Bagong Programa sa Espesyal na Aldaw nin Asamblea

‘Gibohon an Gabos na Bagay Para sa Kapakanan kan Maogmang Bareta’ an tema kan bagong programa sa espesyal na aldaw nin asamblea na mapoon sa Pebrero. (1 Cor. 9:23) An maogmang bareta kan Kahadean iyo an pinakaimportanteng bareta na nadadangog ngonyan. Tatabangan kita kan programa na pahalagahan an daing kaagid na pribilehio niato na magin mga paradara kan makangangalas na baretang ini. Pakokosogon man kita kaiyan na padagos na ipahayag an maogmang bareta na dai nin ontok.​—Gibo 5:42.

Ipaheheling sa sato kan programa kun paano gagamiton nin lubos an satong teokratikong pagsasanay tangani na magibo niato an pinakadakol sa ministeryo. Madadangog niato an nagkapira na naggibo nin mga pagliliwat tanganing mapahiwas an saindang paglilingkod, kaiba an mga hoben na itinatao an pinakamakakaya ninda sa pagpalakop kan maogmang bareta.​—Ikomparar an Filipos 2:22.

An pangenot na pahayag, na itatao nin sarong bisitang espiker, idodoon an pangangaipo na kita magdanay na “angay na pagkatiwalaan kan maogmang bareta.” (1 Tes. 2:4) Tatabangan kita na masabotan na tanganing maretener niato an pribilehiong paghiras kan maogmang bareta sa iba, dapat kitang padagos na makaabot sa mga kahagadan asin pamantayan nin Dios sa satong kaisipan asin gawe-gawe. Itatampok man an mga bendisyon na inaako niato sa paggibo kaini.

Dai pagpaltahan an mahalagang marhay na programang ini. An bagong mga nagdusay na boot na magpabautismo sa espesyal na aldaw nin asamblea maninigong paisihon tolos-tolos an nangengenot na paraataman. Imbitaran an gabos na inaadalan nindo na umatender. Togotan niato si Jehova na pasarigon kita na gibohon an gabos na bagay para sa kapakanan kan maogmang bareta asin sa siring taposon an pinakadakulang gibohon sa kamping ini kan Armagedon.