‘Gumibo kan Marahay sa Gabos’
1 “Ihulit nin Lubos an Tataramon nin Dios” asin “Magin Mayaman sa Marahay na mga Gibo” an tema na ginamit sa mga suplemento kan Pebrero asin Marso 2002 na An Satong Ministeryo sa Kahadean. (Col. 1:25; 1 Tim. 6:18) Sa mga isyung iyan inenkaminar kita na gumibo nin dugang pang paghihingoa na tabangan an mga interesado na umatender sa Memorial, tabangan an mga inaktibo na makiiba giraray sa kongregasyon, asin tabangan an satong mga aki patin kualipikadong mga inaadalan sa Biblia na magpoon sa pagpahayag kan maogmang bareta. Daing duda na nagkamit kita nin nagkapirang kapangganahan bilang resulta kan satong mahigos na mga paghihingoa. Ngonyan, “mantang igwa kita nin marahayrahay na panahon para kaiyan, [padagos na] gumibo kita kan marahay sa gabos.”—Gal. 6:10.
2 Imbitaran Sinda na Umatender Giraray: Sa Pilipinas, labing 280,000 katawo na bakong mga parahayag kan maogmang bareta an nag-aatender sa Memorial kada taon. Mantang an presensia ninda nagpaparisa na sinda may interes, ano an dapat niatong gibohon tangani na mapahiro an mga “may tamang tendensia sa buhay na daing katapusan” na magin “mga paratubod”? (Gibo 13:48) Enkaminaron sinda na bumalik sa mga pagtiripon kan kongregasyon sa pinakamadaling panahon na mapupuede.
3 Taano ta dai imbitaran an interesado na umatender sa Pag-adal sa Libro kan Kongregasyon tangani na ikaogma nia an interesanteng pag-orolay manongod sa hula ni Isaias? Kun kamo sarong paryente o kamidbid kan tawong iyan asin nakaiskedyul kamong magtao kan nagdadangadang na pahayag sa Teokratikong Paadalan sa Pagmiministro, puede nindong imbitaran an sarong iyan na magduman asin maghinanyog sa saindong kabtang. Padagos siang paisihon kan titulo kan mga pampublikong pahayag na itatao sa maabot na mga semana. (Maninigong ipaskil an bagong iskedyul sa information board.) Humanap nin ano man na oportunidad na pukawon sa saro an pagmawot na sumamba ki Jehova. Asin siempre, kun dai pa sia nakikipag-adal sa Biblia sa saro na nakaasosyar sa kongregasyon, puede nindong maboot na alokan sia nin pag-adal.
4 Padagos na Enkaminaron an Inaktibo: An dakol sa mga nag-atender sa Memorial nagdusay na ki Jehova. Minsan siring, nag-abot an panahon na sinda uminontok sa aktibong paghuhulit kan maogmang bareta. Alagad ta sinadol kita ni Pablo na ‘gumibo kan marahay orog na sa mga may relasyon sa sato sa pagtubod.’ (Gal. 6:10) Huli kaini, an mga inaktibo maninigong pangenot na pahelingan nin interes.
5 Tibaad an nagkapira nagsimbag na sa pag-enkaminar kan kamagurangan asin iba pa na makikabtang giraray sa ministeryo. Kun inasignaran kamo kan kamagurangan na ibanan an rineaktibar na parahayag, aramon na an pagkamoot mismo nindo ki Jehova asin sa ministeryo sa langtad an mapatalubo kan kompiansa sa sarong iyan. Ipaheling sa saiya kun paano kamo nagpapartisipar sa manlaenlaen na kabtang kan ministeryo tanganing makanompong sia nin kagayagayahan dian, magdanay sa gibohon na paghuhulit, asin puedeng makaeksperyensia kan mga bendisyon ni Jehova.
6 Tawan nin Marahay na Pagpoon an Bagohan na mga Parahayag: Kan marealisar nin sarong bagong interesadong babae na nanompongan na nia an tunay na organisasyon nin Dios, gusto niang pumoon sa paglilingkod tolos-tolos. Pakatapos na maaraman kun ano an kahagadan sa saiya, sia nagsabi: “Gusto kong ponan tolos iyan.” Kun an saro na inaadalan nindo sa Biblia aprobado na ngonyan na pumoon sa pakikikabtang sa paglilingkod sa langtad, tabangan sia na maheling an pangangaipo na “ponan tolos iyan,” asin kun siring tawan nin marahay na pagpoon an bagohan na parahayag. Tabangan sia na pataluboon an kaugalean sa pag-andam para sa asin pakikikabtang nin regular sa ministeryo sa langtad kada semana.
7 Kun aki mismo nindo an nagin bagong dai pa bautisadong parahayag, tabangan sia na umoswag oyon sa saiyang edad asin abilidad. Paagi sa dikit na tabang hale sa saindo, tibaad masorpresa nia kamo kun gurano sia karahay sa pakikipag-olay sa iba, pagbasa sa Biblia, asin pag-alok nin mga babasahon. Kun makanompong sia nin interesado sa paglilingkod sa langtad, sanayon sia na gumibo nin pagdalaw liwat asin kultibaron an interes.
8 Pahiwason an Saindo Mismong Ministeryo: Nagtotogot daw an mga kamugtakan nindo na dagdagan an saindong pakikikabtang sa pag-ebanghelyo dawa nakalihis na an panahon kan Memorial? Puede daw nindong dugangan nin saro o duwang oras kada semana an parate na nindong ginagamit sa paglilingkod? Patienot daw nindong hineheling an kalendaryo kun noarin giraray kamo makapag-o-auxiliary payunir? O puede daw nindong areglaron an saindong estilo nin pamumuhay tangani na lumaog sa bilog na panahon na ministeryo? An bilog na paghihingoa na ginigibo niato sa ministeryo puedeng makatabang sa saro na akoon an katotoohan! (Gibo 8:26-39) Mantang inaasahan niato an mga aldaw na maabot, “danay na hanapon an karahayan kan lambang saro asin kan gabos na iba pa.”—1 Tes. 5:15.
[Kahon sa pahina 3]
Padagos na Tabangan an:
□✔ Mga nag-atender sa Memorial
□✔ Rineaktibar na mga parahayag
□✔ Bagong dai pa bautisadong mga parahayag