Kun Paano Mapatotoo Gamit an Displey nin mga Literatura

Napatunayan na epektibong marhay an pagpapatotoo gamit an cart o lamesa na displeyhan nin literatura sa pagtabang sa mga sadiyosan an puso na madagka sa katotoohan. (Juan 6:44) Huli kaini, ineenkaminar an mga elder na mag-organisar nin arog kaining pagpapatotoo sa mga lugar na sakop kan teritoryo kan kongregasyon na dakul an nag-aaraging tawo. Huling an puwesto kan mga displeyhan nin literatura bako man permanente, sa parati dai man kaipuhan na maghagad nin permiso sa mga awtoridad. Sairisay an kuwalipikadong magpartisipar sa arog kaining pagpapatotoo? Mga parahayag na may marahay na paghusgar, kagalang-galang, asin mahusay makipag-ulay. An minasunod iyo an nagkapira sa dapat asin dai dapat gibuhon na makakatabang sa mga parahayag na magin mas mapanggana.

Dapat:

Magin mainamigo, matinino, asin matinabang sa mga nag-aaragi. May mga parahayag na maugmang minahuyom asin mabuot na minatino. Kun may mag-agi na nakahiling sa mga nakadispley, puwede mong sabihon, “May nagustuhan ka? Puwede kang kumua.”
Tumindog harani sa displey, sa tama sanang distansiya. Sa nagkapirang lugar, nahiling kan mga parahayag na marahay an resulta pag nakatindog sinda nin mga pirang piye an rayo sa displey. Nahiling man kan iba na nag-aalangan magpundo an mga nag-aaragi sa arog kaiyan na distansiya, kaya minarayo sinda nin dikit. Pag may magrani sa displey, hinguwahon na makaulay siya, tibaad paagi sa paghapot, “Naisip mo na man an hapot na iyan?”
Pirming gamiton an Bibliya sagkod sa mapupuwede.
Ipaliwanag an inaalok tang pag-adal sa Bibliya sa siisay man na magkua kan saro sa mga publikasyon na ginagamit sa pag-adal kan Bibliya, arog kan librong Itinotokdo kan Biblia. Kun posible, ipahiling an video na Ta’no ta Kaipuhan Mag-adal nin Bibliya? sa saindong elektronikong gadyet.
Kun posible, hagadon sa mga interesado an impormasyon kun paano sinda makokontak. Kun bako siya sa teritoryo nindo nakaistar, mag-fill up nin Please Follow Up (S-43) form, asin itao tulos iyan sa saindong sekretaryo.