Dai Sinda Nagpogol sa Pagpatotoo
1 An satuyang ngaran, mga Saksi ni Jehova, nagsasabi kan satong ginigibo. Kita nagpapatotoo sa mga karahayan kan satong Dios, si Jehova. (Isa. 43:10, 12) An kada saro kaipuhan na makikabtang sa pagtao kan patotoong ini kun boot niang magin miembro kan kongregasyon. Kalabot sa pagpatotoo an pagdalaw sa harong-harong, paghuhulit sa tinampo, paggibo nin mga pagdalaw liwat, asin pagkondukta nin mga pag-adal sa Biblia. Kita gabos tamang dinadagka na pag-aaboton an lubos na pakikikabtang.—1 Cor. 15:58.
2 Pero, an ibang miembro kan kongregasyon limitado sa saindang kayang gibohon. An grabeng helang o diperensia puwedeng padanayon sindang mayong maginibo. An nagtutumang na mga paryentes puwedeng mag-atubang nin makatatakot na mga kaolangan. An sarong hoben tibaad estriktohan nin daing pagtubod na magurang. An mga nag-iistar sa puwerang mga lugar puwedeng makamate na haros imposible na magpatotoo. An pagkamasusopgon puwedeng magpangyari sa mga masusopgon na sumibog. May mga parahayag sa mga situwasyon na ini na puwedeng makamate na sinda dai nakakaabot sa pagigin mga Kristiano huling kadikit kan nagigibo ninda kisa sa iba. Mayong dahelan tanganing menuson ninda an saindang mga paghihingoa. (Gal. 6:4) Nararanga sinda sa pakaaram na naoogma si Jehova kun ginigibo ninda an saindang pinakamakakaya sa ano man na situwasyon na kinamumugtakan ninda.—Luc. 21:1-4.
3 Paghanap nin Paagi na Makapakikabtang: Rinibong eksperyensia an nagpapaheling kun paanong an mga indibiduwal dai tinogotan an mga kaolangan sa saindang pagpatotoo. Ginagamit an saindang sadiring kabotan, guminibo sinda nin manlaenlaen na paagi nin impormal na pagpatotoo. An mga perming yaon sa harong ginamit an telepono sa pagpatotoo. An kada bisita minamansay na potensial na paradangog. Dawa ngani an sarong agom na babae na may nagkokontrang pamilya dai puwedeng makapatotoo sa harong, inaaprobetsaran nia an mga oportunidad na makipag-olay sa mga kataed o sa iba sa saiyang pan-aroaldaw na rutina.
4 An sarong hoben tibaad pagbawalan nin daing pagtubod na magurang na makikabtang sa pampublikong pagpatotoo. Imbes na akoon iyan bilang dai mapapangganahan na kaolangan, puwede niang mansayon an saiyang mga kaklase asin maestro bilang saiyang personal na “teritoryo” asin makatao nin marahay na patotoo asin tibaad makakondukta pa ngani nin mga pag-adal sa Biblia. Dakol na nag-eerok sa hararayong lugar an nakapakikabtang paagi sa pagsurat. An mga minotibar nin Kristianong kaigotan perming maghahanap nin paagi tanganing malikayan na magin “inaktibo o daing bunga mapadapit sa tamang kaaraman kan satong Kagurangnan na Jesu-Cristo.”—2 Ped. 1:8.
5 Nagtao si Jehova nin pararehong pamantayan para sa gabos, arin na baga, na kita maninigong magin “bilog na kalag” sa satong pagpatotoo. (Col. 3:23) Maski ngani magigin manlaenlaen an kadakolan kan ginagamit niatong oras, pareho an motibo—tunay na pagkamoot na naggigikan sa “bilog na puso.” (1 Cron. 28:9; 1 Cor. 16:14) Kun itinatao niato an pinakamakakaya niato, nungka kitang makakamate na kita daing pakinabang bilang mga miembro kan kongregasyon huli ta dikit an kaya niatong gibohon. Siring ki Pablo, sadiosan niatong masasabi na kita ‘dai nagpogol sa pagsabi kan mga bagay na kapakipakinabang ni sa pagtokdo sa publiko.’—Gibo 20:20.