Isentro an Saindong Buhay sa Paglilingkod ki Jehova
1 Iinagid ni Jesus an mga naghihinanyog sa saiya sa duwang klase nin paratogdok. An saro nagtogdok kan saiyang pamumuhay sa ibabaw kan gapo nin pagkuyog ki Cristo asin natagalan nia an mga bagyo nin pagtumang asin kasakitan. An saro pa nagtogdok sa baybay nin paslong pakisuway asin dai sia nakatagal kan dumatong an pangigipit. (Mat. 7:24-27) Huling nabubuhay na sa pagtatapos na ini kan palakaw nin mga bagay, naeeksperyensiahan niato an dakol na bagyo nin kasakitan. Sa enotan marikas nang naheheling an maitom na panganoron kan dakulang kahorasaan. Kita daw makatatagal sagkod sa katapusan na dai naaano an satong pagtubod? (Mat. 24:3, 13, 21) An kadaklan depende sa kun paano niato itinotogdok an satong buhay ngonyan. Sa siring, importanteng hapoton an satong sadiri, ‘Marigon ko daw na isinesentro an sakong Kristianong buhay sa makinuyog na paglilingkod sa Dios?’
2 Ano an boot sabihon kan pagsentro kan satong buhay sa paglilingkod ki Jehova? Iyan nangangahulogan na ginigibo niato si Jehova na pinakasentro kan satong buhay. Kaiba dian an pagkonsentrar sa Kahadean bilang an pangenot sa sato. Kalabot dian an pagkuyog sa Dios sa gabos na aktibidad kan satong aroaldaw na buhay. Iyan naghahagad nin pagigin bilog na puso sa satong personal, pampamilya, asin pankongregasyon na pag-adal kan Biblia patin sa satong ministeryo sa langtad, na an mga ini an ipinaoorog niato. (Ecl. 12:13; Mat. 6:33) An makinuyog na pamumuhay na iyan nagbubunga nin pagtubod na arog sa gapo kasarig, na dai magagaba sa atubangan nin ano man na bagyo nin kasakitan na tibaad tumama.
3 Maogmang maheling an minilyon na tawo na kompiadong isinesentro an saindang buhay asin an saindang mga paglaom para sa ngapit sa paglilingkod sa Dios, siring kan ginibo ni Jesus. (Juan 4:34) Sinda nagdadanay sa sarong daing liwat-liwat na iskedyul nin teokratikong mga aktibidad asin bilang resulta nagkakamit nin mayaman na mga bendisyon. Ipinaliwanag nin sarong ina kun paano ninda mag-agom mapangganang pinadakula an saindang duwang aking lalaki tangani na makapaglingkod ki Jehova: “Pinano niamo an samong buhay kan katotoohan—na nagduduman sa gabos na kombension, nag-aandam para sa asin nag-aatender sa mga pagtiripon, patin ginigibo an paglilingkod sa langtad na regular na kabtang kan samong buhay.” Sabi pa kan saiyang agom: “An katotoohan bakong kabtang kan samong buhay, iyan an samong buhay. An gabos na iba pang bagay nakasentro dian.” Ginibo na man daw nindo an paglilingkod ki Jehova na pangenot na prioridad sa saindong pamilya?
4 Gumibo nin Sarong Praktikal na Semanal na Iskedyul: Tinatabangan kita kan organisasyon ni Jehova na sunodon an sarong marahay na espirituwal na pinagkatodan paagi sa pag-areglo nin limang pagtiripon kada semana. An mga Kristiano na isinesentro an saindang buhay sa pagsamba ki Jehova iinaareglo an saindang sekular asin pampamilyang mga aktibidad sa paagi na makaaatender sinda sa gabos na mahalagang pagtiripon na ini. Dai ninda tinotogotan an mga bagay na bakong gayo importante na makaolang sa saindang regular na pag-atender.—Fil. 1:10; Heb. 10:25.
5 Rinerekonoser kan maygurang na mga Kristiano na kun paanong importante na regular na kumakan nin nagkapirang beses kada aldaw, mahalaga man na marhay na gumibo nin depinidong iskedyul para sa personal asin pampamilyang pag-adal, kabale na an pagpreparar para sa mga pagtiripon. (Mat. 4:4) Puede daw kamong magtagama nin kisuerra 15 o 20 minutos kada aldaw para sa personal na pag-adal? An liabe iyo na dai pagtogotan na maagaw nin ibang bagay an panahon na itinagama para sa pag-adal. Gibohon iyan na kapakipakinabang na ugale. Ini tibaad magkaipong bumangon nin mas amay kada aga kisa sa ginigibo nindo ngonyan. An 17,000 na miembro kan pankinaban na pamilyang Bethel minabangon nin amay sa aga tangani na pag-olayan an teksto kan aldaw. Siempre, an pagbangon nin amay nagkakaipo nin pagtorog sa rasonableng oras sa banggi tanganing maponan an sunod na aldaw na kamo andam asin nakapahingalo.
6 Kun kamo sarong ama nin pamilya, kamo na an magplano asin mag-organisar nin iskedyul nin teokratikong aktibidad kan saindong pamilya. May mga pamilyang iribang nagbabasa kan Biblia, kan Yearbook, o ibang publikasyon mantang sinda nagpapahorohayahay pakapamanggi. An dakol na magurang na naheling an saindang mga aki na nagdakula na mga Kristianong makosog sa espirituwal nagsasabi na an sarong nakakontribwir sa saindang kapangganahan iyo an pampamilyang kaugalean na magtagama nin sarong banggi kada semana na dian sinda iribang nagpapakinosogan sa espirituwal. An sarong ama na siring kaiyan nagsabi: “Namamatean ko na an pagtalubo sa espirituwal kan sakong mga aki sa kadaklan huli sa samong regular na pampamilyang pag-adal kada Mierkoles na banggi, na pinonan mga 30 taon na an nakaagi.” An tolo niang aki gabos nabautismohan sa amay na edad, asin sa huri an tolo gabos luminaog sa bilog na panahon na ministeryo. Dugang pa sa pampamilyang pag-adal, puedeng ensayohon an mga pag-atubang sa paglilingkod sa langtad o mga kabtang sa pagtiripon asin puedeng mag-iribanan sa iba pang kapakipakinabang na mga aktibidad.
7 Sa saindong semanal na iskedyul, igwa daw kamo nin ‘tinubos na panahon’ para sa paghuhulit kan Kahadean? (Col. 4:5) An kadaklan sa sato sibot an buhay, na igwa nin pampamilya asin pankongregasyon na mga paninimbagan na dapat na asikasohon. Kun dai kita magibo nin depinidong mga areglo na makikabtang sa paghuhulit asin pagtotokdo kada semana, magigin pasil na marhay na matahoban nin ibang bagay an mahalagang marhay na aktibidad na ini. An kagsadiri nin sarong dakulang rantso nin mga baka nagsabi: “Kaidtong mga 1944 narealisar ko na an solamenteng paagi na ako makapaglingkod iyo an pag-iskedyul nin sarong aldaw para dian. Sagkod sa aldaw na ini nagbabakasyon pa ako nin sarong aldaw durante kan semana para sa paglilingkod.” Nanompongan nin sarong Kristianong magurang sa kongregasyon na an pagkaigwa nin sarong depinidong iskedyul para sa pagpapatotoo nagpapangyari sa saiya na magpromedyo nin 15 oras sa sarong bulan sa paghuhulit. Kun sia igwa nin ano man na sekular na negosyo sa Sabado, iiniiskedyul nia iyan pagkatapos kan saiyang paglilingkod sa langtad sa aga. Makapag-iiskedyul daw kamo asin an saindong pamilya nin kisuerra sarong aldaw kada semana para sa paglilingkod sa langtad, na ginigibo ining kabtang kan saindong espirituwal na pamumuhay?—Fil. 3:16.
8 Siyasaton an Saindong Pinagkatodan sa Buhay: May mga bagay na minakontra sa pagsentro kan satong buhay sa paglilingkod ki Jehova. An dai linalaoman na mga pangyayari puedeng makaistorbo sa satong maingat na plinanong iskedyul nin pag-adal, mga pagtiripon, asin paglilingkod. Asin an satong Kaiwal, si Satanas, gigibohon an gabos niang makakaya na ‘olangon kita’ asin tumangon an satong mga plano. (1 Tes. 2:18; Efe. 6:12, 13) Dai pagtogotan an mga olang na ini na panluyahon an boot nindo, tanganing pumondo na kamo. Gumibo nin ano man na mga pagliliwat na kaipuhan tangani na magibo an saindong nakaiskedyul na teokratikong aktibidad. Kaipuhan an determinasyon asin pagkadesidido tangani na magibo an talagang kapakipakinabang.
9 Dai niato dapat na togotan an kinabanon na mga impluwensia asin an maraot na puersa kan satong bakong sangkap na laman na ilaog an bakong espirituwal na mga aktibidad na puedeng magpoon na umubos nin kadakol na panahon asin atension niato. Kaipuhan an pagsiyasat sa sadiri, na ginagamit an mga hapot na siring baga kan: ‘An buhay ko daw luway-luway nang nagigin bakong timbang o nalilingling? Pinonan ko na daw na isentro an sakong buhay sa mga bagay na nasa kinaban na ini na malihis sana? (1 Juan 2:15-17) Gurano kadakol na panahon an ginagamit ko sa personal na mga okupasyon, pagbiahe para sa pag-aling-aling, isport, o iba pang pag-aling-aling—kaiba an pagdalan nin telebisyon o pagparababad sa Internet—kun ikokomparar sa panahon na ginamit sa espirituwal na mga aktibidad?’
10 Kun namamatean nindo na an saindong buhay nagin nang disareglado huli sa padakol nang padakol na bakong mahalagang aktibidad, ano daw an dapat na gibohon? Kun paanong si Pablo namibi na logod an saiyang mga tugang “mapakarhay giraray,” o “ikasulit nin tama,” taano ta dai magngayongayo ki Jehova na logod tabangan kamo na magin nakasentro giraray sa paglilingkod sa saiya? (2 Cor. 13:9, 11, nota sa ibaba) Dangan magin determinadong sundon an saindong desisyon asin gumibo kan kinakaipuhan na mga pagliliwat. (1 Cor. 9:26, 27) Tatabangan kamo ni Jehova na malikayan na pumatoo o pumawala sa makinuyog na paglilingkod sa saiya.—Ikomparar an Isaias 30:20, 21.
11 Magdanay na Sibot sa Magayagayang Paglilingkod sa Dios: Minilyon an desesperadong naghahanap nin kaogmahan tangani sanang madiskobre na mantang naghaharani an katapusan nin buhay, an materyal na mga bagay na hiningoa nindang marhay na makamtan dai nakapagtao sa sainda nin nagdadanay na kaogmahan. Iyan nagin “paglapag sa doros.” (Ecl. 2:11) Sa ibong na kampi, kun pinagdadanay niato an satong buhay na nakasentro ki Jehova, na ‘danay na ibinubugtak sia sa atubangan niato,’ kita nakaeeksperyensia nin hararom na pagkakontento. (Sal. 16:8, 11) Totoo ini huli ta si Jehova an mismong dahelan kan satong pagkabuhay. (Kap. 4:11) Kun mayo sia, an Dakulang Paramukna, an buhay mayong kahulogan. An paglilingkod ki Jehova pinapano an satong buhay nin kapakipakinabang, may katuyohan na aktibidad na nagtatao sa sato saka sa iba nin pakinabang na nagdadanay, iyo, daing katapusan.
12 Importante na dai magin kontento na sa sadiri asin mawaran kan satong pakamate nin pagkaapurado mapadapit sa marikas nang nagdadangadang na katapusan kan kinaban ni Satanas. An satong aroaldaw na pamumuhay naiimpluwensiahan kan satong pagmansay sa ngapit. An mga tawo kan kaaldawan ni Noe, na dai nagtubod na magkakaigwa nin panglobong delubyo, ‘dai nagmangno,’ na isinesentro an saindang aroaldaw na buhay sa personal na mga okupasyon—na nagkakarakan, nag-iirinom, asin nag-aaragom—sagkod na an baha “iinanod sinda gabos.” (Mat. 24:37-39) Ngonyan, an mga isinesentro an saindang buhay sa kinaban na ini maheheling an saindang mga linalaoman sa ngapit na magkakawarara sa atubangan ninda sa pinakadakulang kalaglagan na dai pa noarin man naeksperyensiahan nin tawo, “an aldaw ni Jehova.”—2 Ped. 3:10-12.
13 Kun siring, padagos na isentro an saindong buhay sa buhay na Dios, si Jehova, asin sa paggibo kan saiyang kabotan. Mayo na kamong mahalagang magigibo sa buhay na ini na igwa nin mapagtitiwalaan nanggad na Parasuportar na siring ki Jehova. Sia dai nagpuputik—ootobon nia an saiyang mga panuga. (Tito 1:2) Sia dai nagagadan—mayo nin ano man na ipinagkatiwala ki Jehova na nawawara. (Hab. 1:12; 2 Tim. 1:12) An buhay na makinuyog asin may pagtubod na itinotogdok niato ngonyan kapinonan sana nin buhay na magdadanay nin daing sagkod sa magayagayang paglilingkod sa satong maogmang Dios!—1 Tim. 1:11; 6:19.
[Blurb sa pahina 3]
“An katotoohan bakong kabtang kan samong buhay, iyan an samong buhay. An gabos na iba pang bagay nakasentro dian.”