“Magin Matinao, Andam na Manhiras”
1 Kaidtong mga siglo na an nakaagi ininstruksionan ni apostol Pablo si Timoteo na enkaminaron an mga kapagtubod ‘na maggibo nin marahay, magin mayaman sa marahay na mga gibo, magin matinao, andam na manhiras.’ (1 Tim. 6:18) Pinagirumdom man ni Pablo an mga Kristianong Hebreo na dai paglingawan “an paggibo nin marahay asin an paghiras nin mga bagay sa iba.” (Heb. 13:16) Taano ta isinurat nia an mga instruksion na ini? Huli ta aram nia na magkakaigwa nin “kamurawayan asin onra patin katoninongan para sa gabos na naggigibo nin marahay.”—Roma 2:10.
2 Huli sa saiyang pagigin Kaglalang, si Jehova Dios an Kagsadiri kan gabos na bagay. (Kap. 4:11) Tunay nanggad na inaapresyar niato an saiyang ginigibo para sa sato paagi sa saiyang mga rogaring. Sa ibong kan ingratong aktitud kan kadaklan sa katawohan, an gabos padagos na tinotogotan kan Kaharohalangkawe na makinabang sa saiyang dakol na probisyon para sa pagsustenir sa buhay. (Mat. 5:45) Itinao pa ngani nia an saiyang pinakamamahal na Aki bilang sarong atang tanganing kita magkaigwa nin buhay na daing katapusan. Bako daw na an pagkamoot na ipinaheling sa sato maninigo na magpahiro sa sato na patunayan na kita mapagpasalamat paagi sa pagigin matinao sa mga kapwa tawo?—2 Cor. 5:14, 15.
3 Ano an Puede Niatong Ihiras? Tama sanang gamiton niato an ano man na mahahalagang bagay niato sa paagi na nakaoogma sa pagheling nin Dios. Seguradong boot niatong suportaran an gibong pan-Kahadean sa bilog na kinaban sa materyal asin espirituwal na paagi. Siempre, an maogmang bareta an pinakamahalagang kayamanan na puedeng magkaigwa an siisay man, huli ta iyan an “kapangyarihan nin Dios para sa kaligtasan.” (Roma 1:16) Paagi sa lubos na paggamit kan satong panahon asin kuarta lambang bulan sa pakikikabtang sa paghuhulit asin pagtotokdo, mahihimo niatong ikahiras sa iba an espirituwal na kayamanan na ini, na magiya sa saindang pagkamit nin buhay na daing katapusan.
4 Naoogmang marhay si Jehova kun tinatabangan niato an mga tikapo sa kabuhayan. Sia may ipinanunugang mga bendisyon, asin pinagigirumdom man nia kita: “An mahahalagang bagay magigin daing kamanungdanan sa aldaw nin kabangisan, alagad an katanosan mismo magliligtas hale sa kagadanan.” (Tal. 11:4; 19:17) An pagsuportar sa gibong pan-Kahadean sa materyal na paagi asin an lubos na pakikikabtang sa paghuhulit kan maogmang bareta marahayon na mga paagi na ikapaheheling niato na kita talagang matinao, andam na manhiras.