin buhay ni Jehova.—Tal. 4:10-13.
11 Nariparo kan nakaagi na durante kan mga sesyon, an nagkapira naghahale sa auditoryum asin nagtutukaw sa saindang mga sasakyan, sa siring nalilipasan an pag-atubang kan programa. An iba namasdan na nagpaparalakawlakaw sa mga pasilyo mantang maninigo kutana sindang nakatukaw sa auditoryum asin naghihinanyog. Naheling an mga grupo nin mga hoben na naghahale sa lugar kan kombension sa kabangaan nin hapon. “An fiel asin madonong na oripon” naggamit nin dakol na panahon asin paghihingoa sa pagtao nin marahay na pagtotokdo, na kaipuhan niato gabos. (Mat. 24:45) Marahay na himateon niato an sadol ni Pablo: “Kinakaipuhan na kita magtao nin orog kisa dating atension sa mga bagay na satong nadangog, tanganing dai kita noarin man ikaanod.” (Heb. 2:1) An nagkapira sa mga lingkod ni Jehova kan nag-aging mga panahon nakaginibo nin seryosong mga sala sa saindang buhay huli ta dai sinda maingat na naghinanyog sa mga pagirumdom ni Jehova. Seguradong boot niatong likayan an paggibo nin kaagid na sala.—2 Hade 17:13-15.
12 Gubing na Nagtataong Onra ki Jehova: Sa delikadong mga panahon na ini, kaipuhan niatong magtao nin orog kisa dating atension tangani na kita dai maimpluwensiahan kan espiritu kan kinaban na ini. (1 Cor. 2:12) An satong gubing asin pag-alinyar maninigong magin mabini asin maninigong magpabanaag kan dignidad kan Dios na sinasamba niato. (1 Tim. 2:9, 10) Dai kaipuhan an mamahalon na gubing tanganing makabilang sa mga ‘nagsasamno sa katokdoan kan satong Paraligtas, an Dios.’ (Tito 2:10) Mangnoha an marahay na pag-alinyar kan pamilyang nakaretrato sa atubangan kan Setyembre 15, 1997 luwas kan An Torrengbantayan. Mayong duwa-duwa sa kun siisay an saindang irinerepresentar! Nungkang menuson an mapuersang patotoo na ikatatao niato paagi sa paggubing na nagtataong onra ki Jehova.
13 Iinestorya nin sarong 16 anyos na Saksi na kan sia asin an saiyang tugang na lalaki magduman sa sarong restawran sarong banggi pakatapos kan sesyon, nariparo ninda na an nagkapira sa mga tugang na lalaki asin babae na yaon duman nagsangli nin bakong angay na gubing. Minsan siring, an dakol na parokyano sa restawran paborable an nagin reaksion sa pakaheling sa mga Saksi na husay asin angay an gubing patin nakasulot kan saindang badge card. Ini nagbukas kan dalan na makapagpatotoo sa nagkapira sa mga parokyano.
14 Gawe-gawe na Nag-oomaw ki Jehova: Aram niato na an satong Kristianong gawe-gawe puedeng makaapektar sa kun paano minamansay nin iba an tunay na pagsamba. Kun siring, boot niatong gumawe sa gabos na panahon sa paagi na angay sa maogmang bareta asin na nag-oomaw ki Jehova.—Fil. 1:27.
15 Kan nakaaging taon, ginibo an kaenot-enoteng pandistritong kombension sa amihanan nin Angola. Kan ikaduwang aldaw kan kombension, duwang lokal na pulis an ipinadara sa lugar na iyan tangani na seguradohon na namamantener an pagigin areglado kan publiko. Nagdanay sinda sa bilog na aldaw. Pagkatapos kan aldaw, ipinahayag ninda an saindang paghanga sa saindang nadangog asin sa aregladong gawe-gawe na namasdan ninda. An saro sa sainda nagkomento: “Taano kita ta pinadigdi pa? Aram ta man sana na an Mga Saksi ni Jehova areglado sa saindang mga pagtiripon.”
16 An sarong miembro nin partido politikal sa sarong nasyon sa Aprika nagdulag pa-Europa kan gadanon an gabos na iba pang miembro kan saiyang partido. Nakaeksperyensia sia nin dakol na personal na problema asin nadesganar na marhay. Pag-abot nin panahon nag-ako sia nin pag-adal sa Biblia. Sa kaenot-enoteng pag-atender nia sa pandistritong kombension, sia naghanga na an mga tawo na laen-laen an pinaghalean nagtitiripon na may katoninongan asin pagkasararo. Nakombensir sia na nanompongan na nia an katotoohan, asin durante kan kombension na idto nagdesisyon siang pondohon an gabos niang koneksion sa politika. Kan huri sia nabautismohan, asin ngonyan sia asin an saiyang mga aki naglilingkod na ki Jehova.
17 Paano an satong gawe-gawe sa mga kombension ngonyan na taon makaaapektar sa mga tibaad maatender sa kaenot-enote? Maririparo daw ninda an espiritu nin kooperasyon kun kita iribang nagtatrabaho bilang mga boluntaryo? Mahanga daw sinda sa kalinigan kan satong palibot asin sa pakaheling na bago humale sa lugar kan kombension, pinupurot niato asin kan satong mga aki an ano man na basura na tibaad natipon harani sa satong mga tukawan? Mamamasdan daw ninda an satong marahay na gawe-gawe mantang kita nagbibiahe paduman asin hale sa satong dinadagosan patin sa lugar kan kombension? Maririparo daw ninda na binabantayan na marhay kan mga magurang an saindang mga aki sa gabos na panahon? Seguradohon niato na itinatao niato an pinakamarahay na impresyon na mapupuede sa gabos na nagmamasid sa sato.
18 Pagbayad sa mga Gastos kan Kombension: An sarong tiket para sa tukawan tangani na magdalan nin sarong isport o iba pang programa sa sarong istadyum o hall nin kombension puedeng mahal sa sekular na kinaban ngonyan. Ini huli sa halangkaw na arkila sa darakulaon na siudad. Kaidto pa igwa na an Sosyedad kan “libreng tukawan, mayong koleksion” na paagi nin pagpalakaw sa mga kombension. Kun siring, paano mababayadan an arkila asin iba pang gastos kan kombension? Paagi sa buka an palad na mga donasyon kan mga nag-aatender. Nasesegurado mi na ipaheheling nindo an espiritu nin pagigin buka an palad siring kaidtong ipinaheling kan mga lingkod nin Dios kan nakaaging mga panahon bilang pag-arog ki Jehova Dios asin ki Jesu-Cristo. (2 Cor. 8:7) Ginigibo an dakulang pag-iingat tangani na seguradohon na an gabos na donasyon nasa marahay na kamugtakan, nakarekord, asin ginagamit para sa katuyohan kaiyan.
19 Tukawan: An mga giya na itinao na sa laog nin dakol na taon padagos na minaaplikar, iyo na ngani, AN MGA TUKAWAN IKARERESERBA SANA PARA SA MGA MIEMBRO KAN SAINDONG PAMILYA ASIN SA SIISAY MAN NA KAIBA NINDO SA BIAHE SA SAINDONG SASAKYAN. Nakaparirigon sa boot na maheling an marahay na pag-oswag sa bagay na ini, asin ini nakadagdag sa mamomoton na atmospera na ipinaheling sa mga kombension. Sa kadaklan na lugar, may mga tukawan na mas madaling makua kisa sa iba. Magpaheling tabi nin konsiderasyon, asin iwalat an mas kombenyenteng mga tukawan para sa mga may edad na asin sa iba na an mga kamugtakan nangangaipo kaiyan. Girumdomon na an ‘pagkamoot dai naghahanap kan sadiring kapakanan.’—1 Cor. 13:4, 5; Fil. 4:4.
20 Mga Camera, Camcorder, Asin Audiocassette Recorder: Puedeng gumamit nin mga camera asin kasangkapan sa pagrekord sa mga kombension. Minsan siring, an saindong paggamit kaiyan dai dapat na makadisturbo sa iba. An pagparalakawlakaw na nagreretrato durante kan mga sesyon makadidisturbo sa iba na naghihingoang makapagkonsentrar sa programa. Mayo nin ano man na klase nin aparato sa pagrekord na itatakod sa mga saksakan nin koryente o sound system, ni an kasangkapan na ini maninigo man na makaolang sa mga agihan, pasilyo, o pagheling nin iba.
21 First Aid: An Departamento sa First Aid para sana sa mga emerhensia. Magdara tabi nin sadiri nindong aspirin, mga bolong sa panunaw, benda, imperdible, asin mga kaagid kaiyan, huling an siring na mga bagay dai makukua sa kombension. An siisay man na midbid na pirmeng inaatake, nanluluya huli sa sobrang insulin, may helang sa puso, asin iba pa, maninigong magdara kan kinakaipuhan na bolong. Maninigo sindang ibanan nin sarong miembro kan saindang pamilya o kan kongregasyon na nakasasabot kan saindang situwasyon asin puedeng mag-asikaso kun may emerhensia. Nagkaigwa nin mga problema sa mga kombension kan an mga indibiduwal na may pabalikbalik na helang binayaan nin solo asin nagluya an salud. Kun an nagkapira na may espesyal na mga pangangaipo sa salud mayo nin mga miembro sa pamilya na makakatabang sa sainda, kaipuhan na paaramon an kamagurangan manongod sa kamugtakan na iyan asin maninigong gumibo nin kinakaipuhan na mga areglo tangani na makatabang. Bakong posible na magtao nin mga probisyon sa mga kombension para sa espesyal na mga kuarto na madadagosan kan mga may helang huli sa kamugtakan nin palibot o may kontra sa lawas.
22 Kakanon sa Kombension: An kada saro na nag-aatender maninigong magdara nin sadiri niang kakanon imbes na maghale sa pasilidad durante kan halipot na pahingalo sa odto tangani na bumakal sa luwas. Posibleng marhay na supisyente na an simpleng merienda na masustansia asin pasil darahon. An suplemento kan An Satong Ministeryo sa Kahadean na Nobyembre 1995, parapo 27, nagtatao nin nagkapirang ideya kun ano an dadarahon. Dai itinotogot sa mga pasilidad kan kombension an mga lalagan na napapasa asin inomon na de alkohol. Dapat na sadit sana an mga cooler nin kakanon tangani na dai makaolang sa mga pasilyo o tukawan na kataed nindo. An nagkapira sa mga nagdadangog nariparo na nagkakakan asin nag-iinom durante kan programa, alagad ini nagpapaheling nin dai paggalang sa okasyon.
23 Komersial na mga Aktibidad: Bakong tama na aprobetsaran nin siisay man na tugang an dakulang mga kadaklan paagi sa pagpabakal nin mga bagay na siring baga kan mga patos nin libro o T-shirt, abaniko, o kalendaryo na may nakaimprentang tema kan kombension. An lugar kan kombension nagigin sarong dakulang Kingdom Hall na dian mayo nin lugar an komersial na mga aktibidad.
24 Maogmahon nanggad kita na an “Sa Dios na Dalan nin Buhay” na Pandistritong Kombension Ngonyan na 1998-99 mapoon na sa dai mahahaloy! Natapos na daw nindo an saindong mga plano tangani na makaatender? Magin logod harayo sa peligro an saindong biahe asin makapuli kamo na narepreskohan, na determinadong magpadagos sa mahal na marhay na paglilingkod ki Jehova asin padagos na sundon an “sa Dios na dalan nin buhay” para sa saindong daing sagkod na bendisyon.
[Kahon sa pahina 6]
Mga Pagirumdom sa Pandistritong Kombension
▪ Bautismo: An mga kandidato sa bautismo maninigong nasa tukawan na sa sinabing lugar bago pumoon an programa sa Sabadong aga. An kada saro na nagpaplanong magpabautismo maninigong magdara nin mabining pankarigos asin tuwalya. An kamagurangan na nagrerepaso sa mga kandidato sa bautismo kan mga hapot sa librong Our Ministry maninigong siertohon na an kada saro nasasabotan an mga puntong ini. An bautismo bilang simbolo nin pagdusay sarong dayupot asin personal na bagay sa pag-oltanan kan indibiduwal asin ni Jehova. Sa siring, bakong angay para sa mga kandidato na magkurugosan o magkarapotan nin kamot mantang binabautismohan.
▪ Badge Cards: Isulot tabi an 1998 badge card sa gabos na panahon mantang nasa lugar kan kombension asin mantang nagbibiahe paduman asin hale dian. An mga badge card asin holder maninigong kuanon paagi sa saindong kongregasyon, ta an mga iyan dai makukua sa kombension. Girumdomon na darahon an saindong pinakabagong Advance Medical Directive/Release card.
▪ Pagboluntaryo: Makatatagama daw kamo nin panahon sa kombension tangani na tumabang sa saro sa mga departamento? Kun puede kamong tumabang, magreport tabi sa Volunteer Service Department sa kombension. An kaakian na dai pang 16 anyos may marahay man na ikatatabang paagi sa pagtrabaho kaiba nin magurang o iba pang responsableng nasa edad na.
▪ Mga Patanid: Siertohon na an saindong sasakyan barat sa gabos na oras, asin nungkang magwalat nin ano man na naheheling na makasusugot sa saro na manlaog. An mga parahabon asin mandurukot nakasentro kan saindang atension sa darakulang katiriponan. Bakong madonong na magwalat nin ano man na may halaga sa saindong tukawan. Dai kamo makasesegurado na an gabos sa palibot nindo Kristiano. Taano ta matao nin sugot? May naresibing mga report manongod sa mga pagprobar kan nagkapirang taga luwas na akiton an mga aki parayo. ARAMON KUN YAON SAEN AN SAINDONG MGA AKI SA GABOS NA PANAHON.