Pag-aatubang kan Maogmang Bareta—Impormal na Pagpatotoo
1 Mantang nagpapahingalo sa bobon ni Jacob, kinaolay ni Jesus an sarong Samaritana. (Juan 4: 5-30) Minsan ngani pagal asin napapaha, nagtao sia nin impormal na pagpatotoo. Nagkaigwa daw iyan nin marahay na resulta? Iyo nanggad! Iyan nagbunga kan pagtubod nin dakol na Samaritano ki Jesus. —Juan 4: 39-42.
2 An dakol ngonyan nakanompong na an impormal na pagpatotoo ekselenteng paagi nin pagpalakop kan maogmang bareta asin nagkamit nin maogmang mga eksperyensia. Alagad tibaad ihapot nindo kun saen asin noarin makapagpapatotoo sa impormal. Paano iyan magigibo?
SAEN ASIN NOARIN
3 An saro makapagpapatotoo sa impormal sa haros ano man na kamugtakan asin saen man na lugar. An dakol na parahayag nagpapatotoo sa impormal kun pasiring asin papuli hale sa trabaho o kun nagbibiyahe kun bakasyon. An iba inaaprobetsaran an mga oras nin pangodto. An iba nagpapatotoo kun nananaod. An sarong mag-agom nagpatotoo sa sarong parabuno sa supermarket, asin kan sia magpaheling nin interes, ipinagpadagos ninda an orolay sa saiyang harong kan banggi man sanang idto.
4 An maluya na o may helang na mga parahayag nagkaigwa nin kapangganahan sa pagpatotoo sa mga bisita, doktor, asin attendant sa ospital. An ibang tugang kinakaolay an mga bisita sa saindang harong. An iba dinodolok an mga tawo na nagpapaharuhayahay sa mga parke. An mga istasyon nin eroplano o awto marahay man na mga lugar para sa impormal na pagpatotoo.
KUN PAANO IYAN GIGIBOHON
5 An sarong tugang nagsabi: “Parate kong naririsa na an pamibi nakatatabang kun nasasakitan akong makipag-olay.” Kaya humanap nin mga paagi na makaolay an mga tawo, asin arangon ki Jehova na buksan an dalan. Magin makikatood asin mainit. Pagmaigotan na ponan an orolay sa bagay na dian tibaad pareho kamo interesado.
6 Siyempre, kun mapupuwede, gusto niatong walatan nin mababasa an interesado. Ini nangangahulogan na maninigo kitang patienot na magplano asin magdara nin mga pulyeto, magasin, pampleta, o brochure. An satong bagong saradit na pulyeto seguradong magigin mahalagang pantabang sa impormal na pagpatotoo. An iba nagin mapanggana sa pagpopoon nin orolay paagi sa pagwalat nin mga brochure o magasin sa ibabaw kan saindang lamesa sa trabaho o lamesa sa harong. An siring tibaad makaakit sa sarong katrabaho o bisita asin magdara sa mabungang patotoo.
7 Iareglo na dalawon liwat an gabos na interesado. Seguradohon na ireport an oras bilang paglilingkod sa langtad. Paagi sa paghihingoa kapareho ni Jesus, bebendisyonan man kamo ni Jehova sa pagpalakop kan maogmang bareta paagi sa impormal na pagpatotoo.