Gumibo nin Marahay Asin Maghiras sa Iba

¹ Si Dorcas “pano nin marahay na mga gibo asin mga balaog nin pagkaherak.” (Gibo 9:36, 39) Huli sa saiyang aktitud na pagigin matinao napamahal sia sa mga nakakamidbid sa saiya sagkod ki Jehova Dios. An Hebreo 13:16 nagsasabi: “Dai nindo paglingawan an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.” Paano kita makakagibo nin marahay asin makakahiras sa iba ngonyan?

² An sarong paagi na makikinabang sa sato an iba iyo an paghiras kan satong “mahahalagang bagay.” (Tal. 3:9) An satong mga donasyon sa pambilog na kinaban na gibohon pinagigin posible an pagtogdok nin mga Kingdom Hall, mga Assembly Hall, asin mga pasilidad kan sangang opisina sa bilog na kinaban. An satong pagigin buka an palad nagpangyari sa minilyon na makinabang sa teokratikong pagtotokdo asin nakakaparigon na espirituwal na asosasyon.

³ Pagtao nin Karangahan: Kun may kalamidad, andam an banwaan ni Jehova na ‘gumibo kan marahay’ sa mga kapagtubod siring man sa mga bako niatong kapagtubod. (Gal. 6:10) Kasunod kan pagputok sa sarong planta nin kemikal sa Pransia, an sarong mag-agom na nag-iistar sa kataed kan planta nagsabi: “An satong Kristianong mga tugang nagdatong tolos-tolos tangani na tumabang sa paglinig kan apartment niamo saka kan iba pang nasa edipisyo. An samong mga kataed nagngalas na marhay na maheling an kadakol na tawo na nagdatong tangani na tumabang.” An saro pang tugang na babae nagsabi: “Dinamayan kami kan kamagurangan. Nagdatong sinda tangani na parigonon an boot niamo. Sa katunayan, ini an kaipuhan niamo, orog pa kisa materyal na tabang.”

⁴ Minsan ngani dakol nin paagi na kita makakagibo nin marahay sa satong mga kataed, an pinakakapakipakinabang na paagi na makakatabang kita sa sainda iyo an paghiras kan mahalagang marhay na kaaraman manongod sa katotoohan, na kaiba an “paglaom sa buhay na daing katapusan” na ipinanuga ni Jehova mismo. (Tito 1:1, 2) An mensahe kan Biblia nagtatao nin tunay na karangahan sa mga nagmomondo huli sa mga kamugtakan sa kinaban asin sa sainda mismong makasalan na kamugtakan. (Mat. 5:4) Logod na gumibo kita nin marahay asin maghiras sa iba kun nasa kapangyarihan kan satong kamot na gibohon iyan.—Tal. 3:27.