Nakaoolang daw Iyan sa Paghuhulit?
1 An kadaklan na tawo sibot an buhay. An Mga Saksi ni Jehova kabilang sa mga pinakasibot—nag-aadal kan Tataramon nin Dios, nag-aatender sa mga pagtiripon kan kongregasyon, asin nakikikabtang sa paglilingkod sa langtad. Dugang pa, sibot kita sa pag-asikaso sa sekular na trabaho, mga gibohon sa harong o leksion sa eskuelahan, asin dakol na iba pang paninimbagan, na gabos nagkakaipo nin panahon. Ini nangorognang masakit para sa mga payo kan pamilya.
2 Huli sa bakong paborableng mga kamugtakan sa pagbuhay sa manlaenlaen na lugar, an mga payo kan pamilya tibaad kaipuhan na magtrabaho nin dakol na oras asin maglapigot tangani na makapaghanap-buhay. Kun an estriktong sekular na mga trabaho kinukua an kadaklan kan saindang panahon asin kosog, dikit na sana an natatada ninda para sa paghuhulit. Huling igwa sinda nin obligasyon na sustentohan sa materyal an saindang pamilya, tibaad an pagmate nin nagkapira limitado na sana an makakaya ninda sa pakikabtang sa ministeryo. (1 Tim. 5:8) Totoo, ngonyan dakol an sakit na konektado sa pagkua kan mga pangangaipo sa buhay. Alagad an sekular na trabaho nin saro dai kaipuhan na magin olang sa paghuhulit kan maogmang bareta. (Mar. 13:10) Huli kaini, maninigong siyasaton niato an satong totoong situwasyon.
3 Huling pirmeng nagbabago an situwasyon sa kinaban, an sarong payo nin pamilya tibaad magkaigwa nin tendensia na gumamit nin sobra kadakol na oras sa trabaho, sa katuyohan na dugangan an saiyang tipon na kuarta para sa dai linalaoman na mga krisis. (1 Cor. 7:31) Minsan ngani an dinagdagan na sekular na trabaho tibaad garo baga nagtatao nin ekstrang materyal na mga bagay o dugang na mga oportunidad para sa dibersion asin pag-aling-aling, pangyayarihon daw kaini an pamilya na magin mas maogma asin mas kontento kun iyan ginigibo sa paagi na isinasakripisyo na an oras para sa espirituwal na mga aktibidad asin regular na pag-atender sa mga pagtiripon? Bobooton nanggad niato na likayan an ano man na bagay na magsasapeligro kan satong espirituwalidad. An paghimate sa hatol ni Jesus na ‘magtipon nin mga kayamanan sa langit’ asin magin “mayaman sa Dios” an madonong na gibohon.—Mat. 6:19-21; Luc. 12:15-21.
4 Hanapon Nguna an Intereses kan Kahadean: Tinokdoan ni Jesus an mga parasunod nia na enoton an espirituwal na mga bagay kisa gabos na ibang bagay. Sinadol nia sinda: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’” Taano ta sinabi nia iyan? Ipinaliwanag nia: “Huli ta an saindong langitnon na Ama nakaaaram na kaipuhan nindo an gabos na bagay na ini.” Kun talagang kombensido kita kaiyan, daing balakid na makaoolang sa sato sa paggibo kan sunod na sinabi ni Jesus: “Kun siring, padagos na hanapon nguna an kahadean asin an saiyang katanosan, asin ini gabos na [kaipuhan na materyal na] bagay idadagdag na sana sa saindo.” Seseguradohon iyan nin Dios! (Mat. 6:31-33) Ini bako nanggad na panahon na madisturbo nin dai maninigong kahaditan sa paghanap-buhay o nin pagmawot na guminhawa sa sarong sistema nin mga bagay na madali nang mawara.—1 Ped. 5:7; 1 Juan 2:15-17.
5 An pangenot na katuyohan nin sekular na trabaho iyo an masustentohan an materyal na mga pangangaipo nin saro. Alagad gurano kadakol kan kaipuhan niato? Nagsurat si apostol Pablo: “Mantang igwa na nin kakanon asin gubing, maninigoan na kita sa mga bagay na ini.” Nagmamaigot daw kitang magkaigwa nin labi pa kaiyan? Kun iyo, tibaad anihon niato an mga epekto na ipinatanid ni Pablo: “Idtong mga determinadong yumaman nahoholog sa sugot asin sa siod patin sa dakol na daing isip asin nakararaot na mawot, na nagdadara sa mga tawo sa kalaglagan asin kapahamakan.” (1 Tim. 6:8, 9; Mat. 6:24; Luc. 14:33) Paano niato masasabi kun kita inoolang nin sobrang mga pagmawot?
6 Kun huli sa satong sekular na mga okupasyon dikit na sana an pakikikabtang niato sa paglilingkod sa langtad o dai ta na naheheling an pangangaipo na gumibo nin mga pagsakripisyo para sa kapakanan kan maogmang bareta, kun siring kaipuhan na liwaton an satong mga prioridad. (Heb. 13:15, 16) An mas simple sanang estilo nin pamumuhay makakatabang na marhay sa paghale kan nakaoolang na ini sa satong paghuhulit. An intereses kan Kahadean an maninigo na pirmeng enot na prioridad kun mapadapit sa paggamit kan satong panahon asin kosog.
7 An Pagpapagal na Bakong Sayang Sana: An mga tataramon ni Pablo nag-eenkaminar sa sato na danay na magkaigwa nin ‘dakol na gigibohon sa gibohon kan Kagurangnan, sa pakaaram na an satong pagpapagal bakong sayang sana dian sa Kagurangnan.’ (1 Cor. 15:58) An pangenot na “gibohon kan Kagurangnan” iyo an paghuhulit kan Kahadean asin paggibo nin mga disipulo. (Mat. 24:14; 28:19, 20) Tangani na makapakikabtang nin lubos sagkod sa mapupuede, maninigo kitang mag-iskedyul nin panahon para sa paglilingkod sa langtad kada semana asin maghingoa na dai gamiton an panahon na iyan sa ano man na ibang okupasyon. (Efe. 5:15-17) Kun siring, an sekular na trabaho ni ano pa man dai magigin olang sa satong ministeryo.
8 Kun itinatao niato an satong panahon asin kosog sa paghiras sa iba kan mga katotoohan sa Biblia, naeeksperyensiahan niato an nakalalabing kaogmahan na minagikan sa pagtatao. (Gibo 20:35) Paagi sa pagpapadagos sa paghuhulit kan Kahadean, makaaasa kita sa ngapit na may kompiansa, “huli ta an Dios bakong biko na malingawan an [satong] ginibo asin an pagkamoot na [satong] ipinaheling para sa saiyang ngaran.”—Heb. 6:10.