“Ipaheling Nindo na Kamo Nagpapasalamat”
1 An kadaklan sa sato pinatood kan aki pa na magsabing “tabi” asin “salamat” kun may nagpaheling sa sato nin kabootan. Sinasadol kita ni Pablo na perming ‘ipaheling na kita nagpapasalamat,’ asin nangorognang maninigo kitang magpasalamat ki Jehova. (Col. 3:15, 16) Alagad paano kita makapahahayag nin pasasalamat sa satong Kaharohalangkaweng Kaglalang? Asin ano an mga dahelan niato na magin mapagpasalamat sa saiya?
2 Nagsurat si apostol Pablo: “Salamat sa Dios, huli ta tinatawan nia kita kan kapangganahan paagi sa satong Kagurangnan na si Jesu-Cristo!” (1 Cor. 15:57) Sa panahon nin Memorial kada taon, napagigirumdom kita manongod sa daing sagkod na pagkamoot na ipinaheling kapwa nin Dios asin ni Cristo sa pagtao kan pantubos. (Juan 3:16) Mantang haros kita gabos nagadanan na nin mga namomotan, kanigoan an pasasalamat niato sa panuga ni Jesus na pagkabuhay liwat! An satong puso nagsosopay sa pasasalamat kun hinohorophorop niato an paglaom na makaligtas na buhay sa katapusan kaining palakaw na dai na noarin man magagadan. (Juan 11:25, 26) Masakit makakua nin mga tataramon tangani na ikapahayag an pasasalamat huli sa gabos na makangangalas na bendisyon na maeeksperyensiahan pa niato sa madatong na daganon na Paraiso. (Kap. 21:4) Ano pang mas marahay na mga dahelan nin saro na ‘ipaheling na sia nagpapasalamat’ sa Dios?
3 Kun Paano Makapahahayag nin Pasasalamat sa Dios: Perming angay na ipahayag paagi sa pamibi ki Jehova an satong pasasalamat huli sa saiyang karahayan. (Sal. 136:1-3) Napahihiro man kita na ipaheling an satong pasasalamat sa saiya sa iba pang positibong mga paagi. Halimbawa, siertong maatender kita sa Domingo, Marso 23, para sa Memorial kan kagadanan ni Cristo. Maogma niatong ‘tinatawan nin onra si Jehova paagi sa satong mahahalagang bagay’ tangani na mahipnoan an materyal na mga pangangaipo kan lokal na kongregasyon asin kan pambilog na kinaban na gibohon. (Tal. 3:9) Lubos niatong sinusuportaran an kamagurangan asin nakikikooperar kita sa sainda, sa siring ipinaheheling an satong pasasalamat ki Jehova huli sa tabang na itinatao nia paagi sa sainda. (1 Tes. 5:12, 13) Aroaldaw, pinagmamaigotan niatong papagdanayon an tanos na paggawe na nagpapamuraway sa ngaran nin Dios. (1 Ped. 2:12) Naoogma si Jehova sa gabos na ining ebidensia nin satong pasasalamat.—1 Tes. 5:18.
4 An Satong Pinakamarahay na Kapahayagan nin Pasasalamat: An pagkaigwa nin bilog na kalag na pakikikabtang sa paghuhulit kan Kahadean, pagtaong onra sa ngaran ni Jehova, pagpahayag nin pasasalamat paagi sa pamibi, asin maimbod na pagdepensa kan katotoohan kabilang sa pinakamarahay na mga kapahayagan nin odok sa pusong pasasalamat na magigibo niato sa satong Kaglalang. Naoogma si Jehova na maheling kitang nagtatao nin sagradong paglilingkod bilang pagsuportar sa saiyang kabotan “na an gabos na klase nin tawo makaligtas.” (1 Tim. 2:3, 4) Iyan an dahelan kun taano ta kadakol na parahayag an minasimbag sa pangapodan na maheheling sa An Satong Ministeryo sa Kahadean kan Pebrero na magpalista bilang mga auxiliary payunir durante kan saro o labi pa sa mga bulan nin Marso, Abril, asin Mayo. Makaiiba daw kamo sa grupo nin mga payunir sa Abril? sa Mayo?
5 Kun maotob na an satong paglaom na mabuhay sagkod lamang, magkakaigwa kita nin dakol pang dahelan na padagos na magtao nin magayagayang pasasalamat ki Jehova.—Sal. 79:13.