Bagong Programa sa Espesyal na Aldaw nin Asamblea
1 “Magin mga Tawong Tinokdoan ni Jehova” an tema para sa bagong programa sa espesyal na aldaw nin asamblea na mapoon sa Pebrero. (Juan 6:45) An banal na pagtotokdo hale ki Jehova tunay na nakatatabang sa sato na mamuhay na kontento. Pinatatalubo kaiyan sa sato an hararom na pag-apresyar sa satong espirituwal na pamana. An satong mga paghihingoa na tabangan an iba na makadangog kan maogmang bareta ginigibo kitang kapakipakinabang na mga miembro nin sosyedad. Itatampok kan espesyal na aldaw na ini nin asamblea an mga bendisyon na nakakamtan kan mga tawong tinokdoan ni Jehova.
2 Ipaheheling kan programa an pagkakalaen kan mga pakinabang sa pagtotokdo nin Dios asin kan mga peligro nin kinabanon na inadalan. Masasabotan niato nin mas malinaw kun paano itinatao ni Jehova an pinakahalangkaw na klase nin edukasyon—edukasyon na basado sa saiyang Tataramon, an Biblia. Tatawan nin pagdodoon an tolong kabtang nin pagsamba na dian nakaeeksperyensia kita nin kaogmahan sa pagigin tinokdoan nin Dios. Dagdag pa, paririgonon an boot kan mga hoben na arogon an ekselenteng mga halimbawa sa Biblia siring baga ki David asin Timoteo patin isentro an saindang buhay sa espirituwal na mga aktibidad. Mapakokosog an satong pagtubod mantang itinatampok man an kaimbodan nin mga gurang. An bago pa sanang mga nagdusay na kualipikado makakapabautismo na. Haloy pa bago an aldaw nin asamblea, maninigo na nindang impormaran an nangengenot na paraataman dapit kan kamawotan na iyan.
3 An pangenot na pahayag kan espesyal na aldaw nin asamblea may temang “Tinokdoan ni Jehova na Gibohon an Saiyang Kabotan.” Idodoon kaiyan an mga dahelan kun taano kita gabos ta nangangaipong padagos na makanood, magin makosog sa pagtubod, asin padagos na gumibo nin pag-oswag. Iiiba an nakaparirigon na mga eksperyensia tangani na ipaheling kun paano an mga publikasyon kan Sosyedad nakatabang sa dakol na matokdoan ni Jehova.
4 Gumibo nin depinidong mga plano na makaatender. Laoman nindo na totokdoan kamo nin dakol na marahay na bagay kan satong Kaharohalangkaweng Paratokdo.—Isa. 30:20.