Bagong Programa sa Espesyal na Aldaw nin Asamblea
“Magin Maygurang sa mga Kakayahan nin Pagsabot” an tema kan programa sa espesyal na aldaw nin asamblea na mapoon sa Pebrero 2001. (1 Cor. 14:20) Taano ta mahalaga na kita umatender? Kita nabubuhay sa sarong kinaban na pano nin karatan. Tangani na malabanan ini, dapat niatong pataluboon an satong mga kakayahan nin espirituwal na pagsabot tangani na madaog niato an karatan nin karahayan. Tatabangan kita kan programa sa espesyal na aldaw nin asamblea na gibohon iyan.
Sa pambukas na sesyon, ipakikipag-olay kan paraataman sa sirkito an “Mga Pantabang sa Pagigin Maygurang sa Pagsabot sa Biblia.” Ipaheheling nia sa sato kun paano magigin dai natatanyog sa Kristianong pagtubod. Itatampok kan nagsosongkong espiker kun gurano kahalaga an aktuwal na paggamit, o pag-aplikar, kan mga prinsipyo sa Biblia sa pagpatalubo nin malinaw na pakamansay, mantang sia nagtataram sa temang “Ingatan an Espirituwalidad Paagi sa Pagpatood kan Saindong mga Kakayahan nin Pagmansay.”
An mga hoben man kaipuhan na magpatalubo nin mga kakayahan nin pagsabot. Ini ipakikipag-olay sa mga kabtang na “Kun Taano ta Magin mga Omboy Kun Dapit sa Karatan” asin “Mga Hoben na Nagkukua nin Pagsabot Ngonyan.” Dangogon an mga hoben na nagsasabi kun ano an saindang ginigibo sa pagpasarig kan saindang sadiri sa espirituwal tanganing makontrol ninda an ano man na pag-usyoso manongod sa maraot na mga aktibidad kan kinaban asin malikayan an problema.
Paano niato manonompongan an pinakadakulang kaogmahan sa buhay? Ipaliliwanag ini kan nagsosongkong espiker sa pantapos na pahayag na “Makinabang sa Pag-aplikar kan mga Prinsipyo sa Biblia na May Pagsabot.” Matao sia nin mga halimbawa na magpapaheling na an pag-aplikar kan Tataramon nin Dios nakatatabang sa sato na atubangon an mga problema, gumibo nin mga desisyon, asin totoong makinabang sa itinotokdo ni Jehova sa sato.
An mga nagmamawot na simbolisaran an saindang pagdusay sa Dios paagi sa bautismo sa tubig sa asamblea maninigong paisihon an nangengenot na paraataman sa pinakamadaling panahon na mapupuede. Tandaan an saindong kalendaryo oras na ianunsiar an petsa kan espesyal na aldaw nin asamblea, asin gumibo nin depinidong mga plano tangani na makinabang sa nagsosopay na programang ini. Dai paglipasan an ano man na kabtang kan espesyal na aldaw nin asamblea! Pasasarigon kamo kaiyan na magtagal sa maraot na sistemang ini asin magdanay na fiel ki Jehova.