Pag-aatubang kan Maogmang Bareta na May Positibong Kaisipan
1 Kita gabos gustong makanompong nin kagayagayahan sa satong ginigibo, espesyalmente sa paggibo nin mga disipulo. Ano an nagtatao sa sato nin siring na satispaksion? Minapoon iyan sa satong pagpapadanay nin positibong mental na kaisipan kun tinatabangan an iba. (Tal. 11:25) An satong ugale sa pag-atubang kan maogmang bareta maninigong magpaheling na kita tunay na naniniwala sa satong sinasabi. Kun kita nagtataram gikan sa satong puso, sa siring an satong sinseridad asin personal na kombiksion maliwanag. (Luc. 6:45) Paagi sa pag-ensayo kan satong pag-atubang, magigin kitang orog na kompiado kun nakikipag-olay sa mga tawo. Tatabangan kita kaini nangorogna ngonyan na Setyembre kun iinaalok an librong Life—How Did It Get Here? By Evolution or by Creation? Puede nindong manompongan na makatatabang an minasunod na mga suhestion.
2 Kun iinaalok an librong “Creation,” puede nindong sabihon ini sa enot na pagsongko:
◼ “Sa pakikipag-olay sa satong mga kataed, nanompongan niamo na an iba may kompiansa sa Dios. An iba nasasakitan na magtubod sa saiya. Ano an saboot nindo? [Pasimbagon.] Mangnoha kun paano an Biblia nangangatanosan sa bagay na ini. [Basahon an Roma 1:20.] Maheheling niato an prueba kan ‘daing sagkod na kapangyarihan asin pagka-Dios’ nin Dios paagi sa pagmasid sa mga bagay na linalang nia.” Basahon an ultimong parapo sa pahina 48 kan librong Creation, asin darahon an atension sa pagigin komplikado kan buhay na selula. O gamiton an parapo 18 sa pahina 147 tangani na ipaheling kun paano an makangangalas na sistema nin sirkulasyon kan kahoy nagtatampok kan gibo nin sarong Kaglalang. Ialok an libro asin iareglo na madalaw liwat.
3 Kun minadalaw liwat sa mga pinaliwanagan nindo kan pagigin Kaglalang nin Dios, tibaad boot nindong sabihon ini:
◼ “Kan nakaagi kong pagdalaw, napag-olayan niato an manongod sa ebidensia kan pag-eksister nin Dios—an saiyang makangangalas na linalang. Nadedepisilan daw kamong maniwala na an Saro na naglalang kan uniberso magigin interesado man sa satong ngapit? [Pasimbagon.] Interesanteng mangnohon na an ngapit dineterminaran na kan Kaglalang.” Basahon an Isaias 46:9, 10. Depende sa interes kan indibiduwal, gamiton an mga retrato asin kapsion sa kapitulo 19 kan librong Creation tangani na itampok an pinakamarahay na mga kamugtakan na ipinanuga nin Dios. Basahon an parapo 1 kan kapitulo 20, asin mag-alok nin pag-adal sa Biblia. Kun akoon, ponan an pag-adal sa librong Kaaraman.
4 Puede nindong probaran an pag-atubang na ini kun iinaalok an librong “Creation”:
◼ “Sa pakikipag-olay sa saindong mga kataed, naobserbaran ko na an kadaklan naghihidaw sa sarong tiwasay na komunidad asin matoninong na kinaban. Taano sa paghona nindo ta an tawo nasudya na magkamit nin siring na mga kamugtakan? [Pasimbagon.] An ibang namomoon tibaad sinsero asin may ginigibong karahayan, alagad riparoha an isinasadol kan Biblia.” Basahon an Salmo 146:3, 4; dangan hapoton: “Igwa daw nin saro na makapaninigo kan mga pangangaipo nin tawo?” Basahon an bersikulo 5 asin 6. Ipaheling an retrato sa pahina 251 kan librong Creation, asin darahon an atension sa mga pakinabang sa reglamento nin Dios. Ialok an libro.
5 Kun pinag-olayan kan enot an pamamahala nin Dios, puede nindong probaran an suhestion na ini sa pagdalaw liwat:
◼ “Kan ako nagdigdi pirang aldaw pa sana an nakaagi, napag-olayan niato an pagkasudya nin tawo na magdara nin katoninongan digdi sa daga. Tibaad nagigirumdoman nindo an dahelan na itinatao kan Biblia sa siring na pagkasudya. [Basahon giraray an Salmo 146:3.] Nariparo daw nindo kun taano an Dios ta nagsasadol sa sato na dai ibugtak an satong mga paglaom sa mga tawo? [Pasimbagon.] Tibaad oyon kamo na an ano man na paglaom para sa sarong permanenteng solusyon kaipuhan na gumikan sa Dios. An dahelan na puede kitang magkaigwa kan kompiansang ini ipinaliliwanag sa Salmo 146:10. [Basahon.] Kun boot niatong magin sakop kan Kahadean nin Dios, ano an dapat niatong gibohon?” Buksan an pahina 250 kan librong Creation, basahon an parapo 13, asin itampok an Juan 17:3. Alokon na idemonstrar kun paano magkakamit kan kaaraman na minagiya pasiring sa buhay na daing katapusan. Kun nagtogot, iintrodusir an librong Kaaraman asin ponan an pag-adal.
6 Kun naghuhulit sa mga tindahan, puede nindong gamiton an halipot na pag-atubang na ini na dara an librong “Creation”:
◼ “Ngonyan nagtatao kami nin espesyal na paglilingkod sa mga negosyante kan komunidad. Kita gabos nahahadit sa pagdakol nin krimen asin kadahasan sa satong lugar. Sa paghona daw nindo igwa nin siisay man na may tunay na solusyon sa problemang iyan? [Pasimbagon.] An Dios may solusyon.” Buksan an pahina 196 kan librong Creation; basahon asin komentohan an Talinhaga 2:21, 22 sa parapo 19. Ipaheling an titulo kan kapitulo 16, asin ialok an libro.
7 Kun minadalaw liwat sa sarong negosyante na napasakamotan nindo kan librong “Creation,” puede nindong sabihon ini:
◼ “Kan nakaagi kong pagdalaw, nasambit ko na an Dios an solamenteng saro na talagang igwa nin nagdadanay na solusyon sa krimen asin kadahasan. Sono sa saiyang panuga, makapagtitiwala kita na magigin totoo an sarong matoninong na daga. Mangnoha an pagpipilian na itinatao sa kada saro sa sato.” Basahon an parapo 11 sa pahina 250 kan librong Creation, kabale an Salmo 37:37, 38. Komentohan an retrato sa pahina 251, asin basahon an enot na sentence sa parapo 14. Mag-alok nin daing bayad na pag-adal sa Biblia sa harong, na kokonduktahan magsalang sa saindang lugar nin negosyo o sa saindang harong.
8 Bilang “mga katabang nin Dios,” igwa kita kan gabos na dahelan na magin positibo kun iinaatubang an maogmang bareta. (1 Cor. 3:9) An satong pagpapadanay kan kaisipan na ini magreresulta sa mayaman na bendisyon ni Jehova.