Sarong Magayon Asin Bagong Pamamaagi nin Pagpapatotoo sa Publiko
1. Sa anong gibuhon dinagka an mga kongregasyon na may teritoryong dakulon na tawo an nag-aaragi?
1 Dinagka an mga kongregasyon na may teritoryong dakulon na tawo an nag-aaragi na mag-organisar nin pagpapatotoo sa publiko, gamit an literature cart, stand, o lamesang displeyhan. Kun literature cart o stand an ginagamit, kisiyera sarong parahayag an matindog o matukaw sa may displey. Pero kun lamesa an gamit, maninigo na may duwang parahayag na mabantay diyan. Dapat hinguwahon kan mga nagbabantay na magin mabuot asin makiamigo. Kun may magrani, puwedeng punan kan saro sa mga parahayag an pakikipag-ulay sa pagsabing, “Naisip-isip mo na daw kun ano an sinasabi kan Bibliya manungod sa temang iyan?” An saro o duwa pang parahayag na kaiba niya puwedeng bako gayong harayo sa displey mantang impormal na nagpapatotoo.
2. Magsaysay nin eksperyensiya na nagpapahiling kan kahalagahan nin pagpapatotoo sa publiko gamit an mga literaturang nakadispley.
2 Huli sa pamamaaging ini, napunan an dakul na pag-adal sa Bibliya. Sarong estudyante sa kolehiyo an gustong maggibo nin research paper manungod sa Mga Saksi ni Jehova, pero dai siya makahanap nin Kingdom Hall. Kan suminunod na semana, may nahiling siya sa kampus na sarong lamesa na may displey na mga literatura. Napunan an pag-adal sa Bibliya. Ngunyan, bawtisado na an estudyanteng ini asin nakikikabtang na man sa arog kaining pagpapatotoo.
3. Ano an sinabi nin nagkapirang parahayag manungod sa pamamaaging ini nin pagpapatotoo sa publiko?
3 Sarong sister na naugma sa arog kaining pagpapatotoo an nagsabi: “May mga nagrarani sa displey para magkua nin bagong isyu nin mga magasin. An iba dai pang ideya manungod sa Mga Saksi ni Jehova. Nahihiling ko na sa pamamaaging ini, dakul an mapapatotoohan.” Saro pang sister an nagsabi, “Saro ining magayon asin bagong pamamaagi nin pagpapatotoo huling an mga tawo an madulok saimo, asin dawa dai sinda interesadong marhay, nag-uusyoso sinda.”
4. Taano ta may bentaha na ipuwesto an displey kan literatura sa parehong lugar asin oras kada semana?
4 May bentaha kun ipupuwesto an displey sa parehong lugar, aldaw asin oras kada semana. Pag natuod na an mga tawo na nahihiling an displey, dai na sinda maaalangan na dumulok para maghapot o kumua nin literatura. May inorganisar na daw na pagpapatotoo sa publiko an kongregasyon nindo? Kun igwa na, tibaad puwede kang makikabtang sa nakakaugma asin mabungang paaging ini nin ‘pagbalangibog kan Kahadian nin Diyos.’—Luc. 9:60.