Paghuhulit sa Harong-Harong

1. Anong hapot an minabangon may koneksion sa ministeryo sa harong-harong, asin taano?

¹ “An mga eksperyensiado sa manlaenlaen na paagi nin pagpalakop kan Katotoohan maoyon na an kampanya nin paghuhulit sa harong-harong na dara an MILLENNIAL DAWN iyo an pinakaepektibong paagi nin paghuhulit kan Katotoohan sa presenteng panahon.” Itinatampok kan mga tataramon na iyan na basado sa isyu kan Zion’s Watch Tower na Hulyo 1, 1893, an halaga kan ministeryo sa harong-harong. Iyan ibinibilang kan mga tawo sa bilog na daga na tatak kan mga Saksi ni Jehova. An paagi daw na ini epektibo pa, huling sa nagkapirang nasyon nagigin orog na depisil na manompongan an mga tawo sa saindang harong?

2. Ano an basehan na sono sa Kasuratan kan paghuhulit sa harong-harong?

² Sono sa Kasuratan Asin Mahalaga: An paghuhulit sa harong-harong igwa nin basehan na sono sa Kasuratan. Pinagbotan ni Jesus an 70 disipulo na paduman nin manduwaduwa sa mga harong kan mga tawo. (Luc. 10:5-7) Dai nahaloy pagkagadan ni Jesus, an Biblia nagsasabi manongod sa saiyang mga disipulo: “Aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta.” (Gibo 5:42) Si apostol Pablo maigot man na nagtokdo sa harong-harong.—Gibo 20:20.

3. Ano an nagkapirang bentaha nin paghuhulit sa harong-harong?

³ An paghuhulit sa harong-harong nagpapadagos bilang sarong mahalagang paagi nin pagpalakop kan maogmang bareta ngonyan. Tinotogotan kita kaiyan na “hanapon” an mga maninigo sa sistematiko asin aregladong paagi. (Mat. 10:11) An mga tawo sa pankagabsan mas pamugtak an boot sa harong. An pakikipag-olay na kaatubang sinda—na nadadangog an saindang boses, naheheling an saindang panlauog, asin naoobserbaran an nasa palibot ninda—matogot sa sato na mabatid kun sa ano sinda interesado asin nahahadit. Iyan sa parate nagtatao sa sato kan pinakamarahay na oportunidad na mapalawig pa an pakikipag-olay.

4. Paano niato magigibo na magin mas mabunga an satong paghuhulit sa harong-harong?

⁴ Gumibo nin Personal na mga Pagliliwat: Si apostol Pablo nagin andam na gumibo nin personal na mga pagliliwat “para sa maogmang bareta.” (1 Cor. 9:23) Tibaad puede niatong liwaton an satong iskedyul tanganing makapaghulit sa panahon na an mga tawo posibleng marhay na nasa harong na, siring kan sa hapon, sa mga katapusan kan semana, o sa mga piesta opisyal. Magkaigwa nin rekord nin mga harong na mayong tawo, asin hingoahon giraray na bumalik sa laen na aldaw kan semana o sa laen na oras kan aldaw.

5. Paano puedeng makaiba sa pagharongharong an mga may limitasyon huli sa salud?

⁵ Dawa an mga may limitasyon huli sa salud puedeng mahimong makikabtang sa paghuhulit sa harong-harong. Tibaad puede kitang gumibo nin mga plano na iiba sinda sa pagdalaw sa mga harong na madaling dumanan, na nagpapangyari sa sainda na maghulit sa komportableng rikas. An sarong tugang na babae nadedepisilan na maghangos asin nahihimo niang dumalaw sa saro sanang harong kada kabangang oras. Pero, ogmahon asin kontento nanggad sia pagkatapos na makiiba sa grupo sa paghuhulit!

6. Taano ta maninigo niatong gibohon na regular na kabtang kan satong ministeryo an paghuhulit sa harong-harong?

⁶ Dakol na arog-karnero an padagos na nanonompongan sa pagharongharong. An sarong parahayag nagtuktok sa sarong pinto asin sinabihan: “Dagos. Midbid ko kamo. Namimibi ako sa Dios na magsugo nin tawo tanganing tabangan ako, dangan nadangog ko an tuktok sa pinto. Dinangog nia ako asin isinugo kamo.” An mga resulta nagtatao nin ebidensia na binebendisyonan ni Jehova an paaging ini nin paghuhulit. (Mat. 11:19) Magin determinado na gibohon na regular na kabtang kan saindong ministeryo an paghuhulit sa harong-harong.