Ihulit an Kahadean
1 Sa Hebreo 10:23, dinadagka kitang ‘mangapot nin pusog sa hayag na pagtuga kan satong paglaom.’ Asin an satong paglaom yaon sa Kahadean nin Dios. Ipinagboot ni Jesus na dapat na ihulit an maogmang bareta kan Kahadean sa gabos na nasyon. (Mar. 13:10) Kaipuhan na isaisip niato ini sa satong ministeryo.
2 Kun nakikipag-olay kita sa mga tawo, pinagmamaigotan niatong ponan an pag-orolay dapit sa sarong bagay na ikinahahadit ninda. Sa parate sinasambit niato an mga bagay na aram na marhay ninda, siring baga kan krimen sa komunidad, mga problema nin hobenes, mga paghadit manongod sa paghanap-buhay, o krisis sa mga aktibidad kan kinaban. Huling an isip nin kadaklan na tawo nakasentro sa ‘mga paghadit na ini sa buhay,’ kun sinasambit niato an mga iyan, parateng mapahayag an mga tawo kun ano an iniisip ninda. (Luc. 21:34) Puedeng buksan kaini an dalan na ikahiras niato an satong paglaom.
3 Minsan siring, kun bako kitang maingat, an pag-orolay puedeng magdanay sa negatibong mga bagay sagkod sa punto na dai na niato nagigibo an katuyohan kan satong pagdalaw—ihulit an mensahe kan Kahadean. Maski ngani dinadara niato an atension sa maraot na mga kamugtakan, an satong pasohan iyo na darahon an atension sa Kahadean, na maresolber kan gabos na problema nin katawohan. Igwa kita nin makangangalas na paglaom na kaipuhan na marhay na madangog nin mga tawo. Kaya mantang tibaad sa pagpoon ipinakikipag-olay niato an ‘delikadong mga panahon na ini na masakit pakibagayan,’ maninigo niatong tolos-tolos na isentro an atension sa satong pangenot na mensahe, an “daing katapusan na maogmang bareta.” Paagi kaini lubos niatong maootob an satong ministeryo.—2 Tim. 3:1; 4:5; Kap. 14:6.