“Pagtubod sa Tataramon nin Dios” na Pandistritong Kombension Ngonyan na 1997
1 Pinagirumdom ni apostol Pablo si Timoteo na “an gabos na Kasuratan ipinasabong nin Dios.” (2 Tim. 3:16) Huling ipinasabong an Tataramon nin Dios, igwa kita kan gabos na dahelan na gumibo dian nin pagtubod. An tema kan pandistritong kombension ngonyan na taon “Pagtubod sa Tataramon nin Dios.” Pakokosogon kan programa an satong pagtubod sa Biblia, baga man nanodan niato an katotoohan sa dakol nang taon o kita dai pa sana nahahaloy na nakikiiba sa organisasyon ni Jehova. Kita gabos maninigong mag-areglo na umatender sa bilog na programa.
2 Tolong Aldaw na Kombension: Ngonyan na taon iinareglo an tolong aldaw na programa sa pandistritong kombension para sa satong kapakinabangan. An 49 kombension sa Pilipinas nakalista sa poro kan suplementong ini. Sa ngonyan aram na nindo kun arin na kombension an aatenderan kan saindong kongregasyon, asin maninigong nakagibo na kamo nin depinidong mga plano na umatender sa bilog na tolong aldaw kan programa. Dinolok na daw nindo an saindong among tangani na makakua kan kaipuhan na bakasyon?
3 Mapoon an programa sa Biernes asin Sabado sa 8:30 n.a. asin sa Domingo sa 9:00 n.a. Planohon na humale sa harong nin amay pa tangani na makaabot sa lugar kan kombension bago pumoon an programa.
4 Marahay na Magtaong Atension: Pinagirumdom ni apostol Pedro an mga Kristiano kan enot na siglo na marahay na sinda magtaong atension sa makahulang tataramon na siring sa sarong ilawan na nagliliwanag sa sarong madiklom na lugar. (2 Ped. 1:19) Totoo man iyan sa sato. An pamumuhay sa daan na kinaban na ini na kontrolado ni Satanas siring sa pagigin nasa madiklom na lugar. Nagpapasalamat kita na inapod kita paluwas sa espirituwal na kadikloman. (Col. 1:13; 1 Ped. 2:9; 1 Juan 5:19) Tangani na magdanay na nasa liwanag, kaipuhan na papagdanayon niato na makosog an satong pagtubod paagi sa pagtaong atension sa ipinasabong na Tataramon ni Jehova.
5 Tibaad kaipuhan an paghihingoa sa kabtang niato tangani na makakonsentrar kita sa programa kan kombension, alagad siertong bebendisyonan kita sa paggibo kaiyan. Maninigo niatong hingoahon na makaabot sa lugar kan kombension na nakapahingalo nin marhay tangani na magin kitang alisto durante kan mga sesyon. Magtagama nin bastanteng panahon sa pagduman sa lugar kan kombension kada aldaw, tangani na makatukaw na kamo bago pumoon an programa. Dangan umayon sa pambukas na awit asin pamibi sa pagpoon kan programa kada aldaw. Maninigong magtao nin halimbawa an mga adulto, asin maninigong sanayon kan mga magurang an saindang mga aki.—Efe. 6:4.
6 Kun hehelingon niato an mga titulo kan mga kabtang bago pumoon an programa kan aldaw, puede niatong probaran na antisiparon kun anong mga punto an tibaad iaatubang durante kan sesyon na iyan. Dadagdagan kaini an satong interes sa materyal kun iyan iatubang na. Irinekomendar kaidto pa na kumua kita nin haralipot na nota tangani na matabangan kitang magirumdoman an pangenot na mga punto kan programa. Kun makua kita nin kadakol na nota, tibaad maluktosan niato an nagkapirang pangenot na punto huli ta sibot-sibot kita sa pagsurat.
7 Kan nakaaging taon dakol na adulto asin hoben an namasdan giraray na nagraralakawlakaw sa mga pasilyo, nagpapararilibot sa luwas, asin nagdadalaw kaiba kan iba mientras na igwa nin programa, imbes na nagdadangog sa itinao kan “fiel asin madonong na oripon” para sa satong kapakinabangan. Nanuga si Jesus na tatawan kita nin espirituwal na kakanon sa igong panahon. (Mat. 24:45-47) Kun siring, dapat kitang magin presente tangani na makinabang sa kakanon na iyan asin dai magpaheling nin kadaihan nin pag-apresyar. (2 Cor. 6:1) Saka kun garo baga dai napapamugtak an nagkapirang aki, parateng nakikiolay sinda na maduman sa kasilyasan bilang sarahotan sa pagtindog asin paglakawlakaw. Paagi sa tamang pagsasanay sa harong parateng malilikayan an pirmeng pagduman sa kasilyasan. Kun beses, an mas maedad nang mga hoben nagtuturukaw nin grupo-grupo, na nag-eerestoryahan asin naghihiringhingan. An satong mga hoben, na napapaatubang sa dakol na pangigipit ngonyan, kaipuhan na magkonsentrar sa materyal na iinaatubang, na dai naggigibo nin ibang mga bagay durante kan programa. Maninigong likayan an mga horot na konektado sa pagkabarobata na bakong oyon sa mga prinsipyo sa Biblia. (Ikomparar an 2 Timoteo 2:22.) An pagigin atento kan gabos, mga adulto asin hoben, magtataong onra ki Jehova asin magpapagayagaya sa saiya.
8 Kun kinakaipuhan na an saro sa mga attendant magtao nin hatol sa siisay man dapit sa mga bagay na ini, iyan maninigong akoon bilang mamomoton na probisyon hale ki Jehova. (Gal. 6:1) Kaipuhan na girumdomon kan gabos na an dahelan na naghingoa kitang umatender sa kombension iyo na tangani kitang ‘maghinanyog asin makanood.’ (Deut. 31:12) Siring man, “an madonong maghihinanyog asin mag-aako nin dagdag na pakanood.” (Tal. 1:5) Sa natatada pang panahon bago kamo umatender sa kombension, pag-olayan bilang pamilya an pangangaipo na magkataraed na tumukaw kaiba kan mga nagdadangog, na nagdadanay na nakatukaw durante kan programa, asin magin atentong marhay, tanganing makinabang nin lubos sa programa.
9 Samno na Nagpapaogma ki Jehova: An banwaan ni Jehova naheheling kan gabos sa kinaban. (1 Cor. 4:9) Sa pankagabsan midbid kita huli sa satong marahay na pamantayan sa gubing asin pag-alinyar. An pag-aplikar kan Makakasuratan na mga prinsipyo na yaon sa 1 Timoteo 2:9, 10 asin sa 1 Pedro 3:3, 4 nagbunga nin dakulang mga pagbabago sa itsura nin dakol kun ikokomparar sa itsura ninda kan sinda magpoon pa sanang makiasosyar sa Kristianong kongregasyon. Boot niatong magmaan na an satong itsura dai magin siring kan kinaban—na nakasulot nin palaen na gubing, nagpapalakop nin kinabanon na mga uso sa estilo nin buhok, o nakagubing nin bakong mabini. An satong arogan na paggubing asin pag-alinyar maninigong makatabang sa mga bagohan na nag-aatender kan kombension na maheling kun paano dapat na samnohan nin mga Kristiano an saindang sadiri.
10 Minsan ngani paborableng marhay an pankagabsan na nagin impresyon bilang resulta kan mga kombension kan nakaaging taon, an kinabanon na gubing asin pag-alinyar padagos na nagigin problema sa nagkapirang tugang na lalaki asin babae, nangorogna durante kan panahon nin paglilibang. Mga magurang, madonong na bantayan an isusulot kan saindong sadit na mga aki asin tin-edyer. Seguradohon na dai niato tinotogotan an kinabanon na mga estilo asin uso na magkaigwa nin maraot na epekto sa satong Kristianong itsura.
11 Papagdanayon an Marahay na Gawe-Gawe: An marahay na gawe-gawe sarong tanda nin tunay na mga Kristiano. (1 Ped. 2:12) An satong gawe-gawe saen man kita—sa kombension, sa mga restawran, asin sa satong mga dinadagosan, saka kun nagbibiahe—makatatao nin marahay na patotoo asin puedeng magpahiro sa nagkapira na mamidbid si Jehova. (Ikomparar an 1 Pedro 3:1, 2.) May pribilehio kitang pamurawayon an Dios paagi sa satong gawe-gawe. Kun nakareresibi kita nin paborableng mga bareta manongod sa satong gawe-gawe, kita naggagayagaya, bako daw? Minsan siring, may pangangaipo na magdanay na mapagmato tanganing mapreserbar niato an marahay na reputasyon kan banwaan ni Jehova.
12 Dakol na pagirumdom an itinao na dapit sa pagkontrol sa satong mga aki, na dai sinda tinotogotan na magdarodalagan sa mga tinampo sa palibot kan kombension, na nakadidisturbo sa iba. Minsan ngani an mga kombension nagtatao sa sato nin oportunidad na dumalaw asin makiasosyar sa satong mga tugang, dapat pa man giraray na isaisip kan mga magurang an saindang obligasyon na direhiran an saindang mga aki sa gabos na panahon. Ini sarong responsibilidad na itinatao ni Jehova sa lambang magurang. (Tal. 1:8; Efe. 6:4) An dai nadidirehiran na gawe-gawe nin mga aki puedeng makaraot sa marahay na reputasyon na hiningoang marhay na pataluboon kan ibang mga Saksi ni Jehova.—Tal. 29:15.
13 Girumdomon na tama man an pagtao nin tip sa mga restawran kun nag-aako nin personal na serbisyo sa mga serbidor. Bilang Mga Saksi ni Jehova, boot niatong magpaheling nin marahay na ugale sa bagay man na ini.—Helingon an Awake! na Hunyo 22, 1986, pahina 24-7.
14 Pagbayad sa mga Gastos kan Kombension: Kita gabos magkakagastos may koneksion sa pag-atender sa mga kombension. Igwa nin saro pang gastos na marahay na konsideraron niato. Mahal an mga pasilidad na ginagamit para sa mga kombension, nangorogna sa mas darakulang siudad. Igwa man nin iba pang gastos na dapat asikasohon. Inaapresyar na marhay an satong buka an palad na boluntaryong mga donasyon sa mga kombension.—Gibo 20:35; 2 Cor. 9:7, 11, 13.
15 Tukawan: An mga giya na itinao na sa laog nin nagkapirang taon padagos na minaaplikar, arin na baga, AN MGA TUKAWAN IKARERESERBA SANA PARA SA MGA MIEMBRO KAN SAINDONG PAMILYA ASIN SA SIISAY MAN NA KAIBA NINDO SA BIAHE SA SAINDONG SASAKYAN. Marahay na maheling na dakol an nagsusunod sa mga giyang ini sa nakaagi pa sanang mga taon, asin ini nakadagdag sa mamomoton na mga kamugtakan na ipinaheling sa mga kombension. Sa kadaklan na lugar may mga tukawan na mas madaling makua kisa sa iba. Magpaheling tabi nin konsiderasyon, asin iwalat an mas kombenyenteng mga tukawan para sa mga may edad na o maluya an hawak.
16 Mga Camera, Camcorder, Asin Audiocassette Recorder: Puedeng gumamit nin mga camera asin kasangkapan sa pagrekord sa mga kombension. Minsan siring, an satong paggamit kaiyan dai dapat na makadisturbo sa ibang nag-aatender. Maninigo na dai kita magparalakawlakaw durante kan mga sesyon na nagreretrato, huling iyan makadidisturbo sa iba na naghihingoang makapagkonsentrar sa programa. Mayo nin ano man na klase nin aparato sa pagrekord na itatakod sa mga saksakan nin koryente o sound system, ni an kasangkapan na ini maninigo man na makaolang sa mga agihan, pasilyo, o pagheling nin iba.
17 First Aid: An Departamento kan First Aid para sana sa mga emerhensia. Dai iyan makaaataman sa mga may pabalikbalik na helang. Iyan an dahelan kun taano ta maninigo nindong isipon nin patienot an mga pangangaipo sa salud nindo mismo asin kan saindong pamilya. Magdara tabi nin sadiri nindong aspirin, mga bolong sa panunaw, benda, imperdible, asin mga kaagid kaiyan, huling an siring na mga bagay dai makukua sa kombension. An siisay man na midbid na pirmeng inaatake, may helang sa puso, asin iba pa, maninigong antisiparon an saindang mga pangangaipo sagkod sa mapupuede. Maninigo sindang igwa kan kinakaipuhan na bolong, asin an sarong miembro kan pamilya o kan kongregasyon na nakasasabot kan saindang situwasyon maninigong yaon duman kaiba ninda sa gabos na panahon tangani na makatao nin ano man na kaipuhan na tabang. Kun an nagkapira na may espesyal na mga pangangaipo sa salud mayo nin mga miembro sa pamilya na makatatabang sa sainda, an saindang mga magurang sa kongregasyon kaipuhan na gumibo nin kinakaipuhan na mga areglo tangani na makatabang. Mayong probisyon na gigibohon sa mga kombension para sa espesyal na mga kuarto na madadagosan nin mga may maraot sa lawas.
18 Kakanon sa Kombension: An dai pagkaigwa nin ipupuestong kakanon sa mga kombension nakatabang sa dakol pang nakakaatender sa gabos na sesyon na makakonsentrar sa espirituwal na kakanon. Nakaresibi na nin nagkapirang kapahayagan nin apresasyon para sa pagpasimpleng ini poon pa kan ponan an areglo. An gabos maninigong magplano na magdara nin sadiri nindang kakanon para sa pahingalo sa odto, siring baga kan mga isinuherir sa suplemento kan An Satong Ministeryo sa Kahadean na Mayo 1995, parapo 11-14. Mayo nin mga lalagan na napapasa asin mayo nin mga inomon na de alkohol na dadarahon sa laog kan pasilidad kan kombension. Dapat na sadit sana an mga cooler nin kakanon tangani na dai makaolang sa mga pasilyo asin dai maninigong ibugtak sa ibabaw kan mga tukawan. An nagkapira sa mga nagdadangog nariparo na nagkakakan asin nag-iinom durante kan programa. Mayong paggalang an paggibo kaini. Sa mga lugar na igwa nin mga paratinda sa luwas kan pasilidad kan kombension, nariparo na an nagkapirang tugang sinusuportaran ini durante kan programa. Bakong tama an siring na gibo.
19 Tunay na inaapresyar niato an satong espirituwal na bangkete asin an pamugtak an boot, matoninong na mga pakikiasosyar durante kan satong halipot na mga pahingalo sa odto. Bilang pagsunod sa katuyohan kan areglong ini, imbes na humale sa pasilidad sa pahingalo sa odto tangani na bumakal nin kakanon, magbalon na tabi kamo. Sa siring, magkakaigwa kamo nin mas dakol na panahon na makiasosyar sa saindong mga tugang na lalaki asin babae.
20 Komersial na mga Aktibidad: Bakong tama na aprobetsaran nin siisay man na tugang an dakulang mga kadaklan paagi sa pagpabakal nin mga bagay, siring baga kan mga patos nin libro o T-shirt, abaniko, asin mga kalendaryo na may nakaimprentang tema kan kombension. An lugar kan kombension nagigin sarong dakulang Kingdom Hall na dian mayo nin lugar an komersial na mga aktibidad.
21 Maogmahon kita na an “Pagtubod sa Tataramon nin Dios” na Pandistritong mga Kombension mapoon na sa dai mahahaloy! Boot niato gabos na makasegurado na nagibo ta na an mga pag-andam na umatender sa bilog na programa, tanganing makamtan niato nin lubos an marahay na espirituwal na bangkete na inandam ni Jehova para sa sato paagi sa saiyang organisasyon. Paagi kaiyan kita magigin “andam nanggad para sa lambang marahay na gibo” sa maabot na mga aldaw.—2 Tim. 3:17.
[Kahon sa pahina 6]
Mga Pagirumdom sa Pandistritong Kombension
Bautismo: An mga kandidato sa bautismo maninigong nasa tukawan na ninda sa sinabing lugar bago pumoon an programa sa Sabadong aga. An mabining pankarigos asin tuwalya maninigong darahon kan kada saro na nagpaplanong magpabautismo. An mga magurang sa kongregasyon na nagrerepaso sa mga kandidato sa bautismo kan mga hapot sa librong Our Ministry maninigong siertohon na an kada saro nasasabotan an mga puntong ini. An bautismo bilang simbolo nin pagdusay sarong dayupot asin personal na bagay sa pag-oltanan kan indibiduwal asin ni Jehova. Sa siring, bakong tama na an mga kandidato magkurugosan o magkarapotan nin kamot mantang binabautismohan.
Badge Cards: Isulot tabi an 1997 badge card sa gabos na panahon mantang nasa siudad nin kombension asin mantang nagbibiahe paduman asin hale dian. An mga badge card asin holder maninigong kuanon paagi sa saindong kongregasyon, mantang an mga iyan dai makukua sa kombension. Girumdomon na darahon an saindong pinakabagong Advance Medical Directive/Release card.
Pagboluntaryo: Makatatagama daw kamo nin panahon sa kombension tangani na tumabang sa saro sa mga departamento? Kun puede kamong tumabang, magreport tabi sa Volunteer Service Department sa kombension. An kaakian na dai pang 16 anyos puede man na makatabang paagi sa pagtrabaho na ginigiyahan nin magurang o iba pang responsableng adulto.
Mga Patanid: Magdanay na alisto sa potensial na mga problema tanganing malikayan an dai kaipuhan na kadepisilan. Sa parate binibiktima kan mga parahabon an mga tawong mayo sa sadiri nindang lugar. Siertohon na an saindong sasakyan barat sa gabos na oras, asin nungkang magwalat nin ano man na naheheling na makasusugot sa saro na manlaog. Bakong madonong na magwalat nin ano man na may halaga sa saindong tukawan. Dai kamo makasesegurado na an gabos sa palibot nindo Kristiano. Taano ta matao nin sugot? Naresibi an mga report manongod sa mga pagprobar kan nagkapirang tagaluwas na akiton an mga aki parayo. ARAMON KUN YAON SAEN AN SAINDONG MGA AKI SA GABOS NA PANAHON.