Pagdadanay na Sibot sa Paglilingkod ki Jehova

¹ Tunay na dakulang pribilehiyo niato na maglingkod ki Jehova. Mantang nagkamit kita nin tamang kaaraman manongod sa saiya asin sa saiyang bugtong na Aki, si Jesus, kita napahihiro nin pagkamoot na lubos na magmaigot sa pag-otob sa Saiyang kabotan. (Juan 17:3) Tibaad mapagal kita, pero tinatawan kita nin kosog ni Jehova tanganing magin abunda an satong puwersa.​—Isa. 40:29.

² Paano an pinakamarahay na paagi na ikapaheling an satong pag-apresyar sa dakulang pagkamoot na ipinahayag sa sato ni Jehova Dios asin ni Jesu-Cristo? (2 Cor. 5:​14, 15) An sarong pangenot na paagi iyo an pag-arog ki Jesus, na daing kapagalan na nagpatotoo manongod sa ngaran asin Kahadean kan saiyang Ama. (1 Ped. 2:21) Kun kita may marigon na pagtubod, an satong buhay masisentro sa gibohon na itinao nin Dios na paghuhulit kan maogmang bareta.​—Mat. 24:14.

³ Igwa daw nin pinakahababang oras na maninigo niatong idusay sa ministeryo sa langtad? Laen-laen an kamugtakan. Tibaad limitado kita huli sa kagurangan, maluyang salud, o mga paninimbagan sa pamilya. Pero, kita gabos hinahagadan na gibohon an bilog niatong makakaya sa satong paglilingkod ki Jehova. (2 Tim. 2:15) May mga oportunidad na bukas sa lambang saro sa sato sono sa satong indibiduwal na kamugtakan. Ano an nagkapira digdi?

⁴ Mga Paaging Mapahiwas an Satong Ministeryo: Enot maninigo na magin kitang interesado na paoswagon an kuwalidad kan satong ministeryo. Ini magigibo paagi sa pagkultibar sa orog na abilidad bilang paratokdo. An saro sa mayor na mga katuyohan kan Teokratikong Paadalan sa Pagmiministro tabangan kita na magin orog na epektibo sa ministeryo sa langtad. Iniisip daw niato an paglilingkod sa langtad kun inaandam niato an satong mga asignasyon? Iinaaplikar daw niato an konsehong inaako niato tanganing mapaoswag niato an satong personal na ministeryo? (sg p. 96-9) Siring man, dakol na suhestion sa ministeryo sa langtad an itinatao sa Pagtiripon sa Paglilingkod. Gamiton niato ini sa pinakamadaling panahon.

⁵ Ikaduwa, horophoropon an posibilidad na liwaton an saindong kamugtakan tangani kamong makapakikabtang sa pag-auxiliary o pagregular payunir. An paggibo kaiyan tunay na papagdadanayon kamong sibot sa paglilingkod sa satong Ama, si Jehova. (1 Cor. 15:58) Ano kun dai nindo kayang magpayunir? Ikapaheheling nindo an espiritu nin pagpapayunir paagi sa pagpatalubo sa hararom na pagmakolog sa mga tawo sa teritoryo. Puwede man nindong gamiton an gabos na oportunidad na tabangan an mga sinsero na mamidbid si Jehova paagi sa pagdalaw liwat asin pangangadal sa Biblia.

⁶ Kan enot niatong manodan an katotoohan, an pagkamoot ki Jehova asin ki Cristo Jesus nagpahiro sato na gumibo nin darakulang pagkaliwat sa satong buhay. Ngonyan, mantang nagtatalubo an satong pag-apresyar sa satong relasyon sa satong langitnon na Ama asin sa ginibo kan saiyang Aki para sa sato, may magigibo pa daw kitang mga pagliliwat tanganing mapahiwas an satong ministeryo? Kita logod gabos maghingoa paagi sa pagdadanay na sibot sa paglilingkod ki Jehova.​—Roma 12:11.