Ipaheling an Pagkamapagpasalamat Nindo
1 Minsan ngani nabubuhay kita sa “delikadong mga panahon na masakit pakibagayan,” dakol kitang dahelan na magpasalamat ki Jehova. (2 Tim. 3:1) An pangenot digdi iyo an mahalagang marhay na balaog kan saiyang Aki para sa sato. (Juan 3:16) Dugang pa, mantang nagugutom sa espirituwal an mga nasa falsong relihion, kita nagkakamit nin abundang espirituwal na kakanon. (Isa. 65:13) Kabtang kita nin pambilog na kinaban na kasararoan nin magturugang asin may pribilehio kitang makikabtang sa nakakaogmang pagpahiwas kan tunay na pagsamba. (Isa. 2:3, 4; 60:4-10, 22) Paano niato ikakapaheling an pagkamapagpasalamat niato ki Jehova sa mga bendisyon na abunda niang itinatao sa sato?—Col. 3:15, 17.
2 Magayagaya Asin Bilog na Pusong Paglilingkod: Kan tinotokar an pagtao nin materyal na mga bagay, si apostol Pablo nagsurat: “An Dios namomoot sa maogmang paratao.” (2 Cor. 9:7) An prinsipyong ini aplikado man sa paglilingkod niato sa Dios. An pagkamapagpasalamat nababanaag sa satong entusiasmo sa katotoohan, sa satong kagayagayahan sa Kristianong mga pagtiripon, sa satong kaigotan sa ministeryo sa langtad, asin sa satong pagigin maogma sa paggibo kan kabotan nin Dios.—Sal. 107:21, 22; 119:14; 122:1; Roma 12:8, 11.
3 Sa suanoy na Israel dai sinabi kan Ley an espesipikong kadakolan nin nagkapirang dolot. An lambang parasamba puedeng ipaheling an saiyang pagpasalamat paagi sa pagtao “kasokol kan bendisyon ni Jehova” na inako nia. (Deut. 16:16, 17) Siring man ngonyan, an mapagpasalamat na puso matulod sa sato na maghulit kan Kahadean asin gumibo nin mga disipulo sagkod na itinotogot kan satong mga kamugtakan. An bulan nin Mayo matao nin saro pang marahayon na oportunidad na ipaheling an pagkamapagpasalamat niato. An nagkapira mahihimong aprobetsaran an bakasyon sa eskuelahan tangani na mag-auxiliary payunir, mantang an iba puedeng dagdagan an saindang ginagamit na oras sa paglilingkod sa langtad mientras na marahay an kamugtakan kan panahon. Puede daw nindong pahiwason an saindong ministeryo ngonyan na bulan?
4 Nagsosopay na May Pagpasalamat: An importanteng marhay na paagi na ipinapahayag niato an pagpasalamat niato ki Jehova iyo an pamimibi. (1 Tes. 5:17, 18) Sinasadol kita kan Tataramon nin Dios na ‘magsopay sa pagtubod na may pagpasalamat.’ (Col. 2:7) Dawa kun kita sibot na marhay o natetension, maninigo na pirme niatong iiba an pagpasalamat sa satong aroaldaw na mga pamibi. (Fil. 4:6) Tunay nanggad na paagi sa satong ministeryo saka sa satong mga pamibi, logod na kita “magin mayaman sa dakol na pagpahayag nin pasalamat sa Dios.”—2 Cor. 9:12.