Magin Marahay na Kapartner sa May Pinto

1. Paano kita nakikinabang sa paghuhulit na may kapartner sa ministeryo?

¹ Sa sarong pangyayari, nagsugo si Jesus nin 70 disipulo tanganing maghulit, asin ‘isinugo nia sinda nin manduwaduwa.’ (Luc. 10:1) Daing duda na an areglong ini nagtaong lugar sa saiyang mga disipulo na magtinarabangan asin magparinigonan mantang sinda naghuhulit. Kun iniibanan niato an ibang parahayag sa ministeryo, paano kita puedeng makatabang?

2. Kun an satong kapartner an nakikipag-olay, paano asin taano ta kita maninigong maghinanyog?

² Paagi sa Paghinanyog: Atentong maghinanyog mantang nakikipag-olay an saindong kapartner. (Sant. 1:19) Kun binabasa an sarong teksto, sundan iyan sa saindong Biblia. Magheling sa nagtataram, baga man iyan an kapartner nindo o an kagharong. Kun kamo naghihinanyog nin maingat sa pag-orolay, puedeng madagka kaini an kagharong na maghinanyog man.

3. Noarin puedeng ikaogma kan satong kapartner an satong pagtaram?

³ Paagi sa Pagrisa Kun Noarin Mataram: Kun an kaiba niato an nakikipag-olay, tinatawan niato sia nin dignidad kun papabayaan niato na sia an magtaram. (Roma 12:10) Maninigo na likayan niato na magsaliot. Kun malingawan nia an gusto niang sabihon o kun magbangon nin pagkontra o hapot an kagharong asin maghagad nin tabang an satong kapartner, hihingoahon niatong dugangan an paliwanag kan satong kapartner imbes na mag-introdusir nin bagong tema. (Tal. 16:23; Ecl. 3:1, 7) Kun kita magtaram, an satong mga sasabihon maninigong makadugang sa itinataong patotoo.—1 Cor. 14:8.

4. Ano an makakadugang sa satong kagayagayahan asin kapangganahan sa ministeryo?

⁴ Pagkatapos maghulit an 35 padis nin disipulo, sinda “nagbuelta na may kagayagayahan.” (Luc. 10:17) Magkakaigwa man kita nin kagayagayahan asin kapangganahan sa ministeryo mantang kita naghihinanyog saka nagririsa kun noarin mataram sa pagtabang niato sa satong kaibanan sa may pinto.