Tawan nin Maingat na Atension an Personal na Organisasyon
1 “Kun gusto mong matapos an trabaho, itao mo iyan sa sarong tawong sibot.” An pangangatanosan sa likod kan kasabihan na ini iyo na an tawong sibot parateng organisado asin kun siring makahahaman nin mas dakol pa. Kita gabos igwa nin 24 oras na magagamit kada aldaw. Kun baga sinasayang niato an panahon na iyan o ginagamit niato iyan nin madonong parateng depende sa satong personal na organisasyon.
2 Perming “dakol an gigibohon sa gibohon kan Kagurangnan.” (1 Cor. 15:58) May mga pagtiripon kitang kaipuhan na atenderan asin ministeryo sa langtad na pakikikabtangan. Alagad enot nguna an pag-andam. Sa ibang pagtaram, kaipuhan na kita gumamit nin panahon sa pag-adal tanganing kita epektibong ‘makagibo nin mga disipulo’ asin masadol an iba “sa pagkamoot asin sa marahay na mga gibo,” arog kan ipinagboot sa sato. (Mat. 28:19; Heb. 10:24) An ordinaryong mga bagay sa buhay, arog kan paghanapbuhay, pananaod, pagkakan, paglinig, pagbiyahe, pag-eskuwela, asin pagtorog, gabos may lugar. Puwede man na gumamit nin kadikit na panahon sa pag-aling-aling. An pagbugtak kan gabos sa tamang lugar nagtatao nin angat na kaipuhan na atubangon niato. Paano ini magigibo?
PAGBUGTAK KAN MGA EENOTON
3 Si Jesus nagsabi: “Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mat. 6:33) Malinaw na an mga interes kan Kahadean maninigong enoton pag-abot sa paggamit kan satong panahon. Kun iiiskedyul niato an satong panahon arog kan pagbadyet niato kan satong kuwarta, an mga oras na itinagama niato para sa Kristianong mga pagtiripon, pampamilyang pag-adal sa Biblia, asin mga teokratikong aktibidad na arog baga kan ministeryo sa langtad asin personal na pag-adal dai gagamiton sa paggibo nin ibang bagay.
4 Kaipuhan na iiba sa kada iskedyul an kinakaipuhan na mga bagay sa buhay. Itinatagama an panahon para sa paghanapbuhay sa pagsustento sa sadiri asin sa pamilya. Kaipuhan na iiba man an pagkakan asin pagtorog, saka pagtao nin personal na atension sa mga pangangaipo kan pamilya. Nasa enotan kan listahan nin mga eenoton nin kamagurangan asin ministeryal na lingkod an panahon na ginagamit ninda sa pag-andam asin pag-otob sa teokratikong mga paninimbagan. Taano ta dai tumukaw asin gumibo nin siring na iskedyul, asin helingon kun baga igwa nin mga dai kaipuhan na mas halangkaw kisa maninigo an namumugtakan sa saindong listahan nin mga eenoton?
PAGPAPADANAY SA SIMPLENG MATA
5 Kan ipinaliliwanag ni Jesus an aktibidad kan saiyang mga parasunod, sia nagsabi: “Kaya, kun an saimong mata simple, an saimong bilog na hawak magigin maliwanag.” (Mat. 6:22) Ano an kalabot digdi? Sa pundamental iyan nangangahulogan na papagdanayon an buhay na bakong komplikado. Kadakol na mga pan-istorbo an puwedeng humabon sa panahon. Saro na digdi an telebisyon. Sa pirang harong, an telebisyon pinaaandar pagkaaga asin pinababayaan na nag-aandar sa bilog na aldaw. An saro tibaad tumukaw tanganing magheling nin halipot na programa. Pero naririsa nia na an panahon na plinano niang gamiton sa personal na pag-adal o kaiba kan pamilya minaagi sana mantang nagpapadagos sia sa pagheling nin iba pang programa. Pasilon nanggad na sayangon an bilog na banggi na mayo nin ano man na kapakipakinabang na nahaman! An dakol dai tatao kun noarin popondohon an TV. Kun problema nindo ini, tibaad magdesisyon kamo na an pinakamarahay dai pagpaandaron an telebisyon. An mga apisyon, na sarong klase nin pag-aling-aling para sa nagkapira, tibaad sa huri kumua nin panahon na itinagama para sa mas mahahalagang bagay.
6 An pag-ayon sa mga karawat, pagmiron sa mga karawat, o pagheling kaiyan sa TV puwedeng umubos nin mahalagang panahon. An mga agom na lalaki, agom na babae, asin aki marahay na siertohon na dai sinda nahahabonan nin panahon na magagamit ninda sa pag-adal nin iriba asin sa pag-iriba-iba. Kita gabos dapat na mag-ingat na dai komplikaron an satong buhay nin pagpalabilabi sa karawat o pag-aling-aling.
7 Puwedeng magbunga nin magabat na problema kun totogotan niato na an paghanapbuhay makaubos kan panahon na para sa mahahalagang bagay. Tibaad marisa nin iba na sinda bangkag nang marhay sa saindang trabaho o iniintindi nang gayo an mga paghalat nin pinansial na bentaha na mayo na nin lugar sa iskedyul ninda an mga pagtiripon, ministeryo sa langtad, o espirituwalidad kan saindang pamilya. (Efe. 5:15, 16) Marahay na ihapot sa satong sadiri, ‘Siisay an talagang maoogma kun ipabakal ko sa sekular na mga intereses an panahon na idinusay ko na sa pagsamba ki Jehova Dios?’
MGA PAAGI NA EPEKTIBONG MAGAMIT AN PANAHON
8 An pag-organisar sa buhay para sa pinakaepektibong paggamit sa panahon nagkakaipo nin pagkaigwa nin espirituwal na mga pasohan asin malinaw na pamantayan. Ini an liyabe sa pagbugtak kan mga eenoton sa aroaldaw. Dai magpanuodma. Kun kamo nagtagama nin panahon sa sarong trabaho, gamiton iyan sa katuyohan na iyan. Bugtakan nin termino an saindong sadiri. Pagmaigotan na adalan an materyal sa bastanteng panahon tanganing magamit iyan sa ministeryo sa langtad o sa pagtiripon. Iyo man iyan an gibohon sa pan-aroaldaw na trabaho sa harong.
9 Praktison an paggamit nin panahon na mawawara kutana. Halimbawa, kun kaipuhan na maghalat, gamiton sa marahay an panahon na iyan paagi sa pagbasa, paggibo nin surat, o paghaman sa iba pang kaipuhan na trabaho. Kun kamo naglilinya, tibaad makapoon kamo nin orolay na magbubunga nin pakapagpatotoo. An saro pang kaipuhan niato gabos iyo an pagkaigwa nin bastanteng pahingalo asin pag-aling-aling tanganing magdanay na mabagsik asin alisto. Ini magpapangyari saindo na makapagtrabaho nin mas epektibo. An helang na gikan sa kakulangan nin kinakaipuhan na pahingalo o pagtorog puwedeng makaolang saindo sa pagtao nin tamang atension sa mga bagay na mahalaga nanggad sa buhay.
PAGPAKARHAY SA PERSONAL NA ORGANISASYON
10 Sa langtad nin negosyo, dakol na panahon asin paghihingoa an inuubos sa pagplano sana kun paano hahamanon an sarong trabaho. An marahay na negosyante napatutunayan na ekonomiya an pag-organisar sa mga trabahador asin materyales bago gumibo nin sarong produkto. Aram nia na kun an kaipuhan na mga trabahador asin materyales mayo sa oras asin lugar na sinda kaipuhan, dakol na panahon asin kuwarta an masasayang asin dai sia makakaganansia. Alagad kita mas noble pa an motibo sa pag-organisar sa satong sadiri. Kaiba digdi an kamawotan niato na papagdanayon an marahay na relasyon ki Jehova, magin epektibo sa paggibo nin mga disipulo, asin maabot an pasohan niato na buhay na daing katapusan. Kun siring, kaipuhan na seguradohon niato na igwa kita kan tamang mga kasangkapan sa tamang panahon.
11 Halimbawa, igwa kita nin limang pagtiripon kan kongregasyon serosemana. An materyales para sa mga pagtiripon na ini basado sa nagkapirang laen-laen na publikasyon. Madali daw na makua an mga publikasyon na ini? An luwas daw kan Torrengbantayan na pinag-aadalan niato sa semanang iyan nasasaray, o nauubos daw an panahon sa paghanap kaiyan? Asin kumusta man an iba pang kaipuhan na mga publikasyon, arog kan An Satong Ministeryo sa Kahadean, songbook, Biblia, asin an pinag-aadalan niato sa Pag-adal sa Libro kan Kongregasyon? Marahay na magkaigwa nin permanenteng lugar para sa mga bagay na ini asin sarayon sinda dian kun dai ginagamit. Sa siring, madali niatong makukua an tamang publikasyon kun kita nag-aandam magsalang para sa paglilingkod sa langtad o pagtiripon.
12 An kamagurangan asin ministeryal na mga lingkod nangorognang kaipuhan na asikasohon an saindang personal na organisasyon. Mantang kadakol kan trabaho, pareho sa paghanapbuhay asin sa kongregasyon, an “orog na mahalagang mga bagay” puwedeng may beses na malingawan o ikapagilid. (Fil. 1:10) An paggamit kan suhestion na magkaigwa nin listahan nin mga eenoton tunay na puwedeng magin kapakipakinabang. Naprobaran na daw nindo ini? An sarong tugang igwa nin siring na lista asin renerepaso iyan bago an kada pagtiripon. Sa paaging ini dakol an saiyang nahahaman asin naseseguro na nagigibo an kinakaipuhan na gibohon kan kongregasyon.
13 An kamagurangan maninigo na magkaigwa nin marahay na sistema sa pagsubaybay sa mga surat sa kongregasyon. An mga papeles may beses na nakariribong asin pagabat kun iyan dai naorganisar nin tama. Kaya marahay na dayaday na tawan nin pirang minuto an paghusay sa mga papeles na kaipuhan na sarayon o itao sa iba saka iapon an mga puwede nang haleon. Kun igwa nin mga surat na yaon saindo na kaipuhan na ipasa sa ibang kamagurangan, seguradohon na itao tolos iyan. An pagtao nin sarong espisipikong lugar sa saindong bag o tibaad pagbugtak nin mga surat sa sarong separadong sobre o folder makatatabang saindo na masubaybayan an mga surat asin iba pa na nagkakaipo nin atension. Sa paaging ini, an mahahalagang surat dai mawawara o maaatraso.
ORGANISASYON—SARONG ORIPON, BAKONG KAGURANGNAN
14 Pakarepasoha sa saindong iskedyul, aramon kun guranong organisasyon an kaipuhan nindo. Habo niatong magin panatikong mga perpeksionista, na inoorganisar nin labi-labi an satong personal na buhay sagkod sa punto na mayo na nin lugar para sa pagkalaenlaen. Girumdoma, kita gabos indibiduwal asin an lambang saro sato may laen na kamugtakan. An iba sa sato daing agom, an iba may agom. An puwede sa sarong pamilya tibaad dai puwede sa iba. Kaipuhan na konsideraron nin personal na organisasyon an satong indibiduwal asin pampamilyang mga kamugtakan. Gumamit nin pagmansay asin magin madaling makibagay kaoyon sa mga prinsipyo kan Biblia na magseserbing giya sa saindo sa pagkaigwa nin mapangganang iskedyul.—Helingon an The Watchtower kan Setyembre 15, 1988, pahina 28-30; Awake! kan Disyembre 8, 1987, pahina 24-7; asin Awake! kan Disyembre 22, 1965, pahina 9-12.
15 Sa nakaaagi pa sanang mga taon, an paggibong simple paagi sa pagsunod sa mga prinsipyo nin marahay na areglo nagbunga nin nadugangan na pagkaepektibo kan pagpunsionar kan daganon na organisasyon ni Jehova. An iba tibaad naghohona na sinda may mga paagi na mas epektibo para sa sainda sa personal. Boot ninda na an Sosyedad sadolon an iba na gamiton an siring na mga paagi, alagad sa parate an mga ini pinagturotimbang asin dai ginamit huli ta iyan bakong praktikal sa organisasyon. Kaya, para sa pagkasararo asin epektibong pagtrabaho, madonong na kuyogon an aprobadong mga paagi sa organisasyon, na ginagamit an mga paagi na nasasabotan asin ginagamit nin iba na tibaad apektado kan saindong trabaho.
16 Si Jehova Dios nin areglo asin katoninongan. (1 Cor. 14:33, 40) Igwa sia nin itinalaan na panahon na gibohon an saiyang kabotan asin katuyohan. (Gibo 1:7) Paagi sa saiyang Tataramon, mamomoton niang isinaysay kun ano an maninigo niatong tawan nin atension bilang bakong sangkap na mga tawo. Paagi sa paggiya ni Jesu-Cristo paagi sa “maimbod asin madonong na oripon,” si Jehova nagtatao nin nakatatabang na mga instruksion kun paano mahahaman an pinakamahalagang gibohon na ginigibo ngonyan. (Mat. 24:45-47; 28:19, 20; Ecl. 12:13) Kaya paagi sa pagkuyog sa Makakasuratan na hatol na yaon sa mga publikasyon kan Sosyedad, kaiba an napapanahon na mga pagirumdom na yaon sa suplementong ini, puwede kitang magin mas organisado para sa lubos na pag-otob sa satong ministeryo.—2 Tim. 4:5.