“An Saindong Pagpapagal Bakong Sayang Sana”
1 Kanigoan kanakaparirigon sa boot na horophoropon! An saindong pagpapagal sa paglilingkod ki Jehova bakong sayang sana. (1 Cor. 15:58) Sa kabaliktaran, isip-isipa kun gurano nagtatrabaho nin halawig asin naglalapigot an mga tawo sa pagmamaigot na magrahay an saindang kamugtakan sa buhay o an saindang situwasyon sa pinansial. Tibaad sinda nagkukua nin mas halangkaw na edukasyon sa laog nin dakol na taon o nagtatrabaho nin sobra-sobra tangani na umasenso sa materyal. Pero, huli sa “panahon asin pagkanorongod,” tibaad nungka na nindang maabot an prestihio na hinihingoa nindang makamtan, o tibaad makontento na sana sinda maski nagkukulang sa materyal. Siring sa “paglapag sa doros,” sayang sana an saindang mga paghihingoa. (Ecl. 1:14; 9:11) Kun siring, abaa kahalagang marhay na igwa kita nin dakol na gigibohon sa solamenteng gibohon na bakong sayang sana huli ta iyan may nagdadanay na halaga!
2 An Gibohon na Talagang Mahalaga: An paghuhulit kan maogmang bareta manongod sa Kahadean nin Dios iyo an pinakamahalagang gibohon sa daga. Iyan an trabaho na dapat na gibohon baga man an mga tawo maghinanyog o dai. Gusto niatong makapagsabi, siring ki Pablo: “Malinig ako sa dugo kan gabos na tawo, huli ta dai ako nagpogol sa pagsabi sa saindo kan gabos na sadol nin Dios.”—Gibo 20:26, 27.
3 Kanigoan nanggad an kagayagayahan kun an mga tawo naghihinanyog asin naghihimate sa mensahe kan Kahadean! An sarong hoben na babae nagadanan nin inaon. Nag-isip-isip sia kun saen nagduman an saiyang inaon—sa langit o sa impierno? Namibi sia sa Dios para sa tabang, na ginagamit an ngaran na Jehova, na itinokdo sa saiya kan saiyang tugang na babae na gibohon. Dai nahaloy sia nag-aadal na sa Biblia asin nag-aatender na sa Kristianong mga pagtiripon. Sia nagkaigwa nin bilog na bagong punto de vista sa buhay asin pinutol an saiyang koneksion sa mga gang sa kalye. An hoben na babaeng ini nag-ontok sa pagsigarilyo, pagdroga, asin paghabon. Inadmitir nia: “Solamente an pagkamoot ki Jehova an nagpangyari sa sako na bayaan an siring na maraot na pamumuhay. Solamente si Jehova sa saiyang dakulang pagkaherak an makatatao sa sako kan paglaom na buhay na daing katapusan.” Dai na nia ginagamit an saiyang buhay sa sayang sanang mga okupasyon.
4 Dawa kun an mga tawo nagsasayumang maghinanyog, may nahahaman pa man giraray kamong kapakipakinabang. Aram ninda na an Mga Saksi ni Jehova nagdalaw sa sainda. Napatutunayan an saindo mismong integridad, pagigin fiel, asin pagkamoot. Kaya, an saindo daw na pagpapagal sa gibohon kan Kagurangnan sayang sana! Nungka!