Bagong Programa sa Espesyal na Aldaw nin Asamblea
An tema kan programa sa espesyal na aldaw nin asamblea para sa bagong taon nin paglilingkod igwa nin marigon na pundasyon sa Kasuratan: “Pumasakop Kamo sa Dios—Tumangon Nindo an Diablo.” (Sant. 4:7) Marahay na paggiya ini para sa masakit na mga panahon na ini! An pagkuyog niato sa mga pagboot nin Dios nagpapangyari na kita mapaatubang nin direkta ki Satanas. Totokdoan kita kan programa kun paano marigon na maninindogan tumang sa nakalalaglag sa pagtubod, maraot na mga pakana kan Diablo. Ano an nagkapira sa espirituwal na mga kayamanan na aakoon niato sa asambleang ini?
Ipaheheling kan paraataman sa sirkito kun paano an “Pagpaheling nin Diosnon na Pagpapasakop Bilang mga Miembro nin Pamilya” nagpapakosog sa mga pamilya na mapaglabanan an mga impluwensia kan kinaban. An enot na pahayag kan nagdadalaw na ispiker sa aldaw na iyan, “Kun Ano an Kahulogan kan Pagtumang sa Diablo,” ipaliliwanag kun taano ta asin paano kita nangangaipong gumibo nin asertadong aksion tangani na mapaglabanan an katuyohan ni Satanas na raoton an satong espirituwalidad. Duwang kabtang an espesyalmenteng ibinagay para sa mga hoben, na dapat man na magin listo sa mga pakana kan Diablo. Dakol na Kristiano ngonyan na nasa edad na an nagsayumang magpadara sa mga horot kan kinaban kan sinda hoben pa. Maoogma kitang madangog an nagkapira sa saindang personal na mga eksperyensia.
An pagpapasakop sa autoridad kahagadan sa gabos na minakompuesto kan sosyedad nin tawo. Sa siring, idodoon kan pantapos na pahayag kan nagdadalaw na ispiker an apat na langtad kun saen dapat na ipaheling an satong diosnon na pagpapasakop: (1) sa mga gobyerno, (2) sa kongregasyon, (3) sa sekular na mga okupasyon, asin (4) sa pamilya. Abaa kapraktikal na programa!
An mga boot na magpabautismo sa espesyal na aldaw na ini nin asamblea kaipuhan na paisihon an nangengenot na paraataman sa pinakamadaling panahon na mapupuede. Kita gabos maninigong markahan an petsa sa satong kalendaryo asin magplano na atenderan an bilog na programa kan asamblea. An mga bendisyon na aakoon niato magigin daing katapusan mantang kita nagpapasakop ki Jehova nin daing sagkod.