Naoogma Kitang Gamiton an Satong Sadiri sa Paglilingkod ki Jehova!
1 Naogma si apostol Pablo na ‘lubos na magpagamit’ tanganing maotob an saiyang Kristianong ministeryo. (2 Cor. 12:15) Siring man ngonyan, dakol na Kristiano an maigot sa gibohon bilang payunir. An iba na may magabat na mga paninimbagan sa pamilya nagtatao nin panahon na makikabtang sa ministeryo kada semana sa ibong kan saindang sibot na iskedyul. An nagkapira na may grabeng mga problema sa salud ginagamit an saindang limitadong kosog tanganing paoswagon an intereses kan Kahadean. Nakakaparigon nanggad sa boot na maheling an banwaan ni Jehova, ano man an edad o mga kamugtakan, na ginagamit an saindang sadiri sa paglilingkod ki Jehova!
2 Pagkamoot sa Kapwa: An paggibo kan bilog niatong makakaya tanganing paglingkodan si Jehova, na ipinapaheling an pagkamoot sa Dios asin sa kapwa, nagtatao sa sato nin malinig na konsensia. Huling itinao ni Pablo an saiyang kalag sa pagpaabot kan maogmang bareta, maogma siang makakapagsabi: “Inaapodan ko kamong magpatotoo sa aldaw mismong ini na malinig ako sa dugo kan gabos na tawo.” (Gibo 20:24, 26; 1 Tes. 2:8) Paagi sa pakikikabtang sa ministeryo sagkod na itinotogot kan satong mga kamugtakan, malilikayan niato na magkasala sa dugo.—Ezeq. 3:18-21.
3 An pagmamaigot na tabangan an iba nagtatao sa sato nin kaogmahan. (Gibo 20:35) An sarong tugang na lalaki nagsabi: “Pagkabanggi, asin pakapuli ko pakatapos nin sarong aldaw na paglilingkod ki Jehova, pagal ako, totoo iyan. Alagad maogma ako, asin nagpapasalamat ako ki Jehova huli sa pagtao sa sako nin kagayagayahan na dai kayang agawon nin siisay man.”
4 Pagkamoot sa Dios: An pinakamahalagang dahelan sa paggamit kan satong sadiri sa paglilingkod ki Jehova iyo na nakakapaogma iyan sa satong langitnon na Ama. An pagkamoot sa Dios nakakapahiro sa sato na kuyogon an saiyang mga togon, na kaiba an paghuhulit asin paggibo nin mga disipulo. (1 Juan 5:3) Dawa kun an mga tawo daing labot o nagkokontra, magayagaya kitang padagos na nagmamaigot para ki Jehova.
5 Bako ngonyan an panahon na magluwayluway. Nabubuhay kita sa panahon nin pag-ani. (Mat. 9:37) Parateng nagtatrabaho nin dakol na oras an paraoma sa panahon nin pag-ani huli ta limitado sana an saiyang panahon na tiponon an inani bago iyan magpoon na maraot. An panahon na itinotogot para sa espirituwal na pag-ani limitado man. Ginigirumdom an panahon na kinabubuhayan niato, logod na kita gabos padagos na maghingoa nin maigot sa ministeryo.—Luc. 13:24; 1 Cor. 7:29-31.