Andam daw Kamo sa Impormal na Pagpapatotoo?
1. Anong halimbawa an nagpapaheling na puedeng magin epektibo an impormal na pagpapatotoo?
1 An impormal na pagpapatotoo puedeng magin epektibong marhay. An Biblia igwa nin dakol na halimbawa nin impormal na pagpapatotoo na may marahay na mga resulta. (Juan 4:7-15) Ano an puede niatong gibohon tanganing mag-andam sa arog kaining klase nin pagpapatotoo?
2. Paano an satong paggubing asin pagpakarhay sa sadiri makakatabang na kita magin andam na magpatotoo?
2 Paggubing Asin Pagpakarhay sa Sadiri: Paagi sa tamang pagtao nin atension sa satong paggubing asin pagpakarhay sa sadiri sa gabos na panahon, daing pag-alangan na ikakasabi niato sa iba an dapit sa satong pagtubod. (1 Tim. 2:9, 10) Kun sa heling niato bakong angay an satong itsura, posibleng marhay na mag-alangan kitang magpatotoo. Sa kabaliktaran, an satong maayos asin malinig na itsura mismo puedeng makapukaw nin interes. Halimbawa, mantang nagbibiahe, an sarong mag-agom na Saksi na marahay an bulos nakatukaw kataed nin sarong Muslim na lalaki. Huling narisa an saindang itsura, an lalaki naghapot kun sinda mga Kristiano. Ini nagresulta sa tolong oras na pag-orolay dapit sa Biblia.
3. Sa pagsunod sa halimbawa ni Jesus, paano kamo nakapoon nin pakikipag-olay?
3 Pagpoon nin mga Pakikipag-olay: Kan manuparan ni Jesus an Samaritana sa burabod ni Jacob, pinonan nia an pakikipag-olay paagi sana sa paghagad sa saiya nin maiinom. Kaagid kaiyan, tibaad makapoon kita nin pakikipag-olay paagi sa halipot na mga tataramon o simpleng hapot. Minsan ngani tibaad kun beses kita nag-aalangan, puede kitang ‘magpakapusoan’ na makapoon nin pakikipag-olay paagi sa pagsarig sa tabang ni Jehova.—1 Tes. 2:2.
4. Paano kita makakapag-andam na magpatotoo nin impormal?
4 Paggibo nin mga Oportunidad: Dakol na parahayag an nakakua nin mga paagi na makapagpatotoo nin impormal. Siyasaton an saindong mga kamugtakan, asin isipon an mga tawo na posibleng marhay na manunuparan nindo aroaldaw. Magdara nin angay na babasahon asin sadit na Biblia. Magin mapagmasid, asin magin interesado sa mga tawo sa palibot nindo. Kun napag-isipan na nindo an mga oportunidad na tibaad mapaatubang sa saindo sa aldaw na iyan, posibleng marhay na magigin andam kamong magtao nin marahay na patotoo.—Fil. 1:12-14; 1 Ped. 3:15.
5. Taano ta maninigong planohon an impormal na pagpapatotoo?
5 Igwa kita nin duwang marahay na dahelan na aprobetsaran an mga oportunidad na makapagpatotoo nin impormal—an pagkamoot sa Dios asin pagkamoot sa kapwa. (Mat. 22:37-39) Huli sa pagkaapurado kan paghuhulit, kaipuhan na planohon an impormal na pagpapatotoo. Maninigong magin andam kita na aprobetsaran an gabos na angay na oportunidad na sabihon sa iba an maogmang bareta kan Kahadean mantang may panahon pa.—Roma 10:13, 14; 2 Tim. 4:2.