Kabtang 2—Aprobetsaran an Lambang Oportunidad na Magpatotoo
1 Ginatos na ribo nin mga tawo an nakamidbid kan katotoohan paagi sa impormal na pagpatotoo. Kun an paaging ini nin pagpatotoo lubos na gagamiton, minilyon pang iba an maaabot kan mensahe nin maogmang bareta. Bilang mga lingkod ni Jehova, kaipuhan na padagos niatong pasirangon an satong liwanag. Paano niato personal na magigibo ini nin lubos?—Mat. 5:15, 16; Fil. 2:15.
2 Igwa nin manlaenlaen na paagi na makagigibo kita nin mga oportunidad tanganing makatao nin impormal na patotoo. Durante kan pahingalo sa odto, mantang naghahalat sa sarong opisina, o kun minagamit nin panpublikong transportasyon, an ibang mga tugang nagin ugale na an magbasa nin Biblia o saro sa mga magasin o libro kan Sosyedad. Sa pagigin alisto sa reaksion o ano man na interes na ipinaheling kan mga nakatukaw sa harani, tibaad magbunga nin pag-orolay kun satuya sanang ihihiras an sarong punto hale sa satong binabasa.
3 Bako man perming masakit na magpoon nin pakikiolay sa iba manongod sa sarong ordinaryong baretang lokal. Kun mamimibi kita para sa tabang ni Jehova asin magmamaigot, magkakamit kita nin mararahay na resulta. An sarong simple nanggad na paagi sa pagtao nin halipot asin impormal na patotoo iyo an pag-alok kan saro sa satong mga tract. Ini espesyalmenteng praktikal sa mga kamugtakan na dikit sana an panahon sa pag-orolay. An mga tract saradit sana asin madaling darahon alagad igwa nin mapuwersang mensahe. Kadaklan sa sato makagagamit kaini nin orog na dayaday.
GAMITON AN LIBRONG REASONING
4 An sarong praktikal na tabang sa gabos na paagi kan paghuhulit kan Kahadean iyo an librong Reasoning. An dakol na introduksion sa pahina 9-15, siring man an impormasyon sa irarom kan “Conversation Stoppers” sa pahina 15-24 puwedeng iadaptar sa impormal na pagpatotoo asin gamiton sa pagpoon nin pag-orolay. Halimbawa, an sarong introduksion sa pahina 11 nagsasabi: “Nabasa mo daw ini sa diaryo sa semanang ini? (Ipaheling an angay na bareta.) Ano an paghona mo . . . ?” Simpleng marhay, alagad epektibo nanggad sa pagpoon nin pag-orolay! O ikahahapot niato kun namangno kan tawo kun paano kinotar kan bareta an prominenteng mga tawo na minagamit kan terminong “Armagedon” manongod sa nuklear na guerra. Puwede niatong ihapot kun ano an paghona nia sa magigin kahulogan kan Armagedon sa katawohan. An materyal sa pahina 9 puwedeng iadaptar sa pag-orolay.
5 Sa pakikabtang sa impormal na pagpatotoo, marahay na tawan niato nin oportunidad an kaolay niato na ipahayag an saiyang sadiri. Kaipuhan kita na magin magalang asin may respeto sa gabos na panahon. Kun nagdadangog kita nin marhay sa sinasabi nin ibang tawo, madedeterminaran niato kun ano an saiyang mga interes asin dangan magtaram nin mga tataramon na magpapaorog kan saiyang espirituwal na gana. (Tal. 25:11) Kun posible, kuanon niato an ngaran asin direksion kan mga nagpaheling nin interes tanganing magkaigwa nin dugang na orolay sa ngapit tanganing kultibaron an interes. Siring man, kaipuhan na magkaigwa kita nin rekord kan panahon na ginamit niato sa impormal na pagpatotoo tanganing ikareport ini nin tama.
6 Kun namamatean nindong bako kamong mapanggana sa impormal na pagpatotoo, dai kamo madisganar. An saindong mga pagmamaigot na magsabwag nin mga banhi kan katotoohan kan Kahadean paagi sa impormal na pagpatotoo tibaad magbunga sa ngapit. Parate na an natitipon na isinabwag na katotoohan paagi sa impormal na patotoo an nagbubunga nin mararahay na resulta. Siring man, an mga tawong nanonompongan niato nin impormal an parate dai nanonompongan paagi sa regular na gibohon na pagharongharong huli sa mga iskedyul sa trabaho. Minsan kun mayo kita nin literatura sa Biblia na ikawawaras sa mga tawo, an pagpatotoo sa ngoso may magigibong dakulang karahayan. Minilyon na tawo an maaabot niato kun kita nag-aaprobetsar kan lambang oportunidad na magpatotoo nin impormal.