Ano an Ineenot Nindo?

¹ Paano nindo sisimbagon an hapot na iyan? Siempre, gabos kita nagmamawot na enoton an intereses kan Kahadean. (Mat. 6:33) Alagad tibaad ihapot niato sa satong sadiri, ‘Ipinapaheling daw kan mga pagpili ko na talagang iyan an ginigibo ko?’ An Biblia nag-eenkaminar sa sato: “Padagos na patunayan kun ano man nanggad kamo.” (2 Cor. 13:5) Paano niato mapapatunayan sa satong sadiri na ineenot niato an Kahadean?

² An Satong Panahon: Puede niatong ponan paagi sa pagsiyasat kun paano niato ginagamit an satong panahon. (Efe. 5:15, 16) Guranong panahon an ginagamit niato kada semana sa pagtiripontipon, pagdalan nin telebisyon, paggamit nin Internet, o pag-aling-aling? Kun isusurat niato kun guranong panahon an ginagamit niato sa siring na mga bagay asin ikomparar iyan sa lawig nin oras na ginagamit niato sa espirituwal na mga aktibidad, tibaad masorpresa kita. Naggagamit daw kita nin halawig na oras sa trabaho na isinasakripisyo an sagradong paglilingkod tangani sanang magkaigwa kita nin mga luho? Gurano kaparate na isinasakripisyo niato an mga pagtiripon o an ministeryo tanganing makapagbiahe sa katapusan nin semana para sa pag-aling-aling?

³ Magbugtak nin mga Prioridad: An kadaklan sa sato mayo nin igong panahon tanganing gibohon an gabos na bagay na gusto niato. Kaya tanganing enoton an intereses kan Kahadean, kaipuhan na turotimbangon niato an satong mga prioridad dangan mag-iskedyul nin panahon para sa “orog na mahalagang mga bagay.” (Fil. 1:10) Kaiba sa mga ini an pag-adal kan Tataramon nin Dios, pakikikabtang sa ministeryo, pag-asikaso sa pamilya, asin pag-atender sa Kristianong mga pagtiripon. (Sal. 1:1, 2; Roma 10:13, 14; 1 Tim. 5:8; Heb. 10:24, 25) Kapakipakinabang an iba pang aktibidad, siring kan tama sanang ehersisyo asin nakakarahay na pag-aling-aling. (Mar. 6:31; 1 Tim. 4:8) Alagad an bakong gayong mahahalagang bagay na ini dai dapat makaolang sa interes kan Kahadean.

⁴ An sarong hoben na tugang na lalaki hiningoang enoton an intereses kan Kahadean paagi sa paglaog sa bilog na panahon na ministeryo imbes na magkua nin mas halangkaw na edukasyon bilang preparasyon para sa sarong sekular na karera. Sia nag-adal nin ibang lenguahe asin nagbalyo tanganing maglingkod kun saen mas dakula an pangangaipo. Sinabi nia: “Magayagaya ako digdi. Nakakaginhawang marhay an ministeryo! Mawot ko kutana na an gabos na hoben arog man kaini an gibohon tanganing manamitan man ninda an naeeksperyensiahan ko. Mayo na nin mas marahay pa kisa sa paglilingkod ki Jehova paagi sa gabos na yaon sa sato.” Iyo, an pag-enot kan Kahadean nagtatao sa sato nin mga bendisyon, alagad mas mahalaga, iyan nakakapaogma sa satong langitnon na Ama, si Jehova.—Heb. 6:10.