Kabtang 1—Aprobetsaran an Lambang Oportunidad na Magpatotoo
1 Si apostol Pablo nagsadol sa Hebreong mga Kristiano: “Danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” (Heb. 13:15) Sarong paagi na magigibo niato ini iyo an regular na pagsuportar sa areglo nin paglilingkod sa langtad. Saro pang epektibong paagi nin pagdolot sa Dios nin atang nin pag-omaw iyo an pag-aprobetsar sa mga oportunidad na magtao nin impormal na patotoo.
2 Sa satong pan-aroaldaw na gibohon, kadaklan sa sato nakaaatubang sa ibang mga tawo. Kun kita alisto na midmidon an mga oportunidad asin gumibo nin paghihingoa, kita makasasabwag nin kadakol na banhi nin katotoohan kan Kahadean. Tibaad maghagad ini nin halipot sanang komento o sarong hapot manongod sa mga kamugtakan sa kinaban tanganing maponan an orolay asin abrihan an paagi na magtao nin patotoo.
MAGIN ANDAM
3 An mapangganang impormal na pagpatotoo nangangaipo nin patienot na pag-aandam. Mawot daw nindong pagmaigotan ini? Kun satuyang aanalisaron kun ano an satong gigibohon sa aldaw na iyan, hohorophoropon an manongod sa mga tawong satong manonompongan, asin kokonsideraron kun ano an satong sasabihon tanganing makapoon nin orolay, manonompongan niato na mas madali an magpatotoo nin impormal. Siertohon na igwa kamo nin tracts, mga magasin, o iba pang literatura na ikakaalok. Ano daw kun may Biblia? An pambulsang Biblia madaling ibugtak sa dakulang pitaka o sa bulsa asin magagamit kun itinotogot kan oportunidad.
4 Kadagdagan pa, kaipuhan na aram niato an presenteng mga pangyayari na may relasyon sa hula kan Biblia. An mga bareta sa “Pagmamasid sa Kinaban” asin sa “Insight on the News” sa satong mga magasin mahalagang mga pantabang sa bagay na ini. Kun nasa isip niato an mga baretang iyan, ikaiintrodusir niato an mga tema na may mahiwas na pandagka.
MAGKAIGWA NIN INISYATIBA
5 Kadakol nin mga oportunidad aroaldaw na makatao nin patotoo. Minsan ngani an mga parahayag sa ospital nagigin epektibo sa pagtaram manongod sa katotoohan sa mga doktor, nars, empleyado sa ospital, bisita, asin iba pang pasyente. An ibang parahayag minagamit kan saindang pahingalo sa odto sa trabaho o sa eskuwelahan asin kan panahon sa paghalat sa mga kaolay. An mga oportunidad na magpatotoo tibaad maglataw kun namamakal, kun nasa bakasyon, o kun nagbibiyahe sa bus, eroplano, o sa tren. An iba epektibo sa pagpatotoo sa saindang sadiring harong kun an mga ahente, nagdedeliber, kataraed, paryentes, asin iba pa minasongko sa sainda.
6 Kun nagbibiyahe pasiring sa mga asamblea o mga kombension, magagamit niato an oportunidad na magpatotoo sa mga tawo asin ipaliwanag kun saen kita maduman asin taano. Kun kita minaontok tanganing maggasolina, minakakan sa mga restawran, o namamakal, kaipuhan niatong hanapon an mga paagi tanganing magpatotoo nin impormal.—Ecl. 11:6.
7 An odok sa boot na apresasyon sa katotoohan asin an kasibotan kan mga panahon kaipuhan na magpahiro sa sato na aprobetsaran an lambang oportunidad na magsabwag nin mga banhi kan Kahadean paagi sa impormal na pagpatotoo.—Mat. 24:14.