Magtaram Manongod sa Kamurawayan kan Paghade nin Dios
“Sinda magtataram dapit sa kamurawayan kan saimong paghade, asin isasabi ninda an dapit sa saimong kapangyarihan.”—SALMO 145:11.
1. Sa pangenot, taano ta tinawan kita ni Jehova kan kakayahan na magtaram?
Si Jehova may katuyohan sa pagtao sato kan kakayahan na magtaram. (Exodo 4:11) Sa pangenot, iyan iyo na an satong mga dila “magsulwak nin pag-omaw” sa saiya. (Salmo 119:171, 172) Arog kan sabi kan salmistang si David: “An gabos mong mga ginibo magrurukyaw sa saimo, O Jehova, asin an saimong mga maimbod mag-oomaw sa saimo. Sinda magtataram dapit sa kamurawayan kan saimong paghade, asin isasabi ninda an dapit sa saimong kapangyarihan, tanganing ipaisi sa mga aki nin mga tawo an saiyang makapangyarihan na mga gibo asin an kamurawayan kan kagayonan kan saiyang paghade. An saimong paghade sarong paghade sa gabos na panahon na daing katapusan, asin an saimong pagsakop sa bilog na panahon kan gabos na sunod-sunod na kapag-arakian.”—Salmo 145:10-13.
2. Kita napahihirong “magsulwak nin pag-omaw” sa Dios sa anong mga paagi?
2 An linahidan na mga parasunod ni Jesu-Cristo asin an saindang kairibang “dakulang kadaklan” galagang omawon si Jehova, an “Hade na daing katapusan.” (Kapahayagan 7:9; 15:3) Paagi sa maigot na pag-adal sa Biblia kaiba An Torrengbantayan asin iba pang Kristianong mga publikasyon bilang pantabang, magkakamit kita nin tamang kaaraman manongod sa Dios na garo burabod nin malinig, presko, nagtatao nin buhay na tubig. Kaya, sa kaso niato ‘an burabod nin kadonongan nagigin salog na nagbuburokbusok.’ (Talinhaga 18:4) Kita napahihirong “magsulwak nin pag-omaw” sa paghuhulit sa harong-harong asin sa iba pang paagi nin ministeryo sa langtad. Alagad igwa man nin Makakasuratan na dahelan sa impormal na pagpatotoo.
Mga Arogan sa Kasuratan
3. Tabi sumitar nin sarong halimbawa nin impormal na pagpatotoo ni Jesu-Cristo?
3 An enot na paghuhulit na ginibo ni Jesus pakalahidi kan banal na espiritu sa saiyang istaran, na duman inimbitaran nia si Juan, Andres, asin si Pedro. Nagsarong aldaw sinda duman, na malinaw na nag-ako nin dakulang patotoo sa impormal na kamugtakan na idto. (Juan 1:35-42) Sa impormal man na mga kamugtakan—“mantang minaagi”—na naheling ni Jesus si Mateo sa opisinang bubuhisan asin nagkamit nin positibong resulta kan Sia magsabi: “Sumunod ka sako.”—Mateo 9:9.
4. Ano an isinabi ni Jesus kan nagpapatotoo sa sarong Samaritana, asin ini nagbunga nin ano?
4 Si Jesus iyo an pinakamarahay na halimbawa nin ‘salog nin kadonongan na nagbuburokbusok.’ Minsan ngani sia nagtutukaw na gutom asin pagal sa may bobon ni Jacob harani sa Sicar, nagpatotoo sia sa sarong Samaritana na nag-abot sa pagsakdo. “An siisay man na uminom sa tubig na itatao ko sa saiya dai na nanggayod mapapaha,” sabi ni Jesus, “kundi an tubig na itatao ko sa saiya magigin burabod nin tubig na nagbuburokbusok tanganing magtao nin buhay na daing katapusan.” An impormal na pagpatotoong ini nagbunga kan paghuhulit ni Jesus sa sarong grupo na nadagka kan babae na mag-iriba asin dangogon an sasabihon nia.—Juan 4:6-42.
5. Si Felipe na paraebanghelyo asin si apostol Pablo nagtatao nin anong mga halimbawa nin impormal na pagpatotoo?
5 Si Felipe na paraebanghelyo pinara an sarong minaaging karuwahe asin nagpatotoo nin impormal sa nakasakay, na nagbabasa kan hula ni Isaias. Kan pasakayon sa karuwahe, ipinaliwanag ni Felipe “an maogmang bareta manongod ki Jesus” sa kapon na Etiopeng idto, na an may pag-apresyar na reaksion nagbunga kan saiyang pagpabautismo. (Gibo 8:26-38) Kan an gapos ni apostol Pablo sa bilanggoan mahubad sa sarong makosog na linog sa Filipos, sia nagpatotoo nin impormal sa bantay. An resulta? “An gabos, sia asin an saiyang harong tolos na nabautismohan.”—Gibo 16:19-34.
6. An impormal na pagpatotoo posibleng nagkaigwa nin kabtang sa anong mga aktibidad kan mga disipulo ni Jesus pakatapos na si Esteban gapoon?
6 Ngonyan, an impormal na pagpatotoo sarong paagi na ipahayag an maogmang bareta sa mga lugar na nasa irarom nin restriksion an satong Kristianong gibohon. Alagad minsan kita pinaglalamag, an satong puso nagpapahiro sato na magtaram manongod sa kamurawayan kan paghade nin Dios. Pakatapos na si Esteban gapoon sagkod na magadan, an kadaklan sa pinaglalamag na mga disipulo nagkasuruhaysuhay. Pero, sinda nagpadagos sa pagpahayag kan maogmang bareta, asin daing duwa-duwa na kaiba an impormal na pagpatotoo sa saindang mga paghihingoang ihulit an Kahadean.—Gibo 8:4-8; 11:19-21.
7. Kan nabibilanggo, ano an ginibo ni Pablo, na nagpapalataw nin anong hapot?
7 An impormal na pagpatotoo sarong paagi na magtaram manongod sa kamurawayan kan paghade nin Dios kun kita nabibilanggo o dai nakaluluwas sa harong huli sa helang o kamatean. Si Pablo nabilanggo sa laog nin duwang taon na guwardiado nin mga Romano. Alagad imbes na manluya huli sa kapungawan, sia nagpakua nin mga magdadangog asin “maboot niang inako an gabos na nagduruman sa saiya, na naghuhulit kan kahadean nin Dios sa sainda asin itinotokdo an mga bagay manongod sa Kagurangnan na si Jesu-Cristo na may lubos na katalingkasan nin pagtaram.” (Gibo 28:16-31) Marahayon nanggad na halimbawa! Kun kamo saksi ni Jehova na dai nakaluluwas sa harong, makagigibo daw kamo nin kapareho kaini?
8. Gurano kaepektibo kan impormal na pagpatotoo ni Pablo?
8 Mantang nagririlyebo sa panapanahon an mga guwardia ki Pablo, manlaenlaen an nakadadangog saiya na nakikipag-olay sa iba manongod sa kamurawayan kan paghade nin Dios. Alagad masisierto niato na sia direkta man na nagpatotoo sa mga guwardiang idto. Epektibo nanggad an impormal na pagpatotoong ini kaya si Pablo nakasurat: “An mga bagay na nangyari sa sako orog pang nakapalakop kan maogmang bareta imbes na kabaliktaran, mala ta an sakong mga gapos nahayag sa publiko mapadapit ki Cristo sa tahaw kan gabos na Bantay sa Pretorio asin sa gabos na iba pa; asin an kadaklan na tugang sa Kagurangnan, huling napakosog an boot kan sakong mga gapos, nagpapaheling nin orog pang kapusoan na itaram an tataramon nin Dios na dai nin takot.” (Filipos 1:12-14) Kapareho ni Pablo, kun kita mabilanggo asin mawaran nin oportunidad para sa pormal na pagpatotoo, puwede pa man giraray kitang magtaram manongod sa paghade nin Dios. Asin kanigoan na kapusoan an itatao kaini sa satong mga tugang!
9, 10. Ano an sekular na ebidensia na an enot na mga Kristiano nagpatotoo nin impormal?
9 An impormal na pagpatotoo usong-uso sa enot na mga Kristiano kaya minsan manongod sa nahuhuring mga taon masasabi: “Gikan sa sarong parasurat na Kristiano, tibaad sa Carthage kan mga 200, makukua niato an sarong paglaladawan . . . [na] manongod sa mga tawong edukado nanggad. An tolong hoben pang abogado, na magkakaamigo, nagbakasyon nin sarong aldaw sa may baybayon. An duwa Kristiano, an ikatolo pagano. Dai nahaloy an orolay ninda napasarelihiyon . . . An kasaysayan manongod sa halawig na argumento natatapos sa, ‘Nagpuli kaming maogma, kaming tolo. An saro maogma huli ta sia nakalaog sa Kristianong pagtubod, an iba huli ta giniyahan sia ninda dian.’ An kasuratan dai nagsasagin aktuwal na kasaysayan; iyan sarong Apology, ni Minucius Felix. Pero iyan nagrerepresentar sa nangyayari sa mas mapalad na mga tawo.” (Church History 1—The First Advance: AD 29—500, ni John Foster, pahina 46, 48) Iyo, asin ipinaheheling kan kasaysayan na ini na an impormal na pagpatotoo dai pa nawawara sa mga naghihingakong Kristiano kan panahon na idto.
10 Manongod sa enot na mga Kristiano, sinabi man: “Yaon an daing ontok sa pagdakol na mga Kristianong nagturubod, na, saen man magduman, baga man sa saindang regular na negosyo o pinaglalamag, naghulit ki Cristo . . . Kadakol kan mga ginibo an saindang trabaho, an saindang propesyon, an saindang ginigibo sa aroaldaw, ano man iyan, na paagi na ilakop an saindang pagtubod.” (The Missionary Enterprise, ni Edwin Munsell Bliss, pahina 14) Iyo, an enot na mga parabalangibog kan Kahadean nagpatotoo sa pormal asin impormal na paagi.
Pagplano Bago Pa Asin Pag-andam
11. Ano an manonodan niato ki Jesus manongod sa pagsentro kan atension sa katotoohan nin Dios?
11 Kapareho ni Jesus asin kan saiyang enot na mga parasunod, maninigo kitang magpatotoo pareho sa pormal asin impormal na paagi. An epektibong paggibo kaiyan nagkakaipo nin pagplano bago pa asin pag-andam. Tanganing makapagpatotoo sa impormal o makapagtokdo, ginamit ni Jesus an mga aki, kakanon, gubing, mga gamgam, burak, kamugtakan nin panahon, asin mga trabaho. (Mateo 4:18, 19; 6:25-34; 11:16-19; 13:3-8; 16:1-4) Magagamit man niato an haros arin man na tema bilang basihan sa pagsentro kan atension sa katotoohan nin Dios.
12. Kun nagpaplanong magbiyahe, paano an saro makapag-aandam para sa impormal na pagpatotoo?
12 Puwede kitang magpatotoo nin impormal sa mga tawo na nagtutukawtukaw sa mga parke, naglilinya sa mga shopping center, asin iba pa. Sa Atenas, si Pablo nakipagrasonan “aroaldaw sa sadan sa mga nasosompongan nia.” (Gibo 17:17) Alagad kaipuhan kitang mag-andam para sa impormal na pagpatotoo. Halimbawa, nagpaplano daw kamong magbiyahe paagi sa eroplano, tren, o bus? Kun siring magdara nin Biblia asin nagkapirang pampleta, magasin, o pulyeto. An pagbasa sa Kristianong mga publikasyon sa mga pampublikong sakayan o sa iba pa parateng pinoponan nin orolay.
13. Iilustrar kun paano nindo mapoponan an pagpatotoo sa sarong may edad na mantang nagbibiyahe.
13 Malinaw na an enot makikatood na introduksion. An librong Reasoning From the Scriptures nagsusuherir nin mga introduksion na magagamit sa ministeryo sa langtad, alagad an iba digdi puwedeng liwaton tanganing magamit kun nagpapatotoo nin impormal. Halimbawa, kun sa pagbiyahe makataed nindo an sarong gurang, puwede nindong sabihon: “Ako si——. Haloy ko nang hinorophorop an katuyohan nin buhay. An dakol sibot-sibot sa paghahanapbuhay kaya haros mayo sinda nin panahon na isip-isipon an katuyohan nin buhay. Pero kun kita nagkakaedad na, narerealisar niato na an buhay halipot sana asin tibaad isipon niato: ‘Iyo sana daw ini an buhay?’ Sa paghona daw nindo an Dios may katuyohan para sa satong pagkabuhay?” Pasimbagon. Dangan puwede nindong ipaliwanag an katuyohan nin Dios para sa katawohan asin komentohan an makangangalas na mga bagay na ipinanuga sa Kapahayagan 21:3, 4. Para sa epektibong pagpatotoo nin impormal, puwede man nindong iaplikar an ibang marahay na mga punto na nanodan sa mga pagtiripon kan kongregasyon asin sa Kristianong mga publikasyon.
Malalaoman an Marahay na mga Resulta
14. Ano an nagin kapangganahan nin sarong tugang sa impormal na pagpatotoo sa panahon nin biyahe?
14 Kapareho ni Jesus asin kan enot niang mga parasunod, puwede kitang magin mapanggana kun nagpapatotoo nin impormal. Bilang ilustrasyon: Sa sarong pagsakay sa eroplano, nakaolay nin sarong Saksi an sarong opisyal sa militar na 20 anyos nang may agom. An agom kan tawong ini nagdodroga, pirang beses nang nagprobar na maghugot, asin madali na siang bayaan tanganing umiba sa mas hoben na lalaki. Kan ipaliwanag kan Saksi an Makakasuratan na tabang na inaako nia hale sa Torrengbantayan asin Magmata!, an opisyal nagsuskriber asin gustong ipadara an mga magasin sa saiyang agom. Nadangog nin ibang pasahero an isinabi kan Saksi. An resulta? Tara, huli sa pagpatotoo sa okasyon na idto, nakakua sia nin 22 na suskripsion asin nakawaras nin 45 magasin asin 21 libro!
15, 16. (a) Tumao nin mga halimbawa nin mapangganang impormal na pagpatotoo sa mga katrabaho. (b) Ano an isinusuherir sa saindo kan mga resultang ini?
15 Kumusta man an impormal na pagpatotoo sa mga katrabaho? An sarong tugang nagwalat nin mga kopya kan satong mga babasahon sa kasilyas sa saiyang pinagtatrabawohan. Nabasa nin sarong katrabaho an mga magasin, hinanap an tugang, asin nagsuskriber dian. An lalaking ini nag-ako man nin pag-adal sa Biblia asin tinalikdan an saiyang maraot na pamumuhay, pero an saiyang agom minahale sa harong basta masabihan an ngaran nin Dios. Kan an lalaki gustong magdemitir sa lokal na iglesya, an ministro nag-abot tanganing ipakipag-olay ini, na an natagbuan sana sa harong an agom nia. Nabigla an babae sa kadaihan nin pagtubod kan ministro asin sa saiyang mga kaputikan manongod sa mga Saksi ni Jehova, ta naheling kan babae na an saiyang agom nagliwat para sa ikararahay. Sinabihan nia an ministro: “Puwede mo na man na isurat an sertipikasyon nin pagdemitir para sa sako asin sa mga aki!” Pag-abot nin panahon, an mag-agom na ini nagin bautisadong mga Saksi.
16 Kaidtong dakol nang taon an nakaagi, an sarong tugang na ngonyan nag-iistar na sa Estados Unidos nagpatotoo nin impormal sa sarong katrabaho sa Inglaterra asin iiniba an barobata sa sarong pagpasale nin pelikula kan mga Saksi ni Jehova. Pakalihis nin treinta y unong taon, naresibi kan tugang an surat na ini: “Boot kong ipaaram saimo ngonyan na an patotoo na itinao mo [sa barobata] nagkabunga, ta pakalihis nin mga duwang taon nakaolay naman sia nin saro pang tugang, nawarasan nin magasin, asin ipinag-iba sia sa lokal na Kingdom Hall . . . Nagin siang Saksi, nabautismohan kan 1959, asin ngonyan magurang na sa saiyang kongregasyon . . . Pakalihis nin mga 14 taon an agom nia nagin Saksi asin nabautismohan man. Pakalihis nin duwang taon an aki niang babae nabautismohan asin ngonyan regular payunir na sa North Derbyshire . . . Huli sa kadikit na pagpatotoo mo kaidto sa Ashford, an tawong iyan, an saiyang agom asin aking babae, an sarong pinsan asin an aki niang babae, agom na lalaki asin limang aki, asin an sarong aki kan saro pang aking babae kan pinsan gabos nagin Saksi. . . . Boot kong pasalamatan ka, Ted, nin dakulaon, ta ako an parapatindog nin asero, asin an iinestorya ko saimo sadiri kong estorya kan pagpatotoo mo sako asin kun ano an nangyari.”
17. Ano an mga oportunidad nin hoben pang mga lingkod ni Jehova sa impormal na pagpatotoo?
17 Kamong mga hoben na lingkod ni Jehova igwa man nin marahayon na teritoryo para sa pagpatotoo—an saindong mga kaeskuwela asin maestro. Nagtatao daw kamo nin impormal na pagpatotoo sa mga komposisyon, pagrepaso nin oral, asin iba pa? Bilang reperensia para sa sarong komposisyon, an sarong estudyante sa haiskul sa Ecuador na inaadalan sa Biblia ginamit an serye sa tutob kan Agosto 22, 1985 Awake! na “Hiroshima—Has Its Lesson Been Lost?” An komposisyon nia nagkamit kan komendasyon nin mga nagdedesisyon sa sarong internasyonal na kompetisyon asin nagbunga nin libreng biyahe sa Hapon. Siyempre, an panggana sa mga kompetisyon bakong iyo an katuyohan nin Kristianong mga publikasyon. Alagad ipinag-iilustrar kaini an halaga nin siring na mga babasahon asin an pagigin epektibo nin pagpatotoo sa ikaoomaw nin Dios sa eskuwelahan.
18. Ano an ibinunga kan pagtao nin halipot na patotoo sa saro na gustong umarkila nin kuwarto?
18 Huli sa pinansial na mga dahelan, kinaipuhan na paarkilahan nin sarong tugang na babae an saro niang kuwarto. Kan maresibi an paghapot sa telepono manongod dian, sinabihan nia an babaeng nag-apod na saro sia sa mga Saksi ni Jehova asin dai nia matotogotan an inmoralidad sa saiyang harong. An mga bisita kaipuhan na humale nin amay, asin an mga bisitang lalaki kaipuhan na naheheling sa gabos na oras. An nag-apod nagpondo nin kadikit, dangan nagsabi: “Nag-adal ako kaidtong tin-edyer pa ako, pero dai ako napahiro kaiyan. Kaya naglaog ako sa kolehiyo.” Kan hapoton kun baga gusto niang ipagpadagos an saiyang pag-adal sa Biblia, sia nagsimbag, “Iyo.” Pag-abot nin panahon, an nag-apod, an saiyang ina, asin an saiyang tugang na babae nagin nagdusay na mga lingkod ni Jehova—ini gabos huli ta an sarong tugang nagpatotoo nin impormal.
19. Ano an ibinunga nin impormal na pagpatotoo sa kaso nin sarong babae sa Bahamas?
19 Sa Bahamas an konsensia nin sarong babaeng Katoliko riniribok sia ta limang taon na siang dai nagsimba. Kaya sarong maoran na aga nin Domingo, naglakaw sia pasiring sa simbahan. Nag-agi an tolong Saksi, na pinasakay sia sa kotse—asin pinatotoohan sia. Pag-abot ninda sa simbahan, gusto pa niang magdangog asin nag-iba sia sa sainda mantang nagdagos sinda sa paghapit sa sarong inaadalan sa Biblia. Inagihan giraray ninda an simbahan, pero gusto pa niang magdangog kaya nagdagos sia sa Kingdom Hall. An pahayag-publiko iyo mismo an tema na pinag-olayan sa kotse. Naponan an pakipag-adal kan Biblia sa babae, na pinahale an lalaki na kasaroan nia (an ama kan apat niang aki), asin nabautismohan sia sa sarong kombension sa Nassau kan 1986. Kanigoan an saiyang kaogmahan na may nagpatotoo sa saiya nin impormal!
Padagos na Magtaram Manongod sa Paghade nin Dios!
20. (a) Ano an maninigong magin punto-de-vista sa impormal na pagpatotoo may relasyon sa ministeryo sa langtad? (b) Ano an suhestion kun an saro nag-aalangan na magpatotoo nin impormal?
20 An impormal na pagpatotoo dai ikasasalida sa regular na ministeryo sa langtad nin mga Saksi ni Jehova. An paghuhulit sa harong-harong malinaw na pareho Makakasuratan asin epektibo. (Gibo 5:42; 20:20, 21) Minsan siring, an impormal na pagpatotoo mabunga, asin an mga lingkod ni Jehova maninigong makikabtang dian. Saen man may tawo—mga paryentes, kaklase, katrabaho, iba pa—may mga oportunidad na magtaram manongod sa kamurawayan kan paghade nin Dios. Kaya dai kamo paolang sa takot o pagkasopog. (Talinhaga 29:25; 2 Timoteo 1:6-8) Kun kamo nag-aalangan na magpatotoo nin impormal, taano ta dai mamibi kapareho kan pinaglalamag na mga disipulo ni Jesus? Sinda nakimaherak: “Jehova, . . . itogot mo sa saimong mga oripon na padagos na magtaram kan saimong tataramon sa bilog na kapusoan.” Sinimbag daw an saindang pamibi? Iyo, ta “an lugar na saindang pinagkakatiriponan natanyog; asin sinda gabos napano kan banal na espiritu asin nagtaram kan tataramon nin Dios na may kapusoan.”—Gibo 4:23-31.
21. Ano an magmomotibar sa saro na magpatotoo sa gabos na kamugtakan?
21 Kun siring, pataluboon an positibong kaisipan manongod sa impormal na pagpatotoo. Togotan an pagkamoot nin Dios na magpahiro saindo na magpatotoo sa gabos na kamugtakan. Magin entusiastiko, na garo nagsusulwak an katotoohan sa gabos na oportunidad. Iyo nanggad, padagos na magtaram manongod sa kamurawayan kan paghade nin Dios.
Ano an Simbag Nindo?
◻ An impormal na pagpatotoo igwa nin anong basihan sa Kasuratan?
◻ Ano an nagkapirang paagi na makapag-andam para sa impormal na pagpatotoo?
◻ Kun kita magpapatotoo nin impormal, anong mga resulta an malalaoman niato?
◻ Ano an maninigong magin punto-de-vista niato sa impormal na pagpatotoo may relasyon sa regular na ministeryo sa langtad?
[Ritrato sa pahina 20]
Kun dai kamo nakaluluwas sa harong, nagpapatotoo daw kamo arog ki Pablo kan sia nabibilanggo?
[Ritrato sa pahina 22]
An patienot na pag-andam magpapangyari sato na magpatotoo nin impormal sa epektibong paagi