Pagpaheling nin Pag-apresyar sa Duwang Pinakadakulang Kapahayagan nin Pagkamoot
“Kun para sa sato, kita namomoot, huli ta sia enot na namoot sa sato.”—1 JUAN 4:19.
1. Ano an itinaong halimbawa sa sato ni Jesus?
PAANO an pinakamarahay na paagi na ikapaheling niato an satong pag-apresyar sa dakulang pagkamoot na ipinahayag ni Jehova Dios asin ni Jesu-Cristo sa sato? An sarong pangenot na paagi iyo an pag-arog ki Jesus, na daing kapagalan na nagpatotoo sa ngaran asin Kahadean kan saiyang Ama. (1 Pedro 2:21) Ginibo nia iyan sa mga harong, sa mga sinagoga, sa templo, sa mga gilid nin bukid, asin sa baybay. Pag-olayan niato an siyam na paagi na puwedeng magin bukas sa sato.
An Pagharongharong
2. Paano kamo makapagpapadagos sa pagharongharong?
2 An enot, asin tibaad an pinakanagpapamidbid, na paagi na ikapaheling niato an satong pagkamoot asin pag-apresyar iyo an pagharongharong na dara an maogmang bareta kan Kahadean nin Dios. An paggibo kaiyan nagkakaipo nin pagtaram na daing pag-alangan huli ta perming kalabot dian an direktang pakikipag-olay sa iba, na an dakol ibibilang kitang istorbo. Kaipuhan an tunay na pagkamoot sa Dios asin sa kapwa sa padagos na pagharongharong, minsan pa kita mapaatubang sa pagkaindiperente, pagkauyam, pagmenus, o direktang pagtumang.—Ikomparar an Ezequiel 3:7-9.
3. Ano an pasisikadan nindo sa Kasuratan para sa pagharongharong?
3 An rekord kan Ebanghelyo manongod sa mga instruksion ni Jesus sa saiyang 12 apostol, asin kan huri sa 70 paraebanghelyo, malinaw na nagpaparisa na sinda maghaharongharong na naghuhulit kan maogmang bareta kan Kahadean nin Dios. (Mateo 10:5-14; Lucas 10:1-7) Sa Gibo 20:20 sinasabi ni Pablo an manongod sa saiyang pagharongharong. An mga tataramon na iyan iinaplikar sa saiyang mga pagsongko sa pagpastor, alagad sinisierto kan bersikulo 21 kun anong gibohon an boot na sabihon, ta idinugang ni Pablo: “Lubos akong nagpatotoo sa mga Judio asin Griego”—bakong sa Kristianong mga tugang na lalaki asin babae—“manongod sa pagsolsol sa atubang nin Dios asin pagtubod sa satong Kagurangnan na si Jesus.” Kun nagsosongko sa pagpastor, an magurang parate na dai nagsasadol nin ‘pagsolsol sa Dios asin pagtubod ki Jesus.’ Imbes, dinadagka nia an mga kapwa Kristiano na magkaigwa nin orog na pag-apresyar sa mga pagtiripon o sa ministeryo, o tinatabangan nia sinda sa personal na mga problema.
4. Ano an nakadadagka sato na makikabtang sa paghuhulit sa harong-harong?
4 Bako sana na igwa nin marigon na basihan sa Kasuratan an satong pagharongharong kundi an mga bunga kan aktibidad na iyan nagpapaheling na an bendisyon ni Jehova yaon dian. Iyo, “an kadonongan napatutunayan na matanos paagi sa mga gibo kaiyan.” (Mateo 11:19) Sa parate, an mga naghaharongharong nakaheling nin ebidensia sa paggiya nin anghel na nagdadara sa sainda sa mga nagugutom asin napapaha sa katanosan. An kagharong nagsabi na sia namimibi para sa tabang asin na an pagsongko kan Saksi nagin simbag sa pamibing iyan.
5. Ano an marahay na tabang sa sato para sa satong ministeryo sa harong-harong, asin sa anong laen-laen na paagi na iyan makatatabang sato?
5 Dakulaon na tabang sa paglilingkod sa langtad an librong Reasoning From the Scriptures! Iyan igwa nin dakol na marahayon na mga introduksion para sa orolay sa Biblia saka nin kapakipakinabang na impormasyon manongod sa dakol na Makakasuratan o relihiyosong tema. Kaya bako sanang darahon iyan kundi padagos na gamiton iyan. Nangorogna an mga payunir nagpahayag nin dakulang pag-apresyar sa mahalagang pantabang na ini sa paglilingkod sa langtad. Ikapaheheling daw nindo an saindong pag-apresyar sa pagkamoot nin Dios paagi sa paggamit sa librong ini nin mas lubos asin mas epektibo?
6. Ano an kakamtan niatong personal na pakinabang sa pagharongharong na dara an mensahe kan Kahadean?
6 Dai niato maninigong lingawan an bagay na kita personalmenteng makikinabang nin dakula sa pakikikabtang sa ministeryo nin pagharongharong. Mantang kitang mga Kristiano ginigibo an satong pagtubod, iyan nagigin mas marigon; mantang kita nagtataram na may marigon na pagtubod, iyan napakokosog. Dai niato masasabi sa iba an satong paglaom na dai nagigin mas maliwanag an sato mismong paglaom. Daing kaagid an regular na pakikikabtang sa ministeryo nin pagharongharong para sa pagpatalubo sa mga bunga kan espiritu na sinasabi sa Galacia 5:22, 23. Iyan man nanggad an dapat na mangyari, ta an Biblia sinisierto sa sato: “An tawong matinao mag-aasenso; an nagpapaginhawa sa iba magiginhawahan man.”—Talinhaga 11:25, New International Version.
Pagdalaw Liwat
7, 8. Huli sa anong lohiko asin praktikal na mga dahelan na kita maninigong dumalaw liwat?
7 An ikaduwang paagi na kita makabalos sa pagkamoot na ipinaheling sato nin Dios asin ni Cristo iyo an pagdalaw liwat sa mga tawo na nagpaheling nin interes sa mensahe kan Kahadean. Si Pablo asin Bernabe may pagmakolog sa mga nahulitan ninda. (Gibo 15:36) An totoo, hinahagad kan pagkakaoyon kan satong gawe sa satong sinasabi an pagdalaw liwat niato. Kun naghuhulit sa harong-harong, sa paaging impormal, o sa tinampo, hinahanap niato an mga “nakamamate kan saindang espirituwal na pangangaipo.” (Mateo 5:3) Malinaw na an garo pagtao sainda nin sarong basong espirituwal na tubig o sarong pidasong espirituwal na tinapay bako nanggad na igo. Tangani sindang makaduman sa dalan pasiring sa buhay, kaipuhan ninda an orog na tabang.
8 An satong enot na mga paghihingoa ikababaing sa pagtanom nin mga banhi nin katotoohan. Alagad arog kan isinabi ni apostol Pablo sa 1 Corinto 3:6, 7, orog pa an kaipuhan. Kulang pa na sia nagtanom. An mga banhi nagkakaipo man nin tubig, arog kan itinao ni Apolos. Dangan puwede nang laoman na iyan patutuboon nin Dios. An kabtang na ini kan gibohon napababayaan nin iba, pero ibinibilang iyan nin dakol na iyo an pinakapasil na kabtang kan Kristianong ministeryo. Taano? Huli ta an dinadalaw niato nagpaheling na nin interes.
Paggibo nin mga Pag-adal sa Biblia
9. Taano ta maninigong magin pasohan nindo an pagkaigwa nin inaadalan sa Biblia?
9 Kun dayaday na dinadalaw liwat an mga tawo na nagpaheling nin interes sa mensahe kan Kahadean, an parateng resulta pag-adal sa Biblia—an ikatolong paagi na ikapaheling niato an satong pag-apresyar. Tunay na iyan puwedeng magin an pinakamaogma asin pinakanakakokontentong kabtang kan satong ministeryo. Taano? Bueno, nakaoogma nanggad na maheling an mga tawo na nagtatalubo sa kaaraman asin pagsabot sa mga katotoohan kan Biblia, maheling sindang nagbabakle sa saindang buhay, asin tabangan sinda sagkod na idusay ninda an saindang sadiri sa pag-otob kan kabotan nin Dios asin magpabautismo! An mga iyan tunay na ikabibilang na espirituwal niatong mga aki asin kita bilang saindang espirituwal na mga magurang.—Ikomparar an 1 Corinto 4:14, 15; 1 Pedro 5:13.
10. Anong tipikong halimbawa an nagpapaheling kan halaga nin paggibo nin pag-adal sa Biblia?
10 Helinga an sarong tipikong halimbawa. An sarong misyonero na naghaharongharong sa sarong isla sa Caribeano may nanompongan na sarong mag-agom na hippie na an harong bako nanggad na malinig asin areglado. Pero sinda nagpaheling nin interes. Ikinapasakamot an sarong pantabang sa pag-adal sa Biblia, asin naponan an pag-adal sa Biblia kaiba kan mag-agom, na bakong kasal minsan ngani may pira sindang aki. Mantang nagpapadagos an pag-adal, an harong nagpoon na magin mas presentable asin siring man an mag-agom saka an saindang mga aki. Dai nahaloy ipinakiolay kan mag-agom na kasalon sinda kan misyonero, na nagbukas kan dalan na sinda mabautismohan. Dangan sarong aldaw maogmang ipinaheling kan bagong tugang an saiyang lisensia sa pagmaneho nin kotse, an pinakaprimerong kinua nia. Iyo, kan bago sia nagin saro sa mga Saksi ni Jehova, dai nia naheling an pangangaipo na kumua nin lisensia sa kasal o lisensia sa pagmaneho, alagad ngonyan kinukuyog na nia kapwa an mga ley nin Dios asin ni cesar.
Paghuhulit sa Tinampo
11, 12. (a) Ano an Makakasuratan na pagdagka sato na makikabtang sa paghuhulit sa tinampo? (b) Ano an mga dahelan sa paggibo niato kaiyan?
11 An ikaapat na paagi na ikapaheling niato an satong pag-apresyar sa ginibo para sa sato nin Dios asin ni Cristo iyo an paghuhulit sa tinampo. Kun kita nakikakabtang, nakatatabang kitang maotob an Talinhaga 1:20, 21 sa literal na paagi: “An tunay na kadonongan mismo padagos na nagkukurahaw sa lansangan. Sa mga plasa iyan padagos na nagpapaluwas kan tingog kaiyan. Sa may poro kan maribok na mga lansangan iyan nagkukurahaw.”
12 Kadakol nanggad kan marahay na mga dahelan na kita dayaday na makikabtang sa kabtang na ini kan paghuhulit kan Kahadean. Sa dakol na lugar, nagin orog na depisil na manompongan sa harong an mga tawo. Magsalang sinda nasa pag-aling-aling, namamakal, o nagtatrabaho. Saro pa, dakol an nag-iistar sa esklusibong mga apartment o condominium, dai na baga sabihon an mga nag-iistar sa hotel. Pero parate na may mga tawo sa tinampo.
13. Ano an puwedeng magin mga resulta kan paghuhulit sa tinampo? Iilustrar.
13 An saro sa kamagurangan sa Estados Unidos ngonyan may apat na inaadalan sa Biblia na mga tawo na enot niang nanompongan sa paghuhulit sa tinampo. Siyempre, sia dai sana nagtitindog na daing girong (minsan ngani sa nagkapirang nasyon iyan sana an itinotogot kan ley). Imbes, may makikatood na huyom asin maogmang tingog, dinodolok nia an mga tawo na nagtitirutindog, naghahalat nin sakayan, o namamasyar. An saiyang “pagtaram danay na igwa nin kabootan, na tinimplahan nin asin,” asin ginagamit nia an pagmansay kun paano dodolokon an kada saro. (Colosas 4:5, 6; 1 Pedro 3:15) Sia bako sanang nakakua nin inaadalan sa Biblia paagi sa paghuhulit sa tinampo kundi mapanggana man siang gayo sa pagwaras nin babasahon sa dakol. Iyo, paagi sa pagigin malinig an sulot asin may makikatood na huyom kaiba an suweltong pagtaram, puwede kamong magin epektibong gayo sa paghuhulit sa tinampo. An totoo, an limang Saksi bago pa sanang makawaras nin labing 30 kopya kan librong Life—How Did It Get Here? By Evolution or by Creation? sa mga panpublikong sadan. An dakol kan libro kinua nin mga tawo na nagtutukawtukaw sa saindang kotse.
Impormal na Pagpatotoo
14. Paano naririsa an halaga nin impormal na pagpatotoo?
14 An ikalimang paagi na ikapaheling niato an pag-apresyar sa dakulang pagkamoot na ipinahayag sa sato nin Dios asin ni Cristo iyo an impormal na pagpatotoo. Ini parateng epektibong gayo, kapwa sa pakanompong sa mga tawo na nagugutom asin napapaha sa katanosan asin sa pagwaras nin mga babasahon! Tunay na iyan sarong paagi na makuyog niato an hatol sa Efeso 5:15, 16, ‘na tuboson an panahon para sa sato man sana.’ An sarong misyonero nakipag-estoryahan sa sarong kapwa pasahero sa taksi. An tawo nagpaheling nin interes. Ginibo an mga pagdalaw liwat asin naponan an pag-adal sa Biblia. Ngonyan an tawong iyan saro nang Kristianong magurang. Sa iba man na lugar an saro sa kamagurangan nakipag-olay sa sarong babae na magliliwat palan nin relihiyon tanganing pakasal sa sarong Judio. Boot niang maaraman kun siisay an naenot, si Moises, Noe, David, asin iba pa. Sinabi kan magurang na an kaipuhan nia iyo an librong Bible Stories, na nag-aatubang kan mga pangyayari sa Biblia sa kronolohikong pagkasunodsunod. Minsan ngani dai sia midbid kan babae, an babae dai nag-alangan na itao saiya an saiyang ngaran asin direksion patin an kinakaipuhan na kontribusyon tanganing ikapadara kan magurang sa koreo an libro.
15. Ano an matabang sato na magin alisto sa mga oportunidad sa impormal na pagpatotoo?
15 Kun beses, sa takot na kita sayumahan, tibaad mag-alangan kitang kaolayon an kataed niato sa biyahe. Pero parate na kita nagkakamit nin nagsosopay na balos kun magkakosog kita nin boot na gibohon iyan! An pag-apresyar sa karahayan nin Dios asin sa pangangaipo nin mga tawo makatatabang sato na magkaigwa kan kinakaipuhan na kapusoan. Iyo, girumdomon na “an Dios dai nagtao sa sato nin espiritu nin pagkamasosopgon, kundi nin espiritu nin kapangyarihan, nin pagkamoot asin nin disiplina sa sadiri.”—2 Timoteo 1:7, NIV.
Pag-istimar sa mga Estranghero
16. Taano ta maninigo kitang mag-alisto na risahon an mga estranghero na nagsongko sa satong Kingdom Hall?
16 An ikaanom na paagi na ikapaheling niato an satong pagtanaw nin utang na boot sa Dios asin ki Cristo iyo an pag-istimar sa mga estranghero na nagduduman sa satong Kingdom Hall. An pagkamoot sa kataed maninigong magpagin alisto sato na risahon an siisay man na estranghero na sumongko sa satong lugar nin pagsamba. Pagmaigotan niato na sia magin pamugtak an boot, na makamate na sia nasa tahaw nin mga katood na odok na interesado sa saiyang espirituwal na ikararahay. Posible na bako sanang pag-usyoso an nagdara sa saiya duman. Tibaad sia tunay na nagugutom asin napapaha sa katanosan. An tunay na pagmakolog niato sa saiya tibaad magbunga kan pakapoon niato nin pag-adal sa Biblia, na tinatabangan sia na makaduman sa dalan na pasiring sa buhay. (Mateo 5:3, 6; 7:13, 14) An totoo, ini parateng nangyayari. An sarong misyonero sa enot na klase kan Watchtower Bible School of Gilead nakarisa na an duwa niang pinakamaoswag na inaadalan sa Biblia iyo an mga enot niang nakamidbid sa Kingdom Hall.
Pagpatotoo Paagi sa Pagsurat
17. An pagpatotoo paagi sa pagsurat puwedeng magkaigwa nin anong mga resulta?
17 An ikapitong paagi na kita makapagpatotoo, bilang balos sa pagkamoot na ipinaheling sato nin Dios asin ni Cristo, iyo an pagsurat. Parate na an mga naggagamit kan klaseng ini nin pagpatotoo nag-aako nin may pag-apresyar na gayong simbag. Ini paaging ginagamit nin pirang bilog na panahon na ministro na tibaad sa kadikit na panahon dai nakapaghaharongharong huli sa pisikal na kamatean. Halimbawa: Igwa nin sarong pamilya na 12 an aki. Sarong aldaw an ama nagpuli asin nanompongan an lima sa sainda na binadil kan saro sa mga nag-iilusyon sa saro niang aking daraga. Sia basang sanang naghanap nin karangahan sa klero nin Kakristianohan. Dangan sarong aldaw nakaresibi sia nin surat hale sa sarong estranghero, sarong Saksi na nakabasa sa peryodiko manongod sa saiyang mamondong eksperyensia asin boot na rangahon sia, na inibanan nin sarong librong Katotoohan. Ini an hinahanap kan tawo. Ngonyan sia saro naman na mahigos na Saksi.a
Pagtelepono
18, 19. Ano pang ibang paagi nin paghuhulit kan maogmang bareta an nakuang epektibo nin iba, asin taano?
18 Sa pagsambit kan ikawalong paagi nin paghuhulit, yaon an oportunidad na gamiton an telepono sa paghuhulit kan maogmang bareta kan Kahadean. Ini paorog nang paorog na napatutunayan na sarong maogma asin epektibong paagi nin paghuhulit. Padakol nang padakol na mga Saksi an nagigin eksperto sa kabtang na ini kan ministeryo, na dakol an bentaha. Paagi kaiyan nakakaolay niato an iba na dai niato nanonompongan sa pagharongharong. Kun an paghuhulit sa telepono ginigibong may kadonongan, kabootan, pagkamataktika, asin pagigin eksperto, an iba nakaako nin mas marahay na reaksion ki sa pagsongko sa mga tawong iyan sa saindang harong.
19 An sarong kongregasyon na Hapones sa sarong nasyon na Ingles ginagamit an libro sa telepono bilang kabtang kan teritoryo kaiyan. Inaapodan nin mga parahayag an mga ngaran na Hapon asin iinaareglo na dumalaw nin personal kun interesado. Nakapoon sinda nin dinosenang pag-adal paagi kaini.
Pagpatotoo Paagi sa Marahay na Ugale
20, 21. An satong ugale puwedeng magkaigwa nin anong marahay na mga epekto? Iilustrar.
20 An ikasiyam na paagi na kita makapagtatao nin kaomawan sa Dios iyo an satong marahay na ugale. An sarong peryodistang Ruso sarong beses nagsabi na an satong marahay na ugale iyo an satong pinakamarahay na sermon. An totoo, an mga peryodiko paorootrong nagkokomento sa halangkaw na moralidad nin mga Saksi ni Jehova. An saro nagbareta: “An mga Saksi ni Jehova minimidbid na an pinakasadiosan na mga tawo sa Republika Pederal nin Alemania.” Sa kapinonan kan klase, dinarahan nin sarong daragitang Saksi kan pampletang School an saiyang maestro. Sinayumahan nia iyan, na sinasabi na habo niang pangunlabotan an mga Saksi. Minsan siring, an marahay na ugale kan daragita inomaw na gayo kan maestro asin nagin dahelan nin biyong pagkaliwat kan saiyang kaisipan manongod sa mga Saksi. Arog man kaiyan kahalaga an surat na naresibi nin mga magurang na Saksi hale sa maestro kan saindang mga aki: “An dai maninigaran na pansokol sa kapangganahan kan saindong mga tinutubod iyo an saindong mga aki.”
21 An mga nasa kinaban dai puwedeng mag-omaw sa mga Saksi ni Jehova na dai man inoomaw an Dios asin si Cristo. Iyan an dapat na mangyari. Bako daw na sinabi ni Jesus na maninigo niatong paliwanagon an satong ilaw tanganing maheling nin mga tawo an satong marahay na mga gibo asin pamurawayon an satong langitnon na Ama? (Mateo 5:16) Tunay na paagi sa satong marahay na ugale, nasasamnohan niato an katotoohan. (Tito 2:10) Tunay na an bagay na an satong marahay na ugale nagtatao nin kaomawan sa Dios asin ki Cristo asin nakatatabang sa iba na makaduman sa dalan pasiring sa buhay mapuwersang dahelan na kita maghingoang gayo na an satong ugale daing katatsaran sa gabos na panahon.
22. Arin sa mga paagi nin pagpaheling nin pag-apresyar an pagmamaigotan nindo, asin taano?
22 Arog kan naheling niato, kadakol kan paagi na ikapaheling niato an satong pag-apresyar sa gabos na ginibo para sa sato ni Jehova asin ni Jesu-Cristo, nangorogna sa saindang dakulang mga kapahayagan nin pagkamoot. Sa paggibo kaiyan, mapatutunayan niato an satong pagkamoot sa kapwa.—Marcos 12:30, 31.
23. Sa anong huring paagi kamo makapaheheling nin pag-apresyar sa Dios asin ki Jesus?
23 Ultimo, mangnohon niato na ikapaheheling niato an satong pag-apresyar sa duwang pinakadakulang kapahayagan nin pagkamoot paagi sa pagselebrar kan Pamanggihan kan Kagurangnan. Sa saiyang ultimong banggi sa daga bilang tawo, pinonan ni Jesus an taonan na nagpapagirumdom na pamanggihan nin tinapay asin arak, na nagrerepresentar sa saiyang laman asin sa saiyang dugo. Ipinagboot nia na gibohon an selebrasyon na ini sa paggirumdom sa saiya. (1 Corinto 11:23-26) Sa taon na ini an Pamanggihan kan Kagurangnan natagbo sa Domingo, Abril 12, pagkasolnop kan aldaw. Sa bilog na daga, an mga Saksi ni Jehova magtitiripon sa pagkuyog sa pagboot ni Jesus. Dai nindo iyan pagpaltahan!
[Nota sa Ibaba]
a Para sa detalye, helingon an Awake!, Oktubre 22, 1986, pahina 12-16.
Mga Hapot Para sa Pagrepaso
◻ Paano asin saen nagpatotoo si Jesus?
◻ Sa anong mga paagi na maaarog niato si Jesus sa pagpaheling nin pag-apresyar sa dakulang pagkamoot nin Dios?