Sinasabi Niato sa Iba an Satong Paglaom sa Kahadean
1 Durante kan delikadong huring mga aldaw na ini, dakol sa kinaban an mayo nin paglaom. (Efe. 2:12) An iba bakong madonong na nagsarig sa saindang materyal na kayamanan, namamahalang mga tawo, siensia sa presenteng panahon, asin iba pa. Maogma nanggad kita na igwa kita nin tunay na paglaom sa ngapit, sarong paglaom na garo “angkla para sa kalag, sierto sagkod marigon”!—Heb. 6:19.
2 Sa pamamahala kan Kahadean nin Dios, an daga liliwaton asin magigin sarong paraiso. Bubuhayon liwat an nagadan na mga namomotan. (Gibo 24:15) Mayo na nin kadukhaan, inhustisya, helang, paggurang, asin kagadanan. (Sal. 9:18; Mat. 12:20, 21; Kap. 21:3, 4) Ini an nagkapira sa mga panuga ni Jehova na madali nang maotob. Arin na aspekto kan satong paglaom an nangorognang inaantisipar nindo?
3 Magpahayag kan Maogmang Bareta: Dai niato dapat sadirihon an paglaom sa Kahadean. An pagkamoot sa Dios patin sa kapwa nagpapahiro sa sato na arogon si Jesus saka “na magpahayag kan maogmang bareta sa mga dukha, . . . na maghulit nin pagkabutas sa mga bihag asin nin pagpauli kan pagheling sa mga buta, na magbutas sa mga inapi.” (Luc. 4:18) Ihinulit ni apostol Pablo an maogmang bareta sa sadan asin saen man nanompongan an mga tawo. Sia nagin sibot na gayo sa ministeryo. (Gibo 18:5) An pag-arog sa saiyang halimbawa nin maigot na pakikikabtang sa ministeryo an maolang sa garo pagrumarom kan satong Kristianong paglaom huli sa ‘mga kahaditan sa sistemang ini nin mga bagay asin mapandayang kapangyarihan nin kayamanan.’—Mar. 4:19.
4 Dai nawawara an satong Kristianong paglaom kun nakakanompong kita nin indiperenteng mga tawo, na daing gayo nagpapahalaga sa mensahe kan Kahadean, o minalataw na nagkokontra sa sato. ‘Nangangapot kita nin higot sa pagpapahayag sa publiko kan satong paglaom na daing pag-urong-sulong.’ (Heb. 10:23) Dai niato “ikinakasupog an maogmang bareta.” (Roma 1:16) Tibaad an satong heling-heling asin makosog na pagtubod saka pagmamaigot makapahiro sa nagkapira na maghinanyog pag-abot nin panahon.
5 Minsan ngani angay na darahon niato an atension nin mga tawo sa naggagrabeng mga kamugtakan sa kinaban na kaotoban kan hula sa Biblia, bako kitang mga parahula dapit sa nagdadangadang na kapahamakan. Imbes, an satong ministeryo nakasentro sa satong paglaom sa Kahadean—an maogmang bareta kan Kahadean nin Dios. Logod na ihulit niato an maogmang baretang ini na may makosog na pagtubod asin kaigotan “tanganing magkaigwa kan lubos na kasiertohan kan paglaom sagkod sa katapusan.”—Heb. 6:11.