Nagpapasalamat sa Kun Ano an Igwa Kita

¹ “Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.” (Roma 5:8) Maninigo nanggad kitang magpasalamat sa kadarudakulaing sakripisyo na ginibo kapwa ni Jehova Dios asin kan saiyang Aki para sa sato! Paagi sa pinabolos na dugo ni Cristo, tinatawan kita nin oportunidad para sa buhay na daing katapusan, sarong bagay na dai ikakatao sa sato nin ibang tawo.

² Paano niato ikapaheheling an satong pagpahalaga? Kadakol na tawo an napapaha sa tunay na kaaraman gikan sa Tataramon nin Dios. Kabotan ni Jehova na matabangan an mga ini. (1 Tim. 2:4) Ipinaheheling niato an satong pagpahalaga paagi sa ‘pagpahayag kan maogmang bareta kan Kahadean nin Dios.’ (Luc. 4:43) Ipinaheheling kan bilog na pusong pakikikabtang na pinahahalagahan niato na si Cristo nagadan para sa sato asin na boot niatong arogon sia paagi sa paggibo sa iba na magin mga disipulo.​—Mat. 28:​19, 20.

³ Ano an nagkapirang kabtang nin paghuhulit na bukas sa sato? Posible daw para sa sato na magpalista bilang mga auxiliary payunir sa panapanahon? Pakakuwentaha kan gastos, an iba tibaad kayang maglingkod bilang regular payunir. Kan nakalihis na mga panahon tibaad pinag-isip-isip nindo an pagpalista, alagad nagkaigwa nin mga kaolangan. Tibaad naliwat na an saindong mga kamugtakan. Kun iyo, odok na daw nindong hinorophorop na dagdagan an saindong paglilingkod paagi sa paglaog sa paglilingkod bilang payunir o paagi sa paglilingkod bilang auxiliary payunir sa panapanahon?

⁴ An satong pagpasalamat nag-oorog kun hiniheling niato an nangyayari sa satong palibot. Naggagrabe an kadahasan, pagkaongis, asin iriwal sa bilog na kinaban. Marahay an pagkaladawan ni Pablo sa satong mga panahon bilang “delikado” asin “masakit pakibagayan.” (2 Tim. 3:1) Sa tahaw kan makamomondong mga kamugtakan na ini, igwa kita nin abundang maogmang bareta na ikahihiras sa iba. Igwa kita nin duwang magayon na magasin, An Torrengbantayan asin Awake!, na ikakaalok niato sa bulan na ini nin pasarosaro o paagi sa suskripsion. Igwa man kita nin mga brochure manongod sa nagkapirang tema. An pagpasalamat sa kun ano an igwa kita maninigong magpahiro sa sato na ihiras an mga iyan sa iba.​—Heb. 13:16.

⁵ Tibaad sa lugar na iniistaran nindo, an mga tawo nagpapaheling nin dikit na interes sa espirituwal na mga bagay. Kabaliktaran kaiyan, igwa nin mga teritoryong mabunga. Posible daw na makapaglingkod kamo sa lugar na igwa nin tunay na pangangaipo sa tabang nindo? Puwedeng igwa nin nagkapirang suhestion an saindong paraataman sa sirkito mapadapit sa bagay na ini.

⁶ Igwa nin dakol na dahelan na magpasalamat sa kun ano an igwa kita, tunay nanggad na abundang mararahay na bagay. An satong pagpasalamat ki Jehova puwedeng ikapahayag sa pinakamarahay paagi sa pagpamidbid sa iba kan saiyang ngaran asin mga katuyohan.​—Isa. 12:​4, 5.