“Magin Mayaman sa Marahay na mga Gibo”

¹ Durante kan huring mga taon kan saiyang maigot na ministeryo, si apostol Pablo dayupot na nakiibaiba ki Timoteo asin Tito. Sa kada saro sa sainda, nagsurat sia nin magkaagid na mga tataramon nin pagparigon sa boot. Sinabihan nia si Tito na “an mga nagturubod sa Dios” kaipuhan na “danay na isipon an pagpapadanay sa marahay na mga gibo.” (Tito 3:8) Sinabihan nia si Timoteo na an mga ibinubugtak an saindang paglaom sa Dios maninigong “magin mayaman sa marahay na mga gibo.” (1 Tim. 6:​17, 18) Ini marahayon na sadol para sa sato gabos! Alagad ano an mamotibar sa sato na gibohon an marahay na mga gibo sa satong buhay? Asin anong espesipikong mga gibo an puede niatong gibohon sa maabot na mga aldaw?

² An motibasyon tangani na magin mayaman sa marahay na mga gibo naggigikan sa satong pagtubod asin pagkamoot ki Jehova asin sa satong makangangalas na paglaom na itinao nia sa sato. (1 Tim. 6:19; Tito 2:11) Nangorogna sa panahon na ini kan taon, ipinagigirumdom sa sato na sinugo ni Jehova an saiyang Aki sa daga tangani na ibindikar ni Jesus an saiyang Ama asin buksan an dalan pasiring sa buhay para sa mga tawong maninigo. (Mat. 20:28; Juan 3:16) Ini magigin klarong marhay sa selebrasyon kan Memorial kan kagadanan ni Cristo sa Marso 28. Bilang paghimate sa paglaom niato na magkamit nin buhay na daing katapusan, dai daw kita namomotibar na gibohon an bilog niatong makakaya na “magin mayaman sa marahay na mga gibo”? Siempre iyo! Anong mga gibo an puede niatong gibohon ngonyan?

³ Marahay na mga Gibo sa Marso Asin Lampas Pa: Sierto nanggad, maatender kita sa Memorial​—an pinakamahalagang okasyon kan taon para sa Mga Saksi ni Jehova sa bilog na kinaban. (Luc. 22:19) Alagad mawot niatong ihiras an kagayagayahan kan okasyon na iyan sa pinakadakol na mapupuede. Helinga an report nin paglilingkod sa 2002 Yearbook, asin maheheling nindo na kan nakaaging taon sa dakol na nasyon sa bilog na daga, an nag-atender sa Memorial tolo, apat, limang doble, o labi pa, kan kabilangan kan mga parahayag. Seguradong kinaipuhan an mahigos na paghihingoa sa kabtang kan gabos sa kongregasyon tangani na mahiwas na ikadistribwir an mga imbitasyon sa Memorial sa bilog nindang teritoryo. Kun siring, mamawoton niato na gamiton an pinakadakol na panahon na kaya niato poon ngonyan sagkod na umabot an Marso 28 sa pag-imbitar sa mga tawo sa Memorial, na tinatabangan sinda na manodan an manongod sa paglaom sa kaligtasan.

⁴ Sa parate marahay an panahon asin nasa bakasyon an mga nag-eeskuela kun Abril. Paano niato epektibong magagamit an paborableng mga sirkunstansiang ini tangani na magin “mayaman sa marahay na mga gibo”? Paagi sa padagos na entusiastikong pakikikabtang sa paghuhulit kan maogmang bareta, na “maigot sa marahay na mga gibo.” (Tito 2:14; Mat. 24:14) Kun dai kamo makapag-aauxiliary payunir sa Marso, magigibo daw nindo iyan sa Abril asin/o Mayo? Kun kamo nagpapayunir sa Marso, makapagpapadagos daw kamo?

⁵ An nagkapira na may sekular na trabaho nakanompong na kaya nindang gumamit nin mga sarong oras sa paglilingkod mantang pasiring sa trabaho, na naghuhulit sa tinampo o nagsosongko sa mga tawong nagtatrabaho sa mga negosyong bukas na sa amay na aga. An iba iiniiskedyul an kabtang kan saindang oras nin pangodto sa pagpapatotoo. An nagkapira nakanompong na posibleng magkondukta nin pag-adal sa Biblia durante kan peryodong iyan sa sarong kapwa trabahador. An dakol na tugang na ina nin pamilya nahimong magtagama nin panahon para sa ministeryo sa langtad mantang nasa eskuelahan an saindang mga aki. Paagi sa pagmatang mas amay pa sa nagkapirang aldaw tanganing asikasohon an saindang mga trabaho sa harong, nagkakaigwa sinda nin mas dakol na panahon durante kan aldaw para sa paghuhulit asin pagtotokdo.​—Efe. 5:​15, 16.

⁶ Dawa kun kamo mayo sa kamugtakan na makapag-auxiliary payunir, tibaad ikaareglo nindo an sarong personal na iskedyul na magkaigwa nin orog na pakikikabtang sa ministeryo, na ginigibo an bilog nindong makakaya na “maggibo nin marahay, magin mayaman sa marahay na mga gibo, magin matinao, andam na manhiras” kan katotoohan sa iba.​—1 Tim. 6:18.

⁷ Girumdomon an Marahay na Gibo na Paggibo nin Disipulo: Kada taon may interesadong mga tawo na nag-aatender sa Memorial. Posible daw para sa nagkapira sa kongregasyon na magtao nin atension sa mga nag-aatender alagad dai pa nag-aadal ngonyan? Puede daw sindang dalawon liwat sa katuyohan na tabangan sindang mag-oswag sa espirituwal? Tibaad an nagkapira sa mga nag-aatender na ini sa Memorial mga paryente nin mga Saksi. An iba tibaad mga indibiduwal na nag-adal na kaidto asin nangangaipo sana nin pagparigon sa boot tangani na ipadagos an pag-aadal asin mag-atender sa mga pagtiripon nin regular. Kanigoan na kagayagayahan an ibubunga na maheling niato sinda na magin aktibong mga lingkod ni Jehova kaiba niato!

⁸ Huli sa dinagdagan na pakikikabtang sa ministeryo durante kan Marso asin lampas pa, posibleng marhay na makakanompong kita nin mas dakol na tawong interesado na babalikan. Walatan sinda nin sarong hapot. Dangan sabihon na itatao nindo an simbag sa sunod na pagdalaw. Kun ginigibo niato ini, aandamon kaini an dalan para sa pagdalaw liwat. Kun mas amay niatong gibohon an pagdalaw liwat, mas marahay. Kun dai niato naponan an sarong pag-adal sa enot na pagdalaw, mawot niato na hingoahon na maponan iyan sa masunod mismong pagdalaw kun posible.

⁹ Kun kita naghuhulit sa tinampo, maninigo kitang magin listo sa paghingoang magpoon nin mga pakikipag-olay sa mga tawo. An dakol na parahayag tinawan nin mga ngaran, adres, asin numero nin telepono kan mga tawong interesado na nanuparan ninda mantang naghuhulit sa tinampo. Kun an indibiduwal na nakaolay dai nag-iistar sa saindong teritoryo, kumua nin Please Follow Up (S-43) na porma sa Kingdom Hall, llenaran iyan, asin itao iyan sa sekretaryo kan kongregasyon, na mapadara kaiyan sa kongregasyon na an teritoryo iyong nakasasakop sa iniistaran kan indibiduwal. Kun iyan dai mahihimong gibohon kan sekretaryo, ipapadara nia iyan sa sangang opisina tanganing maasikaso. Sa paaging ini, puedeng makultibar an interes.

¹⁰ Kun nakua an numero nin telepono alagad an adres dai, dangan gibohon an pagdalaw liwat paagi sa pag-apod sa indibiduwal. Andamon antes pa an gusto nindong ipakipag-olay. Ibugtak sa harani an librong Reasoning para sa marikas na pagkonsulta. An nagkapira nagkakaigwa nin marahay na kapangganahan sa pakipag-adal sa mga indibiduwal paagi sa telepono, kaiba an mga masakit nindang manuparan sa harong. An sarong tugang na babae nagpoon na maghagad nin mga numero sa telepono sa interesadong mga babae na nanuparan nia sa ministeryong pagharongharong, asin bilang resulta nakapoon sia nin duwang pag-adal sa Biblia.

¹¹ Makikooperar sa Kamagurangan sa Pagtabang sa mga Inaktibo: Interesadong marhay an kamagurangan sa pagtao nin mamomoton na atension sa mga ini. An dakol sa mga siring, sa saindang inisyatiba, ipinadagos na an pag-atender sa mga pagtiripon kan kongregasyon. Narealisar ninda an pangangaipo na maghingoang kamtan an dayupot na pakikiasosyar sa organisasyon ni Jehova tangani na magkaigwa nin espirituwal na seguridad na ilinadawan sa Salmo 91. An nagkapira sa sainda andam na liwat ngonyan na makikabtang sa paglilingkod sa langtad. Kun umatender an ibang inaktibo sa Memorial ngonyan na bulan, tibaad maogma nindang akoon an personal na pakipag-adal sa Biblia. Kun siring kaiyan an kamugtakan, an kamagurangan magibo nin mga areglo para may saro na mamamayo sa pakipag-adal sa mga nagmamawot nin tabang. Kun kamo imbitaran na tumabang sa paaging ini, aapresyaron na marhay an saindong kooperasyon.​—Roma 15:​1, 2.

¹² Padagos na “Pagpapadanay sa Marahay na mga Gibo”: An dakol na nakikabtang sa paglilingkod bilang auxiliary payunir nin sarong bulan o labi pa nakanompong na nadagdagan an saindang aktibidad sa langtad sa suminunod na mga bulan. Nanuparan ninda an interesadong mga tawo na sa boot ninda kaipuhan na balikan. Namotibar sinda kaini na gumibo nin ekstrang paghihingoa na lumuwas sa paglilingkod sa langtad nin mas parate tanganing makaolay giraray an mga interesado. An nagkapira nakapoon nin mga pag-adal, asin iyan nakatabang sa sainda na orog pa nganing makikabtang sa ministeryo.

¹³ An iba pa nakanompong nin dakulaon na kagayagayahan sa paggibo nin orog pa sa paghuhulit asin paggibo nin disipulo kaya sinda namotibar na analisaron an saindang mga prioridad. Bilang resulta, an nagkapira nahimong inaan an saindang sekular na trabaho asin nagin dagos-dagos na auxiliary payunir. An iba nahimong maglingkod bilang regular payunir. Nahimo nindang ibugtak nin mas lubos an saindang paglaom sa Dios asin bakong sa mga bagay na iinaalok kan kinaban. Nanompongan ninda na an pagigin “matinao, andam na manhiras,” nagbunga nin mayaman na mga bendisyon hale ki Jehova asin nagparigon sa saindang paglaom na kamtan an “tunay na buhay.” (1 Tim. 6:​18, 19) Siempre, mientras na nagdadakol an naglilingkod bilang payunir, nakikinabang an bilog na kongregasyon. An mga payunir may tendensiang iestorya an saindang mga eksperyensia asin inaagda an iba na makikabtang sa ministeryo kaiba ninda, asin ini nagpoprodusir nin mas espirituwal na atmospera sa kongregasyon.

¹⁴ Logod na kita gabos “magin mayaman sa marahay na mga gibo” durante kan panahon na ini nin Memorial asin lampas pa paagi sa pagdugang sa satong pakikikabtang sa Kristianong ministeryo. Ipaheling niato an satong pag-apresyar sa ginibo ni Jehova sa pagtao sa sato kan paglaom na mabuhay sagkod lamang sa sarong matanos na bagong daga.​—2 Ped. 3:13.