Kun Paano Tutuboson an Panahon
1 An pagkaigwa nin dakol na gigibohon sa paglilingkod ki Jehova nagpapadanay sa sato na sibot! (1 Cor. 15:58) Aram niato an pangangaipo na mag-adal nin personal asin bilang sarong pamilya, basahon an Biblia aroaldaw, mag-andam para sa asin umatender sa mga pagtiripon kan kongregasyon, asin makikabtang nin regular sa ministeryo sa langtad. An mga paraataman igwa nin pagpapastor asin iba pang mga paninimbagan sa kongregasyon. An nagkapira puedeng may mga paninimbagan sa pamilya o mga obligasyon sa iba. Tangani na magibo nin tama an gabos na bagay, an gabos nangangaipo nin pagkatimbang asin marahay na personal na pag-organisar.
2 Enoton an Orog na Mahalagang mga Bagay: An kapangganahan sa ‘pagtubos kan panahon para sa sato man sana’ depende sa satong pakamansay asin marahay na paghusgar. (Efe. 5:15, 16) Dapat niatong aramon kun ano an “orog na mahalagang mga bagay” asin enoton an mga iyan. (Fil. 1:10) Arog kaini an pagkaladawan nin sarong mag-agom sa saindang pamilya: “Pinano niamo nin katotoohan an samong buhay . . . An katotoohan bakong kabtang kan samong buhay, iyan an samong buhay. An gabos na iba pang bagay nakasentro dian.” Mahalaga an pag-enot sa buhay nin saro kan pagsamba ki Jehova.
3 Aramon an mga Nakasasayang nin Panahon: Igwa nin 168 oras sa sarong semana, asin kaipuhan niatong madonong na gamiton an panahon na iyan. Tangani na magkaigwa nin igong panahon para sa teokratikong mga aktibidad, kaipuhan niatong aramon asin inaan an mga nakasasayang nin panahon. Ihinayag nin sarong surbey na an kasiahan na adulto sa Estados Unidos naggagamit nin labing 30 oras kada semana sa pagdalan nin TV! Para sa iba, dakol na panahon an nauubos sa pagbasa nin kinabanon na literatura. May mga tibaad nagdudusay nin kadakoldakol na panahon sa sosyal na mga aktibidad, pag-aling-aling, o aktibidad sa komputer. Madonong na siyasaton an satong pan-aroaldaw na rutina asin magbugtak nin mga limitasyon sa panahon na itinotogot niato para sa bakong mahahalagang aktibidad.
4 Gumibo nin Marahay na Rutina: Ano man an satong personal na mga kamugtakan, an kada saro sa sato makatutubos nin panahon para sa espirituwal na mga aktibidad. Nanompongan kan iba na an pagpoon nin mas amay kada aldaw nakatatabang sa sainda na mas dakol an magibo. Kun dakol na oras an ginagamit niato sa pagbiahe pasiring sa trabaho o paghalat sa iba, puede niatong gamiton an nagkapira sa oras na iyan para sa pagbasa kan Biblia, pag-andam para sa mga pagtiripon, o pagdangog sa mga cassette na itinatao kan Sosyedad. Dakula an pakinabang nin mga pamilya paagi sa pagtagama nin espesipikong panahon tangani na mag-adal nin iriba. Kun an kada miembro kan pamilya maabot nin tama sa oras para sa pampamilyang pag-adal, an gabos makikinabang huling mayong panahon na nasasayang.
5 Sa pag-agi nin kada aldaw, nagigin kitang orog na nakaaaram na “nainaan na an panahon na natatada.” (1 Cor. 7:29) An satong buhay depende sa kun paano niato ginagamit an natatada pang panahon. Bebendisyonan kita kun tinutubos niato an panahon asin sa siring padagos na ineenot an intereses kan Kahadean!—Mat. 6:33.