Mga Paagi na Mapahiwas an Saindong Ministeryo
1 Labing 40 taon na an nakaagi, an artikulong may temang “Is Your Best Good Enough?” (sa Bicol, “Igo na daw an Pinakamakakaya Nindo?”) nagluwas sa Enero 15, 1955 Watchtower. Mamomoton na itinokdo kaiyan kun paano puedeng magin posible para sa banwaan ni Jehova na paoswagon an saindang indibiduwal na paghihingoa sa ministeryo tangani na madugangan ninda an saindang aktibidad na pan-Kahadean. An marahay na sadol na iyan aplikado man ngonyan, mantang padagos niatong ginigibo an pinakamakakaya niato.
2 An gabos niatong paglilingkod maninigong mamotibar kan pinakadakulang togon: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Mar. 12:30) Ipinaheheling niato an satong bulaos na pagkamoot ki Jehova paagi sa paggamit nin lubos kan mga oportunidad na yaon sa sato sa pagpalakop kan saiyang gibohon na pan-Kahadean. Konsideraron an minasunod na mga paagi tangani na mapahiwas nindo an saindong ministeryo.
3 Isaabaga an Saindong Paninimbagan: An nagdusay na mga tugang na lalaki puedeng magmaigot na makualipikar bilang ministeryal na mga lingkod dangan umoswag pasiring sa paglilingkod bilang mga magurang sa kongregasyon. An mga artikulong “Naghihingoa daw Kamo?” asin “Kualipikado daw Kamong Maglingkod?,” sa Setyembre 1, 1990 luwas kan An Torrengbantayan, minotibar an dakol na tugang na lalaki na magin sindang andam na gamiton para sa mga paninimbagan sa kongregasyon. Hapoton an saindong lokal na kamagurangan para sa espesipikong mga suhestion kun paano maghihingoa asin makukualipikar.
4 An kamagurangan asin ministeryal na mga lingkod na daing agom inaagda na odok na isip-isipon an dapit sa pag-aplay sa Paadalan sa Ministeryal na Pagsasanay. Puede kamong magin pamilyar sa paadalan na ini paagi sa pagbasa kan mga reperensia na nasa irarom kan “Ministerial Training School” sa Watch Tower Publications Indexes para sa 1986-1995, 1996, asin 1997. Naheheling daw nindo an ‘dakulang tatang iyan nin gibohon’ na nabubukasan sa atubangan nindo? (1 Cor. 16:9a) An dakol na tugang na lalaki na naglaog dian nungkang inimahinar an gabos na pribilehio nin paglilingkod pagkagradwar. Ngonyan sinda maogmang naglilingkod sa Bethel o sa langtad bilang mga espesyal payunir, misyonero, o mga paraataman sa sirkito.
5 Maghingoa Para sa Bilog na Panahon na Paglilingkod: An mga hoben na magradwar sa haiskul, mga misis sa harong, asin siisay man na nagretiro na maninigong odok na isip-isipon an pagpapayunir. Repasohon an suplemento kan Hulyo 1998 An Satong Ministeryo sa Kahadean, dangan makipag-olay sa mga payunir na an mga kamugtakan kaagid kan sa saindo mismong buhay. Tibaad mamotibar kamong pahiwason an saindong ministeryo paagi sa pagpapayunir, siring kan ginigibo ninda. (1 Cor. 11:1) Ano an kaipuhan tanganing mapahiwas an saindong aktibidad sagkod sa 70 oras kada bulan asin sa siring maglingkod bilang regular payunir?
6 Maglingkod kun Saen Mas Dakula an Pangangaipo: Kamo daw nag-iistar sa lugar na an teritoryo parateng gayo na nagigibo o dakol an tugang na lalaki na makatatabang sa pasan. Napaghorophorop na daw nindo an dapit sa pagpahiwas kan saindong ministeryo paagi sa pagbalyo kun saen mas dakula an pangangaipo? Tibaad puedeng bumalyo sa sarong haraning puerang lugar kun saen nangangaipo nin dakol pang trabahador. (Mat. 9:37, 38) Ini dai maninigong gibohon nin dali-dali. Iyan angay na mapagngayongayong estudyaran. (Luc. 14:28-30) Ipakipag-olay an saindong situwasyon sa kamagurangan asin sa paraataman sa sirkito. Ipaliliwanag ninda sa saindo kun baga madonong na gibohon an siring na pagbalyo ngonyan o mag-andam na gibohon iyan sa ngapit. Siring man, tibaad an paraataman sa sirkito may aram na mga lugar sa laog kan saiyang sirkito na nangangaipo nin tabang asin na magigin praktikal para sa saindo. Kun boot nindong sumurat sa Sosyedad para sa suhestion sa kun saen kamo puedeng bumalyo, dapat na kaiba kan saindong surat an sarong surat na pirmado kan saindong Komite sa Paglilingkod kan Kongregasyon.
7 Paoswagon an Kualidad kan Saindong Paglilingkod: Posibleng kita gabos biyo pang makapakikikabtang sa ministeryo paagi sa pagpaoswag kan kualidad kan satong paglilingkod sa langtad. Kamo daw nakikiiba sa gabos na kabtang kan gibohon, kabale an pagharongharong asin impormal na pagpapatotoo saka an pagdalaw liwat patin gibohon na pag-adal sa Biblia? Kun kamo nagkokondukta nin pag-adal, puede daw nindong paoswagon an saindong arte nin pagtotokdo? Marahay na repasohon an suplemento kan Hunyo 1996 na An Satong Ministeryo sa Kahadean para sa mga suhestion na magagamit nindo tangani na motibaron an saindong mga inaadalan pasiring sa pagdusay asin bautismo.
8 An mas mahiwas na paliwanag manongod sa mga paagi na mapahiwas asin mapaoswag an satong ministeryo makukua sa kapitulo 9 kan Organized to Accomplish Our Ministry. Seguradong minamawot niato gabos na gibohon an pinakamakakaya sa paglilingkod sa Dios. Taano ta dai odok na horophoropon an saindong espirituwal na mga pasohan? Gibohon an irinerekomendar kan 1 Timoteo 4:15: “Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.”