Kaya Nindong Magpatotoo nin Impormal!
1. (a) Ano an impormal na pagpapatotoo? (b) Pira sa mga presente ngonyan sa pagtiripon na ini an enot na nakadangog dapit sa katotoohan paagi sa impormal na pagpapatotoo?
1 Pira sa saindong kongregasyon an enot na nakadangog dapit sa katotoohan paagi sa impormal na pagpapatotoo? Tibaad magngalas kamo sa simbag. Kalabot sa impormal na pagpapatotoo an pagsabi kan maogmang bareta sa mga tawo na nanonompongan niato sa satong pang-aroaldaw na mga aktibidad—kun nagbibiahe, nagbibisita sa mga paryente o kataraed, o namamakal, siring man kun nasa eskuelahan, nasa trabaho, asin iba pa. Sa sarong grupo nin labing 200 na bautisadong Saksi, 40 porsiento an enot na nakaolay paagi sa impormal na pagpapatotoo! Kun siring, epektibong marhay an paaging ini nin paghuhulit.
2. Anong mga halimbawa nin impormal na pagpatotoo an mababasa niato sa Kasuratan?
2 An mga ebanghelisador kan enot na siglo parateng nagpapatotoo nin impormal. Halimbawa, mantang nagbabaklay sa Samaria, si Jesus nagpatotoo sa sarong babae na nagsasakdo nin tubig sa burabod ni Jacob. (Juan 4:6-26) Si Felipe nagpoon na makipag-olay sa sarong Etiopeng opisyal sa korte na nagbabasa sa libro ni Isaias paagi sa paghapot: “Ano talagang aram mo an binabasa mo?” (Gibo 8:26-38) Kan si apostol Pablo nakabilanggo sa Filipos, sia nagpatotoo sa bantay sa bilanggoan. (Gibo 16:23-34) Kan huri, mantang nakabilanggo sa sadiring harong, ‘maboot na inaako ni Pablo an gabos na nagduruman sa saiya, na ihinuhulit sa sainda an kahadean nin Dios asin itinotokdo an mga bagay mapadapit sa Kagurangnan na Jesu-Cristo.’ (Gibo 28:30, 31) Kaya man nindong magpatotoo nin impormal, dawa kun kamo masusupgon. Paano?
3. Ano an makakatabang sa sato na mapangganahan an pagkamasusupgon?
3 Kun Paano Mapoon: Dakol sa sato an nadedepisilan na magpoon nin pakikipag-olay sa mga estranghero. Dawa sa mga kamidbid, an pagsabi manongod sa katotoohan garo baga medyo nakakaalangan. Minsan siring, mamomotibar kitang magtaram kun hohorophoropon niato an karahayan ni Jehova, an espirituwal na kayamanan na itinao nia sa saiyang mga lingkod, asin an makamomondong kamugtakan kan mga tawo sa kinaban. (Jon. 4:11; Sal. 40:5; Mat. 13:52) Dugang pa, puede niatong hagadon ki Jehova na tabangan kita na ‘magpakapusoan.’ (1 Tes. 2:2) Sarong estudyante sa Gilead an nagsabi: “Parate kong naeeksperyensiahan na nakakatabang an pamibi kun nadedepisilan akong makipag-olay sa mga tawo.” Kun kamo nag-aalangan na magtaram, silensiong mamibi nin halipot.—Neh. 2:4.
4. Ano nguna an puedeng magin pasohan niato, asin taano?
4 Siring sa ipinaparisa kan termino, an impormal na pagpapatotoo dai naghahagad na ponan niato an pakikipag-olay paagi sa pormal na introduksion o teksto sa Biblia. Tibaad makatabang sa sato an pagkaigwa kan pasohan na makapoon sana nin pakikipag-olay na dai nagsasaboot na dapat kitang magpatotoo tolos-tolos. Dakol na parahayag an nagsasabi na an paggibo kan lakdang na ini nagtatao sa sainda kan kompiansa na kaipuhan ninda tanganing iintrodusir an maogmang bareta sa huri. Kun habo kan tawo na makipag-olay, dai sia kaipuhan na piriton. Magalang na taposon an pakikipag-olay asin maghanap nin ibang makakaolay.
5. Ano an nakatabang sa sarong masusupgon na tugang na babae na makapagpatotoo nin impormal?
5 Mantang namamakal sa saod, sarong masusupgon na tugang na babae an minaheling nguna sa mata nin saro asin makikatood na minahuyom. Kun an tawong iyan maghuyom man, sia may halipot na sasabihon sa saiya. Kun magin paborable an reaksion kan tawo, nagtatao ini sa saiya kan kompiansa na ipadagos an pakikipag-olay. Sia maingat na naghihinanyog asin nagmamaigot na maaraman kun anong aspekto kan maogmang bareta an magugustohan kan saiyang kaolay. Sa paggamit kan pamamaaging ini, sia nakapasakamot nin dakol na babasahon asin nakapoon pa ngani nin pag-adal sa Biblia.
6. Paano kita puedeng makapoon nin pakikipag-olay sa impormal na kamugtakan?
6 Pagpoon nin Pakikipag-olay: Ano an puede niatong sabihon tanganing makapoon nin pakikipag-olay? Kan si Jesus makipag-olay sa babae sa may bubon, pinonan nia iyan paagi sana sa paghagad nia sa saiya nin maiinom. (Juan 4:7) Kaya tibaad makapoon kita nin pakikipag-olay paagi sa maboot na pangungumusta o hapot. Mantang kamo nag-oolay, puede kamong magkaoportunidad na iintrodusir an sarong ideya na sono sa Kasuratan asin tibaad makatanom nin banhi nin katotoohan. (Ecl. 11:6) An nagkapira nagin mapanggana paagi sa pagsabi nin sarong bagay na nakakapukaw nin interes asin nakakapahiro sa iba na maghapot. Halimbawa, mantang naghahalat sa doktor, puede kamong makapoon nin pakikipag-olay paagi sa pagsabing, “Maoogma ako kun dai na ako noarin man magkakahelang.”
7. Paano an pagigin mapag-obserbar makakatabang sa sato na magpatotoo nin impormal?
7 An pagigin mapag-obserbar makakatabang man sa sato na makapoon nin pakikipag-olay. Kun maobserbaran niato an sarong magurang na may disiplinadong mga aki, puede niatong tawan nin komendasyon an magurang asin maghapot, “Ano an nakatabang sa saindo na magin mapangganang magurang?” Inaaram nin sarong tugang na babae an mga temang pinag-oolayan kan iba sa lugar nin trabaho dangan ihinihiras nia an espesipikong impormasyon basado sa mga bagay na pinagkakainteresan kan saiyang mga katrabaho. Kan maaraman nia na nagpaplanong mag-agom an sarong babae sa pinagtatrabahohan nia, tinawan nia ini nin kopya kan Awake! na nagpapaliwanag kun paano magplano nin kasal. Nagresulta ini sa dugang pang pag-oolay sa Biblia.
8. Paano niato magagamit an satong mga babasahon tanganing makapoon nin pakikipag-olay?
8 An saro pang paagi na makapoon nin pakikipag-olay iyo an pagbasa kan satong mga babasahon na naheheling kan iba. Binubuksan nin sarong tugang na lalaki an Torrengbantayan o Awake! sa sarong artikulo na may titulong nakakapukaw nin interes asin silensiong binabasa iyan. Kun marisa nia na may tawo sa harani na nagheheling sa saiyang magasin, nagpapalataw sia nin hapot o nagkokomento nin halipot dapit sa artikulo. Sa parate, ini minaresulta sa pag-oolay asin pagpatotoo. An pagbugtak sana nin saro sa mga publikasyon niato sa lugar na maheheling iyan tibaad makapukaw sa interes kan mga katrabaho o kaklase asin makapahiro sa sainda na maghapot manongod dian.
9, 10. (a) Paano kita makakagibo nin mga oportunidad na makapagpatotoo nin impormal? (b) Paano nindo nagibo ini?
9 Paggibo nin mga Oportunidad: Huli sa pagkaapurado kan satong paghuhulit, dai niato maninigong mansayon na an impormal na pagpapatotoo nagkakanorongod sana. Imbes, maninigo kitang maghingoa na gumibo nin mga oportunidad na makapagpatotoo mantang inaasikaso niato an satong pang-aroaldaw na mga aktibidad. Patienot na pag-isipan an manongod sa mga tawo na posible nindong manuparan, asin estudyaran kun paano kamo puedeng makapoon nin makikatood na pakikipag-olay. Pirmeng magdara nin Biblia saka mga babasahon na puede nindong ialok sa mga nagpapaheling nin interes.—1 Ped. 3:15.
10 Paagi sa pagigin mapamaagi, dakol na parahayag an nakagibo nin mga oportunidad na makapagpatotoo nin impormal. Sarong tugang na babae na nakaistar sa sarong guardiadong marhay na apartment an naggagamit kan pasilidad kaiyan para sa pag-aling-aling tanganing magbilog nin mga jigsaw puzzle nin magagayon na tanawon sa naturalesa. Kun may mga tawo na minapondo asin nagkokomento dapit sa kagayonan kan tanawon, ginagamit nia an oportunidad na iyan tanganing makapoon nin pakikipag-olay asin sinasabi nia sa sainda an manongod sa panuga kan Biblia na “sarong bagong langit asin sarong bagong daga.” (Kap. 21:1-4) May naiisip daw kamong mga paagi tanganing makagibo kamo nin mga oportunidad na makapagpatotoo nin impormal?
11. Paano niato puedeng makultibar an interes na nanompongan niato mantang nagpapatotoo nin impormal?
11 Pagkultibar sa Interes: Kun makanompong kamo nin andam na maghinanyog, pagmaigotan na kultibaron an interes nia. Kun angay, puede nindong sabihon sa saiya: “Naogma nanggad akong makipag-olay saimo. Saen taka puedeng makontak tanganing makapag-olay giraray kita?” An nagkapirang parahayag itinatao sana an saindang adres asin numero nin telepono sa saindang kaolay asin sinasabi: “Naogma ako sa pag-oolay ta. Kun gusto mong makaaram nin orog pa manongod sa pinag-olayan ta, puede mo akong kontakon digdi.” Kun dai nindo personal na makukultibar an interes nia, iareglo na gibohon iyan kan angay na kongregasyon paagi sa pagsumitir tolos nin pormang Please Follow Up (S-43) sa sekretaryo kan saindong kongregasyon.
12. (a) Taano ta kaipuhan na irekord asin ireport an oras na ginagamit niato sa impormal na pagpapatotoo? (b) Ano an nagin mga resulta nin impormal na pagpapatotoo? (Helingon an kahon na “An Impormal na Pagpapatotoo Igwa nin Marahay na mga Resulta!”)
12 Maninigong ireport an oras na ginagamit niato sa impormal na pagpapatotoo. Kun siring, seguradohon na irekord iyan, dawa kun pira sanang minuto iyan kada aldaw. Isip-isipa ini: Kun an lambang parahayag magpapatotoo nin impormal sa laog nin limang minutos kada aldaw, iyan may total na labing 17 milyones na oras kada bulan!
13. Ano an maninigong magmotibar sa sato na magpatotoo nin impormal?
13 Igwa kita kan pinakanobleng mga dahelan na magpatotoo nin impormal—pagkamoot sa Dios asin sa kapwa. (Mat. 22:37-39) An pusong pano nin pag-apresyar sa mga kualidad asin katuyohan ni Jehova nagpapahiro sa sato na magtaram dapit sa “kamurawayan kan kagayonan kan saiyang paghade.” (Sal. 145:7, 10-12) An tunay na pagmakolog sa satong mga kapwa nagpapahiro sa sato na aprobetsaran an lambang angay na oportunidad na isabi an maogmang bareta mantang may panahon pa. (Roma 10:13, 14) Paagi sa dikit na pagplano antes pa asin pag-andam, kita gabos makakapagpatotoo nin impormal asin tibaad makaeksperyensia kan kagayagayahan sa pag-introdusir kan katotoohan sa saro na sadiosan an puso.
[Blurb sa pahina 4]
Tibaad makatabang sa saindo an pagkaigwa sana kan pasohan na makanompong nin mga tawo asin makapoon nin pakikipag-olay
[Blurb sa pahina 5]
Paagi sa pagigin mapamaagi, dakol na parahayag an nakagibo nin mga oportunidad na makapagpatotoo nin impormal
[Kahon sa pahina 5]
Mga Suhestion sa Pagpoon nin Pakikipag-olay
◼ Mamibi para sa tabang na makapoon
◼ Pilion an mga tawo na sa heling nindo makikatood asin dai naghihidali
◼ Magheling sa mata, maghuyom, asin magtaram dapit sa sarong bagay na pareho nindong pinagkakainteresan
◼ Magin marahay na parahinanyog
[Kahon sa pahina 6]
An Impormal na Pagpapatotoo Igwa nin Marahay na mga Resulta!
• Mantang nasa talyer asin naghahalat na mahirahay an saiyang kotse, sarong tugang na lalaki an nagpatotoo sa mga nasa palibot nia asin tinawan sinda nin mga handbill na nag-iimbitar sa sainda sa pampublikong pahayag. Sa sarong kombension pakalihis nin sarong taon, maogma siang kinumusta nin tugang na lalaki na dai nia namidbid. Saro ini sa mga lalaki na tinawan nia nin handbill sa talyer kan nakaaging taon! An lalaking iyan nag-atender tanganing magdangog sa pampublikong pahayag asin itinao nia an saiyang ngaran tanganing konduktahan nin pag-adal sa Biblia. Sindang mag-agom pareho nang bautisado ngonyan.
• Ibinibilang nin sarong tugang na babae na nakanood kan katotoohan paagi sa impormal na pagpapatotoo na saiyang espesyal na teritoryo an mga tawo na nakakamidbid nia paagi sa saiyang tolong aki. Kaiba sa saiyang teritoryo an mga kataed asin magurang na nakakamidbid nia sa eskuelahan saka sa mga miting para sa mga magurang. Basta nagpapamidbid sia, sinasabi nia sa simple alagad odok sa pusong paagi na an Biblia mahalagang pantabang sa saiya sa pagpadakula sa saiyang mga aki, dangan liniliwat nia an pinag-oolayan. Alagad huling naponan na nia an pakikipag-olay, mas madali na para sa saiya na isaliot an dapit sa Biblia sa sunod na mga pakikipag-olay. Huli sa paggamit kan paaging ini, natabangan nia an 12 indibiduwal na mabautismohan.
• Kan an sarong tugang na babae dumanan nin ahente sa insurance, inaprobetsaran nia an oportunidad na makapagpatotoo. Hinapot nia ini kun gusto kaini na magkaigwa nin garantisadong marahay na salud, kaogmahan, asin buhay na daing katapusan. Sinabi kan ahente na iyo asin naghapot ini kun arin na insurance policy an sinasabi nia. Ipinaheling nia sa ahente an mga panuga kan Biblia asin iinalok an saro sa mga publikasyon niato, na binasa kaini sa laog nin sarong banggi. Iinareglo an sarong pag-adal sa Biblia. Nagpoon ining mag-atender sa mga pagtiripon asin kan huri nabautismohan.
• Mantang nagbibiahe sa eroplano, sarong tugang na babae an nagpoon na makipag-olay sa babaeng nakatukaw sa kataed nia asin nakapagpatotoo. Sa pagtatapos kan biahe, itinao kan tugang sa babae an saiyang adres asin numero sa telepono patin dinagka an babae na makiolay na konduktahan sia nin pag-adal sa Biblia sa sunod na magdalaw sa saiya an mga Saksi ni Jehova. Kan sunod mismong aldaw, duwang Saksi an nagdalaw sa harong kan babae. An babae nagpoon na mag-adal sa Biblia, marikas na nag-oswag, nabautismohan, asin dai nahaloy sia nagkokondukta na man nin tolong pag-adal sa Biblia.
• Sarong 100 anyos na butang tugang na lalaki, na nakaistar sa sarong klinika sa pag-ataman sa mga gurang asin may helang, an parateng nagsasabi, “Kaipuhan ta an Kahadean.” Huli kaini, nagkaigwa nin mga hapot an mga nars asin pasyente kaya ikinapaliwanag nia kun ano an Kahadean. Saro sa mga babaeng nagtatrabaho duman an naghapot sa saiya kun ano an gigibohon nia sa Paraiso. Sia nagsimbag, “Ako makakaheling asin makakalakaw giraray saka sosoloon ko an sakong silyang de rueda.” Huling sia buta, pinakiolayan nia an babae na basahon sa saiya an mga magasin. Kan magbisita an aking babae kan tugang, an empleyada naghagad nin permiso sa aking babae na ipuli an mga magasin. Sarong nars an nagsabi sa aking babae, “An samong bagong sarabihon sa klinika iyo an: ‘Kaipuhan ta an Kahadean.’”
• Sarong tugang na babae na nakapila sa restawran an dai tinutuyong nakadangog sa sarong grupo nin may edad nang mga lalaki na nakatukaw sa harani na nag-oorolay manongod sa politikal na mga isyu. Sarong lalaki an nagsabi na dai kaya kan gobyerno na resolberan an satong mga problema. Sinabi kan tugang sa saiyang sadiri, ‘Tsansa ko na ini.’ Namibi sia nin halipot asin nagdolok sa sainda. Pagkatapos na magpamidbid, sinabi nia sa sainda an manongod sa sarong gobyerno na maresolber sa mga problema kan katawohan, an Kahadean nin Dios, asin iinalok sa sainda an sarong brosyur na dara nia. Kan oras man sanang iyan duminolok an manedyer. Naghona an tugang na papahaleon sia kaini. Imbes, sinabi kaini sa saiya na nagdadangog sia sa orolay asin gusto man nia na magkaigwa nin brosyur. An sarong empleyada na nagdadangog man duminolok na nagluluha. Sia dating inaadalan sa Biblia na gustong ipagpadagos an saiyang pag-adal.