Magin Atento sa Sagradong mga Tataramon
1 Bakong gabos na sinasabi nin tawo maninigo na tawan nin espesyal na atension. Alagad kun an Dios an nagtataram, may mahalagang marhay na dahelan na maghinanyog. (Deut. 28:1, 2) Marahay sana ta an pinasabngan na mga parasurat irinekord an “sagradong mga tataramon nin Dios” para sa satong kapakinabangan. (Roma 3:2) An nagdadangadang na pandistritong kombension matao nin mahalagang marhay na mga oportunidad tangani na madangog an mga tataramon na ini mantang iyan binabasa asin ipinaliliwanag. Paano kamo nangorognang magigin atento?
2 Umabot nin Amay Kada Aga: Imahinara an kaogmahan kan mga Israelita kan sinda sabihan na tagboon si Jehova sa Bukid nin Sinai tangani na madangog an saiyang Ley! (Ex. 19:10, 11, 16-19) Kun igwa kamo nin kaagid na aktitud dapit sa pag-ako nin pagtotokdo ki Jehova sa pandistritong kombension, magibo kamo nin mga areglo na umabot nin amay kada aldaw. Dai niato madadangog an bilog na programa kun kita maabot nin huri asin makadidisturbo sa iba sa satong paghihingoang humanap nin tukawan.
3 An nagkapira pa ngani na minaabot nin amay mayo pa sa saindang tukawan sa pagpoon kan sesyon. Taano daw ta arog kaini? Hinahalat ninda sagkod na iintrodusir kan tsirman an pambukas na awit bago sinda pumondo sa pakikipag-olay sa mga katood asin pumoon na dumuman sa saindang tukawan. Maninigo niatong mangnohon na pirang minuto bago an pambukas na awit kan kada sesyon, an tsirman matukaw na sa plataporma mientras na pinatutugtog an enot na awit na pan-Kahadean. Ini an senyal niato na oras nang tumukaw! Dangan, kun ipakanta na an pambukas na awit, kita andam nang umayon sa pag-awit nin mga pag-omaw ki Jehova.
4 Maghinanyog Bilang Nagkakasararong Pamilya: Kan binabasa an sagradong mga tataramon sa nagkakatiripon na mga Israelita, an mga pamilya, kaiba an “saradit,” kaipuhan na maghinanyog asin makanood. (Deut. 31:12) Sa satong mga kombension, maninigo na an mga aki dai ‘pagpabayaan.’ (Tal. 29:15) Mga magurang, areglaron nindo na magtaraed an bilog nindong pamilya—kaiba an mga tinedyer. May mga magurang na naghahalat pa sa pambukas na awit tangani na darahon sa kasilyasan an saindang sadit na mga aki. Minsan siring, dai nanggad kaini ikatotokdo sa mga aki an dakulang importansia nin mga awit asin pamibi sa satong pagsamba. Mas marahay nanggad na asikasohon na an mga pangangaipo para sa kasilyasan bago pumoon an kada sesyon kun posible man sana!
5 Makakatabang sa sato na maghinanyog kun kita may bastanteng pahingalo kada banggi asin likayan an pagkakan nin dakol durante kan aldaw. Magkonsentrar sa sinasabi kan espiker. Dai pagtogotan na maglagawlagaw an saindong isip. Sundan sa Biblia kun binabasa an mga teksto. Kumua nin halipot na mga nota. Mantang itinatao an lambang pahayag, repasohon sa isip nindo an sinabi kan espiker, asin pensaron kun paano nindo iaaplikar an materyal. Sa katapusan kan aldaw, pag-olayan an programa bilang pamilya. Anong mga punto an nagustohan kan balang saro? Paano marahay na magagamit kan saindong pamilya an impormasyon na ini?
6 Ipaheling an Paggalang sa Tataramon nin Dios: An mga kombension nagtatao sa sato nin marahay na oportunidad na makaolay an mga katood asin mag-ogma sa nakaparirigon na pakikiasosyar. Paagi sa pag-abot nin amay, magkakapanahon kitang makipag-olay bago pumoon an programa. Pero may nagkapira na nakikipag-olay durante kan programa, na salang iniisip na ini daing gayo nakadidisturbo sa sarong dakulang auditoryum. Dawa kun an mga pagtiripon ginigibo sa sarong dakulang lugar, iyan panahon na maghinanyog arog man sana kun nag-aatender sa pagtiripon sa Kingdom Hall. An paggamit nin mga cellular phone, pager, camcorder, asin kamera maninigong dai pagtogotan na makadisturbo durante kan programa.
7 Mantang inaako ni Moises an Ley hale ki Jehova, “dai sia nagkakan nin tinapay asin dai sia nag-inom nin tubig.” (Ex. 34:28) Kaagid kaiyan, bakong tama na magkakan o mag-inom mientras na may sesyon sa kombension. Apuera kun igwa nin grabeng problema sa salud, maghalat sagkod sa “itinalaan na panahon” para digdi.—Ecl. 3:1.
8 Sa nagkapirang kombension, padagos na may problema sa dakol na tugang na lalaki asin babae patin sadit na mga aki na nagpaparalakawlakaw sa mga agihan durante kan mga sesyon. Tatawan nin instruksion an mga attendant na sabihan an mga siring na bumalik sa auditoryum. An mga boluntaryo na nagtatrabaho sa manlaenlaen na departamento maninigong nakatukaw kaiba kan mga nagdadangog sa pinakamadaling panahon na matapos an saindang gibohon. Apuera kun an mga boluntaryo iinasignar sa kinakaipuhan na gibohon durante kan mga sesyon, maninigo na sinda nakatukaw, na naghihinanyog sa programa. Maninigo na sinda dai mag-istambay sa mga departamento, na nagsosongko sa iba mientras na may programa.
9 Dai niato noarin man bobooton na magin ‘mangurol sa satong pagdangog’ kun naghihinanyog sa Tataramon nin Dios. (Heb. 5:11) Magin kitang desidido kun siring na magpaheling nin maninigong paggalang paagi sa paghinanyog nin atento mantang ipinaliliwanag an sagradong mga tataramon hale ki Jehova sa satong nagdadangadang na pandistritong kombension.