Pag-aatubang kan Maogmang Bareta—Sa Harong-harong
1 An satong gibohon na paghuhulit kan maogmang bareta kan Kahadean ipinagboot kan pinakahalangkaw na autoridad sa uniberso, si Jehova asin an saiyang natutukaw na sa tronong Aki, si Jesu-Cristo.—Mat. 28:18; Kap. 14:6, 7.
2 Si Jesus nagtao kan arogan paagi sa ‘paglibot sa siudad-siudad asin baryo-baryo, na naghuhulit asin nagpapahayag kan maogmang bareta kan kahadean nin Dios.” (Luc. 8:1) An saiyang mga disipulo, minsan pakatapos na hampakon, dai nagpondo kundi naghulit aroaldaw asin sa harong-harong. (Gibo 5:41, 42; 20:20) Sa modernong mga panahon an gibohon na ini ginigibo sana kan mga Saksi ni Jehova, na naggamit nin labing 739 milyones na oras sa paghuhulit kan nakaaging taon.—Hag. 2:7; Isa. 60:22.
KUN ANO AN NAGIGIBO KAN PAGHARONGHARONG
3 Arog kan ipinaririsa sa Ezequiel 33:33 asin 38:23, an satong pagharongharong may mahalagang kabtang sa pagpakangbanal sa ngaran ni Jehova. An maogmang bareta kan Kahadean iinaatubang sa mga kagharong, na tinatawan sinda kan oportunidad na ipaheling kun ano an saindang paninindogan.—2 Tes. 1:8-10.
4 An regular na pagharongharong nagpapakosog man sa satong paglaom sa mga panuga nin Dios. Nadudugangan an satong abilidad na gamiton nin epektibo an Biblia. Natatabangan kita na mahale an takot sa tawo. Puwedeng makultibar an orog na empatiya mantang personal niatong pinagmamasdan an tinitios nin mga tawo huli sa dai pakamidbid ki Jehova asin dai pamumuhay sono sa saiyang matanos na mga pamantayan. Natatabangan man kitang makultibar an mga bunga kan espiritu nin Dios sa satong buhay.—Gal. 5:22, 23.
PAKAPANGGANA SA MGA KAOLANGAN
5 Naririsa daw nindo na dakol an indiperente sa mensahe, nangorogna sa teritoryong parateng natatrabaho? Dai nindo togotan na ini magpaluya sa saindong boot. Mamibi ki Jehova, asin tatabangan nia kamo na magduman sa teritoryo na may tamang kaisipan. Ibilang an kada harong na may potensial na igwa nin tawong arog-karnero. Arog kan instruksion ni Jesus, pabayaan an tawo na ipaheling kun baga sia maninigo.—Mat. 10:11-14.
6 Minsan sa teritoryo na parateng tinatrabaho, tibaad dakol an dai napatotoohan huli ta bihira sinda sa harong. An pagsongko sa laen-laen na oras asin pagsaray nin tamang house-to-house record nakatatabang sa mas lubos na pagtrabaho sa teritoryo.
7 Boot niatong makareport ki Jehova sa katapusan kan gibohon na ini: “Ginibo ko na an siring sa ipinagboot mo sa sako.” (Ezeq. 9:11) An maigot na pagharongharong magpapangyari sato na magibo ini.