“Iriba Niatong Ilangkaw an Saiyang Ngaran”
1. Magkakaigwa kita nin anong oportunidad na iribang ilangkaw an ngaran nin Dios, asin ano an puede niatong gibohon ngonyan bilang pag-andam?
1 “O pakadakulaa nindo si Jehova sa kaibanan ko, . . . asin iriba niatong ilangkaw an saiyang ngaran,” an awit kan salmista. (Sal. 34:3) An nagdadangadang niatong “Maglakaw sa Kaibanan nin Dios” na Pandistritong Kombension matao sa sato nin oportunidad na iribang ilangkaw an ngaran ni Jehova kaiba kan satong mga tugang na lalaki asin babae hale sa dakol na kongregasyon. Naggibo na daw kamo nin mga areglo nindo para sa dadagosan, transportasyon, asin bakasyon sa sekular na trabaho? Madonong na asikasohon niato ini nin amay pang marhay.—Tal. 21:5.
2. Taano ta kapakipakinabang na planohon an pag-abot nin amay sa lugar kan kombension?
2 Pag-abot sa Lugar kan Kombension: An paghale nin amay makakatabang sa sato na atubangon an dai linalaoman na mga pagkaatraso asin mapangyari sa sato na makakua nin tukawan nin tama sa oras tangani na makikabtang nin bilog na puso sa pambukas na awit asin pamibi. (Sal. 69:30) Pirang minuto bago magpoon an sesyon, matukaw na an tsirman sa plataporma mientras na pinapatugtog an pambukas na pan-Kahadean na musika. Kita gabos maninigong tumukaw na sa panahon na iyan tangani na makapoon an programa sa aregladong paagi.—1 Cor. 14:33, 40.
3. Paano niato ikakapaheling an konsiderasyon sa iba kun naghahanap nin tukawan?
3 Sinasadol kita kan Tataramon nin Dios na ‘an gabos logod niatong gibo mangyari sa pagkamoot.’ (1 Cor. 16:14) Kun enot kitang mag-abot sa lugar kan kombension, an konsiderasyon sa iba mapogol sa sato na magdalagan, maghidali, mantulod, o manuklang sa paghihingoa na maenot sa tukawan na gusto niato bago iyan makua kan iba. Puedeng magreserba nin tukawan para sana sa mga kaibanan nindo sa lunadan o kaibanan nindo sa harong.—1 Cor. 13:5; Fil. 2:4.
4. Ano an mga areglo para sa pahingalo sa udto, asin paano ini kapakipakinabang?
4 Magdara tabi nin pangudtohan imbes na humale sa lugar kan kombension tanganing bumakal nin pagkakan durante kan pahingalo sa udto. Matogot ini sa gabos na magkaigwa nin nakakaparigon na asosasyon asin magin presente sa pagpoon mismo kan sesyon sa hapon. Kun kaipuhan, puedeng gumamit nin sadit na cooler na puedeng ibugtak sa irarom kan tukawan. Dai itinotogot sa pasilidad kan kombension an darakulang picnic cooler, mga lalagan na napapasa, asin mga inomon na de alkohol.
5. Paano kita ‘magibo kan marahay’ sa mga may edad na asin maluya an hawak?
5 Sa satong mga kombension, naggigibo nin mga paghihingoa na mag-areglo nin espesyal na mga tukawan para sa mga may edad na o maluya an hawak. Pinagirumdom ni apostol Pablo an mga kongregasyon sa Galacia na ‘gumibo kan marahay sa gabos, alagad orog na sa mga may relasyon sa sainda sa pagtubod.’ (Gal. 6:10) An mga tugang na lalaki asin babae na may edad na o maluya an hawak, nagsosolong mga magurang, o an mga nasa pambilog na panahon na paglilingkod tibaad dai humagad nin tabang saindo, alagad tibaad igwa sinda nin mga kadepisilan na dapat pangganahan tanganing makaabot sa kombension. Nasa kamugtakan daw kamong ‘gumibo kan marahay’ sa sainda asin magtao nin tabang?
6. Paano niato aandamon an satong puso para sa pagtotokdo na aakoon niato?
6 May Naghahalat sa Sato na Espirituwal na Bangkete: Si Hadeng Josafat saro sa ‘nag-andam kan saiyang puso na hanapon an tunay na Dios.’ (2 Cron. 19:3) Paano niato aandamon an satong puso bago an kombension? An mga artikulo sa likod na pahina kan mga isyu kan Awake! na Mayo 22 asin Hunyo 8 nagtatao nin preliminaryong paheling manongod sa itataong espirituwal na bangkete. Taano ta dai gumamit nin panahon na horophoropon an mga artikulong iyan, na nagpapatalubo nin pag-antisipar sa itinagama ni Jehova para sa sato? Kalabot man sa pag-andam kan satong puso an paghagad ki Jehova na tabangan kitang masabotan an pagtotokdo na aakoon niato asin iaplikar iyan.—Sal. 25:4, 5.
7. Ano an satong pagmawot, asin taano?
7 Kita gabos nagmamawot na makanood nin orog pa gikan sa Tataramon nin Dios, na narerealisar na paagi kaiyan puede kitang tumalubo pasiring sa kaligtasan. (1 Ped. 2:2) Huli kaini, umatender logod kita sa satong “Maglakaw sa Kaibanan nin Dios” na Pandistritong Kombension asin ‘iribang ilangkaw an ngaran ni Jehova.’—Sal. 34:3.
[Kahon sa pahina 3]
Mga Paagi na Ilangkaw an Ngaran nin Dios
◼ Pagplano nin amay
◼ Magpaheling nin pagkamoot sa iba
◼ Andamon an saindong puso