Omawon si Jehova Paagi sa Paghuhulit nin Impormal
1 An maimbod na mga lingkod ni Jehova naghahanap nin mga oportunidad na omawon sia kada aldaw. (Sal. 96:2, 3; Heb. 13:15) An sarong paagi na magigibo niato iyan iyo an paghuhulit nin impormal. Dakol na parasamba ki Jehova ngonyan an nagpapasalamat na igwa nin saro na nag-introdusir sa sainda sa mensahe kan Kahadean paagi sa impormal na paghuhulit.
2 An impormal na paghuhulit sa saro parateng nagbubukas kan dalan tanganing an iba makadangog kan mensahe kan Kahadean. Halimbawa, an pakikipag-olay ni Jesus sa sarong Samaritana sa may burabod ni Jacob an nagin dahelan tanganing dakol pa an magkainteres sa maogmang bareta. (Juan 4:6-30, 39-42) Mantang nakabilanggo si Pablo asin Silas sa Filipos, hinulitan ninda an bantay sa bilanggoan, asin an bilog na kasararo sa harong kan lalaking iyan nag-ako kan katotoohan.—Gibo 16:25-34.
3 Mga Oportunidad: Ano an mga oportunidad na kamo makapaghulit nin impormal? An nagkapira naggigibo kaiyan kun namamakal, kun nakasakay sa pampublikong mga sasakyan, o naghahalat sa pagkonsulta sa doktor. An iba nakapaghuhulit durante nin pahingalo sa trabaho o sa eskuelahan. An pagbugtak sana nin saro sa satong mga publikasyon sa Biblia sa lugar na naheheling tibaad magin dahelan na an iba maghapot manongod sa satong mga tinutubod.—1 Ped. 3:15.
4 Pagpoon: An sarong masusupgon na siete anyos na aking babae nadangog sa sarong pagtiripon kun gurano kaimportante na an gabos maghulit. Kaya kan namamakal kaiba kan saiyang ina, naglaag sia nin duwang brosyur sa saiyang bag. Mantang sibot an saiyang ina sa counter, an aki nag-alok nin sarong brosyur sa sarong babae, na may kabootan na inako iyan. Kan hapoton kun paano sia nagkaigwa nin kosog nin boot na dolokon an babae, nagsimbag an masusupgon na aking ini: “An sabi ko sana, Uno, Dos, Tres! Asin ruminani na ako!”
5 Tanganing makapaghulit nin impormal, kita gabos nagkakaipo nin espiritu na arog kan sa aking iyan. Ano an makakatabang sa sato? Mamibi para sa kosog nin boot na makapagtaram. (1 Tes. 2:2) Mag-andam sa isip nin sarong hapot o komento manongod sa sarong interesanteng topiko na magagamit nindo sa pagpoon nin pakikipag-olay. Dangan magtiwala na bebendisyonan ni Jehova an saindong mga paghihingoa.—Luc. 12:11, 12.
6 An paghuhulit nin impormal sa mga tawo na nanunuparan niato kada aldaw nagtatao nin kaomawan ki Jehova asin nagtatao sa sato nin kagayagayahan. Tibaad matabangan kaiyan an saro na lumakaw sa dalan pasiring sa buhay na daing katapusan.