Pagpalista sa Teokratikong Paadalan sa Pagmiministro
1 An Teokratikong Paadalan sa Pagmiministro nakapagsanay na nin minilyon na Saksi ni Jehova bilang mga ministro. Dakol sa sato an nakagigirumdom kun gurano kita kahandal kan magpalista kita kan enot sa paadalan na ini, asin ngonyan dakula an pasasalamat niato sa kabtang kaiyan sa satong espirituwal na pag-oswag bilang mga paratokdo kan Tataramon nin Dios. (Ikomparar an Gibo 4:13.) Nakapalista na daw kamo sa pambihirang paadalan na ini?
2 Siisay an puedeng magpalista? An pahina 73 kan Organized to Accomplish Our Ministry minasimbag: “An gabos na aktibong nakikiasosyar sa kongregasyon puedeng magpalista, kabale an mga tawong bago pa sanang nag-aatender sa mga pagtiripon, basta dai sinda namumuhay na bakong oyon sa Kristianong mga prinsipyo.” Iniimbitaran niamo an gabos na kualipikado na dumolok sa paraataman sa paadalan asin magpalista.
3 Programa kan Paadalan Para sa 1997: An programa kan Teokratikong Paadalan sa Pagmiministro para sa 1997 kinokobrehan an manlaenlaen na katokdoan asin personahe sa Biblia, siring man an kasaysayan kan organisasyon. Dugang pa sa pagpaoswag kan satong mga abilidad sa pagtaram asin pagtokdo, nakanonood kita sa dakol na espirituwal na tampok na nanonompongan sa leksion kaiyan kada semana. (Tal. 9:9) Kun nag-aandam kita para sa paadalan, na kaiba an pagbasa kan semanal na babasahon sa Biblia, asin regular kita sa pag-atender, makakukua kita nin dakulang espirituwal na pakinabang sa programa.
4 Para sa 1997 an kadaklan sa mga pagbasa sa Biblia sa Asignasyon Num. 2 mas halipot kisa kan nakaaging mga taon. Kun nag-aandam kaini, maninigong maingat na orasan kan estudyante an saiyang pagbasa dangan determinaran kun gurano kadakol sa itinalaan na limang minuto an puedeng gamiton para sa introduksion asin konklusyon. Totogotan kaini an estudyante na lubos na gamiton an saiyang oras asin paoswagon kapwa an saiyang abilidad sa pagbasa asin an kakayahan sa pagtaram nin ekstemporanyo.—1 Tim. 4:13.
5 Idinugang an impormal na pagpatotoo na puedeng eksena para sa mga presentasyon sa Asignasyon Num. 3, na basado sa librong Kaaraman. Huli kaini, puedeng pumili an sarong tugang na babae magsalang nin pagdalaw liwat, pag-adal sa Biblia sa harong, o impormal na pagpatotoo bilang eksena para sa asignasyon na ini.
6 Baga man may pribilehio kamong magtao kan pahayag na nagtotokdo, mga tampok na kabtang sa Biblia, o nin asignasyon para sa estudyante, ikapaheheling nindo an saindong pagpahalaga paagi sa pag-andam asin pag-ensayong marhay kan saindong kabtang, paagi sa pag-atubang kaiyan na may kombiksion asin entusiasmo, paagi sa dai pagsobra sa oras, paagi sa paghinanyog sa asin pag-aplikar kan konseho kan paraataman sa paadalan, asin paagi sa perming fiel na paggibo kan saindong asignasyon. Sa siring an pagpalista nindo sa paadalan magigin bendisyon kapwa para sa saindo asin para sa gabos na maghihinanyog sa saindo.