Padakolon an Saindong Kayamanan na Paglilingkod sa Kahadean
1 Iinagid ni Jesus an paglaom sa Kahadean sa kayamanan na daing kaagid an halaga. (Mat. 13:44-46) Kita daw siring kan mga tawo sa mga ilustrasyon ni Jesus na ipinabakal an gabos nindang rogaring tanganing bakalon an sarong bagay na orog kahalaga? Kun iyo, tatawan niato nin enot na halaga an Kahadean nin Dios.—Mat. 6:19-22.
2 Mantang an satong paglilingkod sa Kahadean sarong kayamanan, maninigo na an satong pagmawot padakolon iyan. Pinadadakol daw niato an satong aktibidad sa Kahadean? Magigibo niato iyan paagi sa pakikikabtang sa pagharongharong, paggibo nin mga pagdalaw liwat, pagkondukta nin mga pag-adal sa Biblia, asin impormal na pagpatotoo.
3 Paano Ko daw Mapapadakol an Sakong Kabtang?: Sa pagpoon kan bagong taon nin paglilingkod, marahay na repasohon kan kada saro an saiyang personal na aktibidad asin maghapot: ‘Puwede ko daw na iareglo an sakong mga aktibidad tanganing makapalista bilang auxiliary payunir sa panapanahon o padagos pa ngani? Paagi sa pirang pagliliwat, puwede daw akong lumaog sa paglilingkod bilang payunir?’ An bagong mga payunir na nagpalista ngonyan na Setyembre 1 kuwalipikadong umatender sa Paadalan sa Payunir na Paglilingkod sa masunod na taon.
4 May mga parahayag na nagbugtak nin personal na pasohan na gumibo nin orog pang impormal na pagpatotoo. An iba puwedeng makamate nin pangangaipo na umoswag sa paggibo nin epektibong mga pagdalaw liwat o pagpoon nin bagong mga pag-adal sa Biblia.
5 Kun naririsa niato na limitado an satong ministeryo, ano an magigibo niato na mapahiwas iyan? An mga nagin mapanggana nagrerekomendar na determinaron nguna niatong enoton an intereses kan Kahadean ano man an pagsakripisyo. (Mat. 6:33) Kaipuhan an biyong pagsarig ki Jehova. (2 Cor. 4:7) Hagadon an saiyang tabang paagi sa pamibi. (Luc. 11:8, 9) Makakasarig kita na bebendisyonan ni Jehova an satong mga paghihingoa na dugangan an satong kabtang sa paglilingkod saiya.—1 Juan 5:14.
6 Kaolayon an iba na mapangganang pinadakol an saindang ministeryo. Hapoton sinda kun paano ninda napangganahan an mga kaolangan. An saindang mga eksperyensia puwedeng makakombensir saindo na kayang aboton an pinadakol na ministeryo.
7 Kun binabasa nindo an mga artikulo sa An Torrengbantayan o An Satong Ministeryo sa Kahadean na ipinapaliwanag an paglilingkod sa langtad, mapagngayongayong horophoropon kun paano nindo ikakaaplikar an mga suhestion. Gibohon man iyan kun nag-aatender sa mga pagtiripon sa kongregasyon o asamblea. An mga suhestion sa artikulong ini basado sa programa sa pansirkitong asamblea kan nakaaging taon. Iyan an enot sa serye nin mga artikulo na dinisenyo tanganing tabangan kita na iaplikar an pagpapakosog na itinao kan programang iyan.
8 Ginibo ni Jesus an saiyang ministeryo na pangenot na mahalaga. Nagsabi sia: “An sakong kakanon iyo an sakong paggibo kan kabotan nia na nagsugo sako.” (Juan 4:34) Nakakamate daw kita nin siring kaiyan? Kun iyo, maghihingoa kitang padakolon an satong aktibidad asin ihiras sa iba an “marahay na mga bagay” hale sa satong sarayan nin kayamanan.—Mat. 12:35; Luc. 6:45.