Pinagkatiwalaan kan Maogmang Bareta
1 Pribilehiado nanggad kita na pagkatiwalaan kan maogmang bareta nin Dios! (1 Tes. 2:4) Minsan ngani tibaad haboan nin nagkapira an mapuersang mensaheng ini, an mga sadiosan an puso naaakit dian siring sa sarong mahamot na alimyo. (2 Cor. 2:14-16) Para sa mga nag-aako kan asin nagkukuyog sa maogmang bareta, iyan nangangahulogan nin kaligtasan. (Roma 1:16) Paano niato maninigong asikasohon an ipinagkatiwalang ini?
2 Si Jesus Asin an mga Apostol: Inenot ni Jesus an pagbalangibog kan maogmang bareta. (Luc. 4:18, 43) Dawa kun sia pagal asin gutom, an pagkamoot nia sa mga tawo asin an pagpahalaga nia sa mensahe an nagpahiro sa saiya na ipaabot iyan sa iba. (Mar. 6:30-34) Paagi sa tataramon asin halimbawa, itinudok nia sa isip kan saiyang mga disipulo an importansia kan paghuhulit kan Kahadean.—Mat. 28:18-20; Mar. 13:10.
3 Bilang pag-arog ki Jesus, maigot na ipinahayag kan mga apostol an mensahe kan Kahadean. Dawa kan hinahampak asin pinagbobotan na umontok sa paghuhulit, “nagpadagos sinda na dai nin ontok sa pagtokdo asin pagpahayag kan maogmang bareta.” (Gibo 5:40-42) Si apostol Pablo daing kapagalan na nagtrabaho sa gibohon na ini. (1 Cor. 15:9, 10; Col. 1:29) An pribilehio na pagpaabot kan maogmang bareta iinagid nia sa utang sa saiyang mga kapwa, asin andam sia na lingawan nguna an personal na kagianan tanganing otobon iyan.—Gibo 20:24; Roma 1:14-16.
4 An Satong Pribilehio Ngonyan: An pag-apresyar sa sagradong sugo na ipinagkatiwala sa sato pahihiroon kita na humanap nin mga paagi na pahiwason an satong pakikikabtang sa paghuhulit. (Roma 15:16) Si Edward, na nasa silyang de rueda, nagtutukaw sa may laogan nin sarong otel asin nakikipag-olay sa mga bisita manongod sa saiyang pagtubod. Minsan siring, sa pagmawot na gumibo nin orog pa, pinalagan nia nin espesyal na cab an sarong pik-ap, asin paagi sa sasakyan na ini, nagpayunir sia sa laog nin dakol na taon, na nagbibiahe nin rinibong kilometro mantang ginigibo iyan. Siring ki Edward, dakol ngonyan an nagbago kan saindang mga kamugtakan tanganing magkaigwa nin mas dakulang kabtang sa pagpalakop kan maogmang bareta.
5 Bilang pag-arog ki Jesus asin sa mga apostol, logod na ngonyan pirme niatong tawan nin prioridad sa satong buhay an paghuhulit. Sa paggibo kaiyan, ipinaheheling niato an satong pagkamoot sa mga tawo saka an satong pagpahalaga sa maogmang bareta na ipinagkatiwala sa sato.