Sibot-Sibot daw Kamo?
1 Nagsadol si Pablo na kita ‘danay na dakol an gibohon sa gibohon kan Kagurangnan.’ (1 Cor. 15:58) Dinadagka kita na magkaigwa nin aroaldaw na rutina para sa personal na pag-adal, makikabtang nin regular sa ministeryo, umatender sa mga pagtiripon, asin asikasohon an mga asignasyon sa kongregasyon. Dugang pa dian, dapat na tabangan niato an iba na nangangaipo nin tabang niato. Huli sa kadakoldakol na dapat gibohon, kun beses tibaad may pakamate kitang nagagabatan na, na nag-iisip na kaipuhan niatong inaan an satong pasan na trabaho.
2 May mga situwasyon na puedeng magpangyari na rasonableng haleon o inaan an nagkapirang aktibidad. May mga indibiduwal na nakamamate na linalaoman sindang gibohon an gabos na hinahagad sa sainda kan iba. An kadaihan nin pagkatimbang sa bagay na ini puedeng magbunga nin pangigipit asin tension na puedeng makapaluyang marhay sa boot. Puede iyan na gumiya pasiring sa pagkalaglag nin relasyon sa pamilya, pagkaribok nin mga emosyon, o grabeng mga problema sa salud.
3 Magin Timbang: An liabe sa pagkatimbang yaon sa pag-aplikar kan sadol ni Pablo na ‘siertohon an orog na mahalagang mga bagay.’ (Fil. 1:10) Iyan nangangahulogan na magkonsentrar kita sa mga bagay na talagang mahalaga asin, kun itinotogot nin panahon, asikasohon an pirang bagay na mas kadikit an halaga. Kabilang sa mga bagay na mahalagang marhay iyo an mga obligasyon sa pamilya. An sekular na mga responsibilidad kaipuhan na otobon. Minsan siring, itinokdo ni Jesus an prinsipyo na hanapon nguna niato an Kahadean. Dapat nguna kitang magin mapagrisa sa espirituwal na mga pangangaipo tangani na maotob an satong pagdusay ki Jehova.—Mat. 5:3; 6:33.
4 Isinasaisip ini, kaipuhan niatong haleon sa satong sibot na iskedyul an ano man na dai kaipuhan na personal na mga aktibidad, sobrang pag-aling-aling, asin bakong mahalagang mga kapanugaan sa iba. Mag-iiskedyul kita nin panahon para sa personal na pag-adal, rasonableng pakikikabtang sa paglilingkod, asin pag-atender sa mga pagtiripon. An natatadang panahon puedeng bangabangaon sa iba pang mga aktibidad.
5 Maski siring kaiyan, tibaad makamate pa giraray kita na masakit an satong pasan. Kun siring, kaipuhan kitang maghimate sa pangagda ni Jesus: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo.” (Mat. 11:28) Mag-arang ki Jehova, “na sa aroaldaw dinadara an pasan para sa sato” asin nagtatao nin kapangyarihan sa napapagal. (Sal. 68:19; Isa. 40:29) Makasasarig kita na gigibohon ni Jehova na posible para sa sato na makapadagos sa sibot na teokratikong aktibidad.
6 Mantang nagdadanay na sibot sa paggibo kan intereses kan Kahadean, makapaggagayagaya kita na an satong pagpapagal bakong daing kapakanan dian sa Kagurangnan.—1 Cor. 15:58.