Maglakaw Bilang mga Madonong
1 Kan inagda ni Jesus an apat na parasira na magin mga parasunod nia, dai ninda inatraso an saindang desisyon kundi “tolos-tolos na . . . sinda nagsunod sa saiya.” (Mat. 4:18-22) Kan si Saulo na taga Tarso makombertir dangan makaheling giraray, dai man sia nag-atraso kundi “tolos man sa mga sinagoga pinonan niang ihulit si Jesus.” (Gibo 9:20) An panahon daing ontok na nag-aabante; kun iyan lumihis na, iyan mayo na sagkod lamang. Iyan an dahelan kun taano ta mahalaga na kita ‘maglakaw bilang mga madonong’ mapadapit sa kun paano niato ginagamit an satong panahon.—Efe. 5:15, 16.
2 Pagkanorongod: An mga oportunidad niato ngonyan na maglingkod ki Jehova tibaad mayo na sa aga. (Sant. 4:14) Mayo nin siisay man na libre sa “pagkanorongod.” (Ecl. 9:11) Saro pa, gabos kita naggugurang, asin an “kapahapahamak na mga aldaw” na kaiba nin naglalangkaw na edad asin na nakakalimitar sa kaya niatong gibohon sa paglilingkod ki Jehova dai madudulagan sa presenteng sistemang ini nin mga bagay. (Ecl. 12:1) Kun siring, bakong madonong na mag-atraso sa pagdusay sa Dios o maghalat nin pinakamarahay na mga kamugtakan bago pahiwason an satong ministeryo sagkod sa mapupuede sa presente. (Luc. 9:59-62) Nakanompong si Abraham nin katoninongan asin katrangkilohan sa huring mga taon nia, na nagadan na “gurangon na asin kontento” huli ta ginamit nia an saiyang buhay sa madonong na paagi, na biyong dedikado ki Jehova.—Gen. 25:8.
3 Nainaan Na an Panahon: Gusto man niatong gamiton an satong panahon sa madonong na paagi huli ta “nainaan na an panahon na natatada.” (1 Cor. 7:29-31) Dai na nanggad mahahaloy, matatapos na an daan na sistemang ini nin mga bagay. Matatapos na an mga oportunidad na makikabtang sa dakulang pagtipon nin mga arog-karnero durante kan ‘pag-ani sa daga.’ (Kap. 14:15) Dapat na magin maingat kita na dai pagtogotan an mga kahaditan asin disturbo sa buhay na kuanon an panahon niato na mas kapakipakinabang na magagamit sa ministeryo. (Luc. 21:34, 35) Nakakakontento nanggad na girumdomon an nakaagi sa pakaaram na kita lubos na nakikabtang sa pag-ani!
4 Dapat kitang magin mapagbantay nin daing ontok tanganing dai kita mawaran nin oportunidad na makikabtang sa nakakagayagayang mga pribilehio sa paglilingkod na tibaad umabot sa sato. Magin determinado kitang gibohon an gabos na makakaya niato tanganing maglingkod ki Jehova “sagkod na iyan maaapod pang ‘Ngonyan.’” (Heb. 3:13) Paagi sa paggibo kaiyan, ipapaheling niato na talagang madonong kita, huli ta “an naggigibo kan kabotan nin Dios magdadanay sagkod lamang.”—1 Juan 2:17.