Pagharongharong na Dai nin Ontok
1 Sa suanoy na Israel, an mga atang idinodolot aroaldaw. (Ex. 29:38-42) Ngonyan, dinadagka kita na “magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” (Heb. 13:15) Sinasamba niato si Jehova paagi sa pag-omaw saiya na dai nin ontok.—Isa. 43:21; Gibo 5:42.
2 Tinokdoan kita ni Jesu-Cristo kun paano kita makakatao nin dalisay na pagsamba paagi sa pagdolot nin mga atang nin pag-omaw. Aram nia na an pinakaepektibong paagi na maabot an mga tawo kan maogmang bareta iyo na personal na makipag-olay sa sainda sa saindang harong. (Mat. 10:7, 12) Kaya maheheling niato na kinuyog kan mga apostol an saiyang ipinasabong na paggiya na magpatotoo sa harong-harong.—Gibo 20:20.
3 Bako man na laen ngonyan. Arog kan mga disipulo ni Jesus, an tunay na mga Kristiano sinusunod an saiyang halimbawa paagi sa paghuhulit kan maogmang bareta sa harong-harong. Dawa ngani kita puwedeng tatsaran asin lamagon huli kaiyan, minilyon an nakanood kan katotoohan asin ginatos na ribo na bagong disipulo an minaiba sa dakulang kadaklan kada taon, na nagtatao nin ebidensia na ini an paagi ni Jehova sa paggibo kan saiyang kabotan. Iyan an dahelan na nagpapadagos kita sa satong ministeryo.
4 Mga Pakinabang sa Paghuhulit sa Harong-harong: “An Dios dai nagpapalaen . . . An tawo na natatakot sa saiya asin naggigibo nin katanosan saiyang inaako.” (Gibo 10:34, 35) An pagduman sa kada harong sa satong teritoryo nagpapaheling nin dai pagpapalaen, na nagtatao sa gabos nin pararehong oportunidad na makadangog kan mensahe nin Kahadean. Sa siring an mga naghihimate nag-aako nin personal na tabang sono sa saindang indibiduwal na mga pangangaipo.
5 Haros an gabos na parahayag, kabale na an mga hobenes, an mga gurang, asin pati na an mga bagohan, puwedeng makikabtang sa pagharongharong. Paagi kaini an kada saro makakagibo nin ‘pagpapahayag sa publiko para sa kaligtasan.’ (Roma 10:10) An pakikikabtang kaiba kan iba sa ministeryo sa harong-harong pinagsasararo kita sa mga bogkos nin pagkamoot asin pagkasararo. Kadungan kaiyan, natatawan kita nin oportunidad na ipaheling an satong pakatagal kun nakakanompong kita nin pagkaindiperente o pagtumang. Gabos malinaw na nagpapaheling na binibendisyonan ni Jehova an pagharongharong asin ginagamit iyan sa pagtipon sa dakulang kadaklan pasiring sa saiyang “harong” nin dalisay na pagsamba.—Isa. 2:2-4.
6 Padagos kitang maghulit sa harong-harong na dai nin ontok sagkod na sabihon ni Jehova na tama na. (Isa. 6:11) Sa paggibo kaiyan, babalosan kita nin kagayagayahan na minagikan sa pakikikabtang sa gibohon na ini.—1 Cor. 15:58.