Bagong mga Pamamaagi nin Pagpapatotoo sa Publiko
1. Anong halimbawa an itinao kan mga Kristiyano kan inot na siglo?
1 Bako sanang pagharong-harong an ginibo kan mga Kristiyano kan inot na siglo. Naghulit man sinda sa publiko. (Gui. 20:20) Halimbawa, nagduman sinda sa templo, kun sain dakul an tawo. (Gui. 5:42) Kan nasa Atenas si apostol Pablo, aroaldaw siyang naghulit sa mga tawo sa saudan. (Gui. 17:17) Sagkod ngunyan, an panginot na paagi ta nin pagpalakop kan maugmang bareta iyo an pagharong-harong. Minsan siring, nagduduman man kita sa mga paradahan, lugar nin negosyo, parke, matawong mga tinampo, asin sa iba pang lugar para maghulit sa mga tawo sain man sinda manunumpungan. Minsan ngani ineenkaminar an lambang parahayag na magpatotoo sa publiko kun posible, dakul an magkakaoportunidad na makikabtang sa nakakaugmang duwang bagong pamamaagi nin pagpapatotoo sa publiko.
2. Anong bagong pamamaagi nin pagpapatotoo an pinunan kan Nobyembre 2011?
2 Espesyal na Pagpapatotoo sa Publiko sa Darakulang Siyudad: Arog kan mababasa sa pahina 16 asin 17 kan 2013 Yearbook, sarong bagong pamamaagi nin pagpapatotoo sa publiko an pinunan sa Siyudad nin Nueva York kan Nobyembre 2011. Naglaag nin mga lamesa asin kareta, na may magagayon na displey saka literatura sa nagkapirang lengguwahe, sa mga lugar sa siyudad na dakulon na tawo an nag-aaragi. Rinibong tawo an nag-aaragi aroaldaw, kaiba na an mga nakaistar sa mga apartment na dai nakakalaog an mga Saksi asin an mga tawo na bihirang maabutan sa harong. Dakulon an interesado sa satong literatura. Sa sarong nakaagi pa sanang bulan, 3,797 magasin asin 7,986 na libro an naipasakamot. Dakul an gustong magpa-Bible study. Huling an panginot na katuyuhan makapuon nin mga pag-adal sa Bibliya, tulos-tulos na ipinapadara sa angay na kongregasyon an adres na itinao kan mga interesado para madalaw sinda sa harong.
3. Paano gigibuhon sa iba pang mga lugar an pamamaaging ini nin pagpapatotoo?
3 Huli sa marahay na resulta kan pamamaaging iyan, gigibuhon na man iyan ngunyan sa iba pang matawuhon na mga lugar sa bilog na kinaban. An lokal na sangang opisina an madeterminar kun sa arin na mga siyudad ini puwedeng gibuhon. Sa parati an mga siyudad na ini may mga terminal o kadakul na opisina o apartment kaya dakulon na tawo an nag-aaragi. Pagkatapos, an sangang opisina mapadara nin surat sa mga kongregasyon na makikikabtang asin matao nin dugang na instruksiyon. Sa parati mga regular asin espesyal payunir an gagamiton, pero sa ibang lugar puwede man na makikabtang an mga auxiliary payunir.
4. Paano ginigibo an espesyal na pagpapatotoo sa darakulang siyudad?
4 Kun Paano Ginigibo an Pagpapatotoo: Sa parati, hahalaton sana na may magrani sa lamesa o sa de ruwedang displeyhan. Kun may magrani, pinapakua siya nin ano man na babasahon na interesante sa saiya. Gamit an Bibliya, maugmang sisimbagon kan mga payunir an ano man na hapot niya. Kun magkua siya nin babasahon, dai sasambiton kan mga payunir an dapit sa donasyon. Pero kun maghapot siya kun paano sinusuportaran an pondo kan satong gibuhon, puwede nindang ipaliwanag na may dugang pang impormasyon na makukua sa satong opisyal na website asin puwede niyang hilingon an artikulo sa jw.org dapit sa mga paagi nin pagdonar. Kun posible, puwede nindang ihapot: “Gusto po nindong may magdalaw sa saindong harong?” o “Apuwera sa babasahon na iyan, aram po nindo na nag-aalok man kami nin daing bayad na Bible study?”
5. Taano ta naugma an sarong mag-agom sa pakikikabtang sa bagong pamamaaging ini?
5 Nakakaugma nanggad an pamamaaging ini. An sarong mag-agom nagsurat: “Mantang kami nagtitindog sa may lamesa asin nahihiling an rinibong tawo na nag-aaragi aroaldaw, lalo ming naaapresyar an mahiwason na gibuhon para mapatotoohan an mga tawo sa bilog na kinaban. Pag nahihiling mi an kadakul na tawo asin iniisip na nagmamakulog nanggad si Jehova sa lambang tawo, napapakusog an determinasyon mi na padagos na inuton sa samong buhay an paghuhulit. Naiimahinar mi na sinisiyasat ni Jehova an puso kan gabos na nag-aaragi sa lamesa, na hinahanap an mga maninigo. Ngunyan mi namatian na haranihon kami sa mga kapwa trabahador na anghel.”
6. (a) Ano an saro pang pamamaagi nin pagpapatotoo sa publiko na inoorganisar sa dakul na kongregasyon, asin paano ini naiiba sa espesyal na pagpapatotoo sa darakulang siyudad? (b) Paano magtatarabangan an mga kongregasyon kun naggigibo nin pagpapatotoo sa publiko?
6 Pagpapatotoo sa Publiko na Inoorganisar sa Kongregasyon: Apuwera sa espesyal na pagpapatotoo sa darakulang siyudad, saro pang bagong pamamaagi an inoorganisar kan dakul na grupo nin kamagurangan sa teritoryo ninda, kun sain an mga parahayag naggagamit nin lamesa o de ruwedang displeyhan sa lugar na sakop kan teritoryo kan kongregasyon na dakul na tawo an nag-aaragi. Iba ini sa espesyal na pagpapatotoo sa darakulang siyudad, na hali sa iba-ibang kongregasyon an mga pinipili para maghulit sa iyo man sanang matawong lugar sa mga siyudad na napili kan sangang opisina.—Hilingon an kahon na “Kaipuhan an Marahay na Kooperasyon.”
7. Kun praktikal sa teritoryo kan kongregasyon, paano maorganisar an mga elder nin pagpapatotoo sa publiko?
7 Pag-aadalan kan mga elder kun baga igwa nin lugar sa teritoryo ninda na dakulon an tawong nag-aaragi asin kun baga praktikal na mag-organisar diyan nin pagpapatotoo sa publiko. An posibleng lugar para maglaag nin lamesa o de ruwedang displeyhan iyo an mga terminal, plasa, parke, matawong tinampo, shopping mall, college campus, airport, asin lugar kun sain ginigibo an taunan na mga okasyon. Igwa nin bentaha kun an lamesa ipupuwesto sa saro sanang lugar, asin sa pararehong aldaw saka oras. Naobserbaran na mas epektibo an paglaag nin lamesa sa mga shopping mall kisa sa luwas nin sarong dakulang tindahan na sa parati tutuyuhon sana kan mga tawo an tindahan na iyan para magbakal. May mga lugar, arog kan matawong bangketa, na tibaad mas praktikal an sadit na de ruwedang displeyhan nin mga literatura. Puwedeng i-download kan mga elder sa satong Web site an mga special file para sa paggibo nin mga displey kan An Torrengbantayan asin Awake! saka kan librong Itinotokdo kan Biblia. Inandam an mga file na ini para gamiton mismo sa arog kaining pagpapatotoo sa publiko. An gigibuhon kan mga makikikabtang pareho kan sa espesyal na pagpapatotoo sa darakulang siyudad. Maninigo na sunudon nanggad ninda an instruksiyon kan paraataman sa paglilingkod. Kun an itinaong adres nin sarong interesado bako man nindang teritoryo, maninigong isurat ninda tulos iyan sa Please Follow Up (S-43) form asin itao sa sekretaryo.
8. Kun mayo nin areglo sa kongregasyon para sa pagpapatotoo sa publiko, anong pamamaagi nin paghuhulit an puwede pa man giraray gibuhon?
8 Pagpapatotoo sa Publiko sa Saindong Personal na Ministeryo: May mga kongregasyon na tibaad mayo nin lugar sa teritoryo ninda na dakulon an tawong nag-aaragi kaya bakong praktikal na maglaag nin lamesa o gumamit nin de ruwedang displeyhan nin literatura. Pero, ineenkaminar pa man giraray an mga parahayag na pag-isipan na iiba sa personal na ministeryo ninda an pagpapatotoo sa publiko. Igwa daw sa teritoryo nindo nin shopping area, mall, o tindahan na kadakul an tawo? Igwa daw nin parke o lugar kun sain nagtitiripon an mga tawo? May mga panahon daw na igwang ginigibong pampublikong mga okasyon? Kun igwa, puwede pa man giraray kamong magpatotoo sa publiko.
9. Taano ta maninigo kitang magin maigot sa paghuhulit sa mga tawo sain man sinda manumpungan?
9 Kabutan ni Jehova na ‘an gabos na tawo makaligtas asin makaabot sa pakasabot kan katotoohan.’ (1 Tim. 2:4) Kaya, pinagmamaigutan tang ihulit an mensahe kan Kahadian sa pinakadakul na tawo bago mag-abot an katapusan. (Mat. 24:14) Sa dakul na lugar dipisil nang maabutan sa harong an mga tawo. Pero, makakaulay ta sinda sa pampublikong mga lugar. Tibaad paagi sana sa pagpapatotoo sa publiko madadangog kan nagkapira an maugmang bareta. Kaya, lugod na lubos tang utubon an satong ministeryo paagi sa paghuhulit sa mga tawo sain man sinda manumpungan.—2 Tim. 4:5.
[Kahon sa pahina 5]
Kaipuhan an Marahay na Kooperasyon
Sinasabi na may mga parahayag sa kataraid na kongregasyon na kun minsan nagpapatotoo sa publiko sa mga tinampo, paradahan, lugar nin negosyo o terminal na sakop kan teritoryo nin ibang kongregasyon. May mga parahayag sa iba-ibang kongregasyon na nagwawalat nin mga magasin sa iyo man sanang lobby o waiting area, asin naghuhulit sa iyo man sanang lugar nin negosyo. Huli kaini, may beses na naiiritar na an mga tawo sa teritoryo, dawa ngani bakong magkasabay na naghuhulit an mga parahayag. Kaya kun nagpapatotoo sa publiko, sa parati pinakamarahay na duman sana sa lugar na sakop kan teritoryo kan kongregasyon.
Kun gusto kan mga parahayag na magpatotoo sa publiko sa teritoryo kan kataid na kongregasyon, maninigong ipakipag-ulay ninda ini sa saindang paraataman sa paglilingkod. Dangan makikikomunikar siya sa paraataman sa paglilingkod kan kongregasyon na idto para humagad nin permiso bago maghulit an mga parahayag. Kun an mga kongregasyon sa ibang lengguwahe inasignaran na maghulit sa iyo man sanang lugar, an mga paraataman sa paglilingkod maninigong makikomunikar sa lambang saro tanganing malikayan na mairitar an mga tawo sa teritoryo. Paagi sa marahay na kooperasyon, an gabos na bagay magigibo ‘sa angay asin husay na paagi.’—1 Cor. 14:40.